Олимпийни божества
Дванац олимпийни богове були найважнєйши богове греческого Пантеону, хтори жили на верху Олимпу. У розличних часох було штернац богох хторих ше тримало за олимпийних, алє их нїґда нє було вецей як дванац у истим чаше.[1]
Зевс, Хера, Посейдон, Арес, Гермес, Гефест, Афродита, Атина, Аполон и Артемида ше вше тримали за олимпийних богох. Хестия, Деметра, Дионис и Гад додавани до тей ґрупи. Гестия уступела свойо место Дионисови же би жила медзи людзми (єй додзелєна чесц отримовац огень на Олимпу). Персефона препровадзовала шейсц мешаци рочнє у под'жемним швеце (теди на жеми пановала жима) и дошлєбодзене єй було врациц ше на Олимп у других шейсцох мешацох же би була зоз мацеру Деметру. Гоч ше Гада тримало за єдного з найважнєйших греческих богох, його дом бул под'жемни швет мертвих.[2][3]
Олимпийни богове освоєли власц после побиди у войни до хторей Зевс зоз своїма братами и шестрами рушел процив титанох. Зевс, Гера, Посейдон, Деметра, Гестия и Гад були браца и шестри, док други (окрем Афродити, хтора ше народзела зоз морйовей пени) звичайно тримани за Зевсово дзеци од розличних мацерох (окрем Атини, хтора ше народзела зоз Зевсовей глави). Можлїве и же Гера сама народзела Гефеста як вимсценє пре народзенє Атини.
По приповеданьох, богове часто зиходзели зоз верху найвисшей гори у Греческей и приходзели медзи людзох, же би им помогли або их покарали, алє приходзело и до мишаня зоз людзми, зоз хторима мали и потомки. Дзеци народзени зоз мишаней вязи даєдного бога и людзох були полубогове и розполагали зоз визначнима схопносцами.
Зевс як верховни бог бул всемогущи, док моц других богох була огранїчена зоз силносцу моци других богох, понеже кажде з нїх мал обласц у хторей бул наймоцнєйши. И по подоби и по характеру здабали на людзох и мали свойо слабосци, жаданя и чувства.
Список богох
[ушориц | ушор жридло]- Зевс найвиши и наймоцнєйши бог, пан Олимпу, бог блїзкавки
- Посейдон, вєдно зоз Гадом, други бог по важносци, хтори управял зоз океанами и морями
- Гад тиж други бог по важносци, хтори водзи бриґу о умартих душох
- Атина богиня мудросци, уметносци, нукашнєй краси, образованя и войни
- Арес бог войни и геройох
- Артемида богиня ловох, животиньох, плодносци и чесносци
- Гефест бог огня, роботи, ремеселнїкох и оружарох
- Аполон бог танцу, музики, вилїченя и медицини, штреляцтва и розумносци
- Афродита богиня любови, сексуалносци, вонкашнєй краси и прицагуюцосци
- Гера Зевсова супруга, богиня малженства, жертвованя, вирносци и фамелиї
- Деметра богиня жеми, квеца и рошлїнох, поживи, заштитнїца малженства и польопривреди
- Дионис наймладши бог у Пантеону, бог вина, опиваня и сексуалносци
Референци
[ушориц | ушор жридло]- ↑ The 12 Olympian Gods (Collection) World History Encyclopedia, Приступљено 15.06.2026.
- ↑ Olympian Gods & Goddesses, Theoi Greek Mythology. Приступљено 15.06.2026. (језик: енглески)
- ↑ The 12 Olympian Gods of Mount Olympus, Twelve Olympians. Приступљено 15.06.2026.(језик: енглески)