Паримейнїк

Паримейнїк и Псалтир два богослужебни кнїжки Старого Завиту, а Евангелия и Апостол то зборнїки одредзених богослужебних кнїжкох Нового Завиту.

Паримейнїк облапя паримеї (читаня, чтения) за рижни богослужебни пригоди. Же би ше знало цо ше кеди чита, библийни кнїжки, предвидзени за читанє на Служби Божей, подзелєни на виривки и маю Додаток, односно таблїчку, дзе указане хтори ше виривок кеди чита. Тота таблїчка ше вола Указатель старозавитних церковних читаньох, а облапя шлїдуюци поднаслови:

- „Читаня по мешацослову”

- „Старозавитни читаня Сиропусного тижня и Велького посту”

- „Старозавитни читаня святей Пейдзешатнїци”

- „Читаня общи на швета и святим” и

- „Читаня на общи (рижни) случаї”.

Розпорядок читаня виривкох

Розпорядок читаня читаня виривкох подобни як и при читаню виривкох Евангелиї и Апостолу: за кажду нагоду ше чита виривок хтори найбаржей одвитує дотичному случаю, наприклад:

♦ Указатель церковних „Читаньох по мешацослову” указує цо ше чита на швета и памятни днї святих по мешацох, починаюци од 1. септембра, кед почина нови церковни рок, та по 30. авґуст. Тоти читаня ше чита на вечурнї або на саночним дотичного швета. За кажду нагоду одредзени три читаня, звичайно зоз трох розличних кнїжкох, алє то нє муши буц правило, односно, два читаня можу буц зоз єдней кнїжки, а треце читанє зоз даєдней другей кнїжки, або обратно: перше читанє зоз єдней, а други два читаня зоз другей кнїжки.

♦ Указатель под насловом „Старозавитни читаня Сиропустного тижня и Велького посту” указує на по єдно читанє на Шестих часох и вечурньох стреду и пияток Сиропустного тижня, по єдно читанє Шестих часох пейцох дньох (окрем соботи) шицких шейсцох тижньох Велького посту, по два читаня на вечурньох шицких шейсцох тижньох Велького посту, три читаня на саночним пред Квитну нєдзелю, пондзелок, вовторок и стреду Страсного тижня, по єдно читанє на шестим часу и по два читаня на вечурнї (хтору ше служи, як и стреду и пияток прс цв. Штерацецдньовицу, зоз Службу Преждеосвящених Дарох), Страсного штвартку єдно читанє на Першим Часу и три читаня на вечурнї, на Вельки пияток на шицких штирох часох по єдно читанє и на вечурнї три читаня, на Вельку соботу на утринї єдно читанє, и на вечурнї хтору ше служи зоз Службу Божу Василия Велького (Перша и главна Служба Божа Велькей ноци) – петнац читаня.

♦ Под насловом „Старозавитни читаня святей Пейдзешатнїци” предвидзени читаня лєм за шейсц случаї: на Навечериє Преполовнєня Праздника на вечурнї три читаня, на Вознесениє на саночним три читаня, на Нєдзелю 318 Отцох Першого Вселенского собору на саночним три читаня, на Сошествиє Святого Духа на саночним три читаня и на нєдзелю Шицких святих на саночним три читаня.

♦ Указатель зоз поднасловом „Паримеї общи на швета и святим” указує таки читаня: на швета Господнї, швета Пресвятей Богородици, Чесному и Животворящому Хресту Господньому, Св. Безтїлесним силом, Св. Йоанови Предтечови, Пророком, Св. Отцом, Святительови, Святительом, Мученїкови, Мученїком, Священомученїкови, Священомученїком, Безстрибернїком, Мученїци, Мученїцом, Преподобним женом, Преподономученїци, Преподономученїцом. Вец: Преподобному, Преподобним, Преподомученїкови, Преподомученїком, Визнавательом, пре Христа юродивим, Преподобней жени. И то за кажду нагоду по три читаня.

♦ Под насловом „Паримеї на рижни случаї” указани три читаня за Обновенє храму и єдно читанє за пошвецанє дзвонох.

Паримейнїк, кнїжка хтора у велїм олєгчує читачови на богослуженю, а попри тей кнїжки єст и други нєурядово богослужебни кнїжки хтори ше хаснує, а то Зборнїки, хтори тиж олєгчую роботу читачом прето же у нїх видруковани и паримеї за найвекши швета и найважнєйши случаї.

Литература

• Дзвони, християнски часопис, януар – фебруар 2004. рок, протоєрей ставрофор о. Йоаким Холошняй
• Церковни литурґийно-литурґични лексикон, бок 229, о. др Роман Миз