Основна музична школа

Музична школа (анґл. music school, нєм. musikschule, франц. école de musique, ит. scuola di musica) то музично-образовна специялизована установа хтора препознава и пририхтує талантовани дзеци за здобуванє знаня, поняцох и схопносц зоз обласци музики, прейґ систематичней и континуованей настави. Таку наставу и ученє школяром оможлївюю фахови наставнїцки кадри.

Вкупне основне знанє талантованим дзецом оможлївює дальше музичне школованє и напредованє, кед же то жадаю.^[1]

Основна музична школа

Основна музична школа (анґл. primary music school)^[2] то окремна музично–образовна установа орґанизована же би научела дзеци по 14. роки старосци, хтори жадаю учиц шпивац лєбо грац на даєдним музичним инструменту. У тих школох таку науку з обласци музики школяром оможлївюю фахово наставнїки и подрозумює ше же буду оспособени за школованє, напредованє и усовершованє кед же їм музика будзе вибор за дальше школованє лєбо професия.^[3]

За розлику од основней школи, основна музична школа нє обовязна. За упис школяра до основней музичней школи потребно предходне преверйованє музичних схопносцох/предиспозицийох, односно треба же би положели примаци испит (аудицию).

Тирванє школованя у основней музичней школи (OМШ)

Инструмент	Роки ученя
Соло шпиванє	2 роки
Контрабас	4 роки
Обоа	4 роки
Кларинет	4 роки
Труба	4 роки
Горна	4 роки
Виолина	6 роки
Виола	6 роки
Виолончело	6 роки
Флаута	6 роки
Ґитара	6 роки
Тамбура	6 роки
Гармоника	6 роки
Клавир	6 роки

Школованє у основенй музичней школи и кельо будзе тирвац завиши од главного предмета (инструмента, лєбо оддїла соло шпиваня) хтори школяр вибере и на хторим ше будзе учиц грац и здобувац основу музичного образованя а може тирвац од два по шейсц роки. (Кед у школи постої пририхтуюце оддзелєнє, хторе нє обовязне, вец то тирва и длужей).

У таблїчки приказане тирванє ОМШ у Сербиї а подобни систем и у жемох бувшей Югославиї. У других державох школованє основней музичней школи тирва и варира од держави до деражви у зависносци од орґанизациї школского музичного образованя.

Наставна годзина инструмента варира од школи до школи. Углавним за початнїкох годзина тирва 30 минути,прето же мали дзеци нє маю длугшу повагу и чежко им буц сконцентровани лєм на инструмент напр. 45 минути, прето им годзина кратша.Тип наставней годзини индивидуални. За висши класи (од 4. класи по шесту) настава инструмета тирва 45 минути.

Наставни предмети

Окрем главного предмета-инстурмент, школяре ОМШ обовязно нащивюю и уча ище шлїдуюци наставни предмети:

• солфедьо,

• теория музики,

• хор и

• оркестер

Солфедьо обовязни предмет од першей класи основней музичней школи по шесту класу. Настава орґанизована ґрупно и тирва 45.минути. Од штвартей класи по шесту обовязни и хор лєбо оркестер у зависносци за хтори ше предмет школяр опредзелї. Медзиитм, постої можлївосц ходзиц на даєден зоз тих предметох и у нїзших класох, алє як виборни предмет.

Возрост за упис до ОМШ

Школяре ше можу уписац спрам рижних возростох. Зоз пракси дознаваме же успих школяра лєпши кед ше дзецко почнє занїмац зоз музику у цо младшим возросту. Тиж ше практикує же би ше дзеци скорей уписовали кед же настава ученя на инструменту тирва длужей (напр. виолина (гушля), клавир, гармоника, флаута, тамбура итд). Так же ше напр. школяре за шейсцрочне школованє уписую до основней музиней школи од 7 по 9 роки, за штиророчне школованє од 9 по 11, а за дворочне од 15 по 18 роки (напр. за соло шпиванє).

Явни документи

Основни музични школи уписаному школярови видаваю школярску кнїжочку, а при виписованю виписнїцу лєбо преводнїцу. Школа видава школярови уверенє-документ о положеним испиту, уверенє о положених узше фахових предметох, свидоцство о законченей основнєй музичней школи и диплому за здобуте музичне образованє ОМШ.