Олґа Гарди
| Олґа Гарди | |
|---|---|
 | |
| Назвиско | нина Олґа |
| Датум народзеня | 9. фебруара 1907. |
| Датум упокоєня | 2. юлия 1977 (70) |
| Державянство | угорске, югославянске |
| Школа | Майсторски испит за цукрарку |
| Период твореня | 1932-1970. |
| Ремесло | Цукрарство |
| Поховани | у Руским Керестуре |
Олґа Гарди (*9. фебруар 1907-†2 юлий, 1977), позната керестурска цукрарка.
Биоґрафия
[ушориц | ушор жридло]Олґа Сакач народзена 9. фебруара 1907. року у Вербаше. Основну школу закончела у родним месце и ту ше и задзивчела.
Олґа Сакач ше одала за Михала Гардия (Мишкового) до Руского Керестура. У малженстве ше им 1929. року народзел син Владимир.
Були тo часи велькей шветовей економскей кризи, жило ше чежко та Михал Гарди надумал пойсц на роботу до Французкей. Вон у цеку 1930. року пошол робиц до Французкей. Робел на фарми у месце Тарергоне хторе 40 км оддалєне од Лиону. О два роки Олґа зоз сином Владимиром пошла до Французкей ґу мужови. Перше робела як помивачка у кухнї. Робела добре и схопно та ю ґазда, хтори мал цукрарню, вжал же би там робела и учела тайни цукрарского ремесла.
Михал и Олґа достали 1936. року дзивку Леону.
Цала фамелия ше 1938. року врацела до Руского Керестура. Зоз зашпорованого пенєжу купели порту, направели хижу и предлужели цукрарску роботу.
Олґа Гарди 1951. року положела майсторски испит за цукрарку. Предлужела добре робиц и єй цукрарня постала позната як у Руским Керестуре так и у околних местох. Олґа знала печиц барз смачни а на очи красни торти за потреби цукрарнї як и за свадзеби вешеля, рижни други колачи, влєце мала у цукрарнї сладоляду та други лакотки и безалкоголни напої.
У цукрарнї Олґи Гардийовей вецей млади Рускинї закончели цукрарске ремесло и здобули квалификациї за роботу як цукрарки. Були то Еуфемия Планкошова зоз Коцура, Фебронка Балоґ родз.Буїла з Руского Керестура и Гелена Рац зоз Нового Орахова.
Олґа Гарди умарла 2. юлия 1977 року. Похована є на теметове у Руским Керестуре.
Литература
[ушориц | ушор жридло]• Т. Папгаргаї, Сладки тайни нини Олґи, новини Руске слово, 2. марец 1973, б. 13.
• Мирон Жирош, „Члени майсторского дружтва после Другей шветовей войниˮ, Бачванско-сримски Руснаци дома и у швеце 1745-2001, Том IV, НВУ Руске слово и Грекокатолїцка парохия св. Петра и Павла, Нови Сад, 2004, б. 180.