Нюкта

Нюкта у греческим рукопису Паризки псалтир зоз X вику (Национална библиотека Французкей)

Нюкта або Никта (греч. Νύξ, лат. Nox) примордиялна богиня ноци у греческей митолоґиї. Ридко кеди ше зявює у митох, алє ше ю трима за барз моцну и красну. Мала храм-пророковалїще у меґарскей акрополи, а єй статуа ше находзи у Артемидовим храме у Ефесу.

Митолоґия

Гесиод

По Гесиодовей Теоґониї, Никта настала зоз Гаосу. Мала вельке потомство. Зоз Еребом, богом вичней цмоти, мала Етра, вичне шветло и Гемемеру, ясни дзень.

Кед титан Хрон покалїчел свойого оца Урана и превжал власц, обнята з єдом и гнївом пре тот поступок, Никта з помоцу партеноґенези народзела Мома (критику), Мороса (преклятство), Таната (шмерц), Гипноса (спанє), Гарона, Онеире (сни), Геспериди (вечар), Кери (насилну шмерц), Мойри (судьбу), Немесиду (вимсценє), Апату (спреводзка), Филотас (друженє), Ґераса (старосц) и Ериду (нєскладанє).

Гесиод у своїм опису Тартара гвари же кед би Никта вошла до Тартару, Гемера би вишла, а кед би ше Гемера врацела, Никта би пошла.

Гомер

У 14. кнїжки Гомеровей Илияди, Никтинов син Гипнос, бог спаня, здогаднул Геру на стару услугу, кед го модлєла най ушпи Зевса. Уж раз успал Зевса на Герово вимаганє, цо єй оможлївело же би напакосцела його синови Гераклови. Зевс бул нагнївани и дрилєл би Гипноса до моря кед би вон нє сцекол у страху до Никти, своєй мацери. Гомер далєй толкує же Зевс загамовал свой гнїв бо ше бал же нагнїва Никту, та на таки способ Гипнос обкеровал його гнїв. После того ше усудзел знємириц Зевса лєм даскельо раз, понеже ше бал од нього и бежал назад гу своєй мацери Никти.

Орфизем

Никта мала ище важнєйшу улогу у часцох даскелїх писньох хтори ше приписую Орфейови. У нїх Никта, а нє Гаос, перше божество. Вона жиє у пещери дзе пророкує. Хрон, хтори завязани, заспал и пияни од меду, шпи и пророкує. Под пещеру, Адрастея биє з чинелами до тимпену, поцагуюци цалу вселену до екстатичного танцу у ритме Никтового врачаня. Фан, чудни, чудовиско гермафродит демиюрґ (творитель), Никтово дзецко або оцец.

Други

Дзеци

• Зоз Еребом, примордиялну цмоту:
  • Етер, шветлосц, воздух богох
  • Харон, ладяр у Гаду
  • Епифрон, розумносц, увага
  • Гемера, дзень
  • Морос, преклятство
  • Немесида, вимсценє
  • Стикс, мержня
• Партеноґено:
  • Ахлис, молга шмерци
  • Апата, спреводзка
  • Ерида, нєскладанє
  • Ериниє
  • Ґерас, старосц
  • Геспериде, змерканє
  • Кере, насилна шмерц
  • Мойре, судьба
  • Мом, вишмейованє
  • Ойзис, бида
  • Онеири, сни
  • Танатос, шмерц
  • Фан
  • Филотас, друженє
  • Гипнос, спанє
• Зоз Ураном, нєбом:
  • Лиса, гнїв

Култ

Греки и Римянє нє почитовали Никту и нє направели храми на єй чесц. Кед мальовали єй подобу, мальовали ю як задуману жену зоз прикриту твару у цмей шмати. Така Никтова подоба ше найчастейше зявює на вазнох и релєфох, як и на надгробних памятнїкох. Єй найпознатши приказ на Зевсовим олтаре зоз Перґаму (180 - 160 п.н.е.) хтори ше нєшка чува у Берлинским музею.

Як алеґорийска подоба, Никта ожила на платнох велїх малярох ренесанси и бароку.

Вонкашнї вязи

• Nikta], nova-akropola.com
• Никта у греческей митолоґиї (ен)