Октоих
Октоих або параклетикон (греч. Ὀκτώηχος – осемгласнїк, окто = осем, ихос=глас) [1] ше состої зоз богослужебней поезиї. То основна богослужебна кнїжка тей файти.
У историї наставаня християнскей богослужебней поезиї нєраз ше случовало же творителє своїх писньох – тропарох, кондакох, стихирох, канонох - за нїх источашнє творели и мелодиї. После наставаня рижней поезиї, а так исто и мелодийох, було очежане попровадзиц їх змист, так же Церква запровадзела норми їх хаснованя.
На таки способ настал Октоих (Осмоглашнїк). Церква вибрала и озаконєла осем мелодиї, Гласи, и їм одвитуюци писнї. Писнї за шицки богослуженя: вечурню, повечериє, полноцнїцу, Часи, утриню, а тиж так и за шицки днї у тижню, починаюци од нєдзелї, а закончуюци всоботу.
Правила хаснованя
[ушориц | ушор жридло]Перши циклус хтори ноши наслов Глас перши ше почина шпивац на Пасхалней вечурнї, Глас други вечар перши дзень Пасхи, Глас треци на Шветли пондзелок вечар, Глас штварти на Шветли вовторок вечар , Глас пияти на Шветлу стреду вечар, Глас шести на Шветли штварток вечар, Глас осми на Шветли пияток вечар. Так ше закончує нєподполни (прескочени Глас седми) Столп Октоиха (Столп то циклус осем гласох).
Нєдзеля по Пасхи, Томова нєдзеля, ма свойо власни писнї, та тей нєдзелї нє заступени Октоих.
Други циклус або Столп Октоиха почина аж вечар на Томову нєдзелю на вечурнї. През Томов тидзень панує Глас перши, алє нє подполно, бо ше миша зоз власнима писнями Томового тижня. Внєдзелю Женох мироносицох и у тижню по нєй влада Глас други, алє исто лєм часточнє, бо ше шпива и власни писнї тей нєдзелї и того тижня. Внєдзелю о розслабеним (штварта нєдзеля по Пасхи) и єй тижню шпива ше Глас треци. Внєдзелю самарянки (пията нєдзеля по Христовим воскресеню) Глас штварти, внєдзелю о шлєпородзеним Глас пияти, внєдзелю св. Отцох Глас шести, и внєдзелю шицких святих Глас осми. И тот Столп нєподполни, бо знова прескочени Глас седми.
Так ше хаснує Октоих кед нє ма главну або першорядну улогу у богослуженю.
Його подполне хаснованє почина яж по Нєдзелї шицких святих и тирва до пиятку пред Нєдзелю мясопутну (предостатня нєдзєля и тидзень пред початком Велького посту). Одредзени Глас почина зоз вечурню всоботу вечар и тирва до пиятковей вечурнї. Глас перши почина другей нєдзелї по Русадльох, Глас други шлїдуюцей нєдзелї, и так шором док ше нє дойдзе до Гласу осмого. То перши Столп. И так шором, Столп за Столпом, а столпи през рок єст шейсц.[2]
Анї єдно богослуженє нє составене лєм зоз Октоиху, вон у одредзеним смислу фундамент бо нужно уключує и одредзену мелодию. Так, кед ше гвари: Глас перши, з тим ше дума на одредзену писню и мелодию по хторей ше тоту поезию шпива. Октоих другим богослужебним текстом, позбераним у других богослужебних кнїжкох поетского жанру, дава „глас” у смислу одредзеней мелодиї. Так и писнї Минеї (кнїжка молитвох святим), Триоду (кнїжка текстох о одредзеней часци християнского року - Постови триод и Квитни триод) и писнї других богослужебних кнїжкох маю надпис над першим стихом напр. Глас 1 або Глас 2, так же ше зна з яку мелодию ше тоту конкретну писню шпива.
Векшину писньох у Октоиху написал Йоан Дамаскин, сирийски монах и теолоґ[3] (VIIIвик), а даєдни Павло Аморейски, цар Константин, цар Лєв VI Мудри и други.
Октоих ма обсяжни поетски материял и друкує ше у двох томох. У каждим тому єст видруковани штири Гласи, а сам том ма коло 600 боки.
Литература
[ушориц | ушор жридло]- Дзвони, християнски часопис, марец 2004. рок, протоєрей ставрофор о. Йоаким Холошняй
Референци
[ушориц | ушор жридло]- ↑ Церковни литурґийно литурґични лексикон, НВУ Руске слово и Грекокатолїцка парохия святих апостолох Петра и Павла, Нови Сад, 2011. бок 219, о. др Роман Миз
- ↑ Церковни литурґийно литурґични лексикон, НВУ Руске слово и Грекокатолїцка парохия святих апостолох Петра и Павла, Нови Сад, 2011. бок 280, о. др Роман Миз
- ↑ Йован Дамаскин, www.pravoslavlje.net