Ножнїчки
Ножнїчки (тур. makas, горв. škare, рсй. ножницЫ, поль. nożyczki, слц. nožnice, укр. ножицi – славянске мено) то алат хтори служи за штриганє. Ма два метални оштри часци злучени на таки способ же ше им рубци шлїзкаю єден коло другого. З ножнїчками мож штигац папер, картон, пластику, метални фолиї, платно, цверни, порващки, дрот, живу ограду, орезовац конари, та ше вец и розликую по дїялносци за яку су наменєни. Єст ножнїчки за балоґашох (лїворуких) и за праворуких, як и универзални.
Файти ножнїчкох
[ушориц | ушор жридло]
У зависносци од наменки, ножнїчки єст:
• Кухньово ножнїчки
• Ножнїчки за папер
• Ножнїчки за пластику
• Ножнїчки за платно (скравецки)
• Ножнїчки за метал
• Ножнїчки за живу ограду и конари
• Медицински ножнїчки (гирурґийни)
• Фризерски ножнїчки
• Ножнїчки за штриганє нохцох
• Ножнїчки за штриганє овцох
История
[ушориц | ушор жридло]Предпоставя ше же ножнїчки видумани коло 1500. р. п.н.е. у античним Єгипту. Найвчаснєйши ножнїчки ше зявели у Месопотамиї пред 3.000 до 4.000 роками. Були типу фейдерових ножнїчкох и мали два бронзово оштри часци повязани на ручкох з ценку флексибилну пантлїчку зоз закривеней бронзи хтора тримала оштри часци у ускладзеним положеню и оможлївйовала же би ше вони роздвоєли потим як ше ручки прицисло з гарсцу. Фейдерово ножнїчки ше затримали за хаснованє у Европи по 16. вик. Паралелно з фейдеровима ножнїчками у Римским царстве ше почало хасновац и осовински ножнїчки, а з Европи ше преширели по цалим швеце. Таки ножнїчки и нєшка хаснуєме.
Року 1761. у Лондону отворена перша ремеселска роботня за правенє ножнїчкох, а ище 1649. року отворена компания под меном Фискарс хтора правела ножнїчки. Тота фирма роби и нєшка.
Вчасна продукция
[ушориц | ушор жридло]Вилиям Вителей и Санс (Шефилд) Лтд. то подприємство хторе прави ножнїчки од 1760. року, гоч ше вери же робота почала ище скорей. Компания и нєшка прави ножнїчки и найстарша є компания на Заходзе хтора тото роби.
Обрацаюци ножнїчки ше нє правело на велько аж по 1761. рок, кед Роберт Хинчилф зоз Шефилду направел перши ножнїчки з гартованого и полираного лятого челїку. Його главна спокуса було формованє лукох – перше их направел виполнєти, вец видзиравел дзири, а потим одстранєл метал же би вони були досц вельки ухпац пальци. Тот процес бул усиловни и очиглядно го Хинчлиф злєпшал же би звекшал продукцию. На хижу дзе жил поставел знак зоз хторим ше представял як продукователь финих ножнїчкох.
Модерни продукцийни реґиони
[ушориц | ушор жридло]Китай
Велька векшина ґлобалней продукциї ножнїчкох одвива ше у Китаю. Од 2019. року Китай продуковал 64,3% шветового вивозу ножнїчкох.
Найстарша компания у Китаю основана 1663. року и єдна є з найстариших продуковательох ножнїчкох на швеце хтора нєпреривно роби. У нєй заняти 1500 людзе хтори рочнє направя коло 7 милиони тунї ножнїчки.
Французка
У Французкей єст даскельо историйно важни реґиони за продукцию ножнїчкох. У нїх ше перше почало правиц шаблї, мечи и байонети, а познєйше – при концу 18. и у 19. вику ше прешло на ножнїчки и други оштри алати за штриганє и резанє.
Варош Овериня остава важни центер за продукцию ножнїчкох и прибору за єдзенє. Там єст Музей прибору за єдзенє хтори приказує 800-рочну историю варошского виробку оштрих алаткох.
Нємецка
У Нємецкей ше 2019. року правело и вивожело дакус менєй як 7% шветового вивозу ножнїчкох. Часто наволовани Варош оштрих алаткох, Солонґен у Сиверней Райни – Вестфалиї бул центер за продукцию ножнїчкох од штреднього вику. При концу 18. вику у Солинґену було вецей як 300 майстрох за виробок ножнїчкох.
Варош Солинґен 1995. року принєсол Солинґенску уредбу зоз хтору одредзене же марки „Made in Solingen“ мож применїц лєм на продукти хтори зошицким випродуковани у старей индустрийней обласци Солинґену.
Италия
Класични кухньово ножнїчки у италиянским стилу, хтори ше часто хаснує за резанє поживи, маю два половки хтори мож роздвоїц же би ше их могло очисциц.
Варош Премана, у провинциї Леко, ма традицию желєзарньох и продукциї ножох од 16. вику. Нєшка Конзорциюм Премакс орґанизує вецей як 60 локални компаниї хтори ше занїмаю з продукцию ножнїчкох за ґлобални тарґовища. Италия 2019. року вивезла 3,5% ґлобално випродукованих ножнїчкох.
Єдна з найстарших фирмох за продукцию преманских ножнїчкох хтори ище вше робя то Санели Амбродьо, основана 1869. року.
Япон
Правенє ножнїчкох у Японє «виросло» зоз правеня мечох у 14. вику. Починаюци од 1200-их рокох, кед гражданом вецей нє було дошлєбодзене ношиц мечи, варошски ковалє почали правиц ножнїчки и ножи. Єст вельо специялизовани типи японских ножнїчкох, алє скравецки ножнїчки уведол америцки комодор Мет'ю Пери зоз ЗАД 1854. року.
Шпания
У Солсони, у Шпаниї, ножнїчки ше почало правиц у 16. вику. На индустрийней вершини у 18. вику було 24 роботнї, орґанизовани як Цех святого Елиґия, защитнїка ножарох. Року 2021. остала лєм єдна роботня за правенє ножнїчкох (основана 1917. року) хтора у приватним власнїцтве и єдини є варошски продукователь ремеселнїцких ножнїчкох.
Зєдинєне Кральовство
Шефилд, Йорк, бул дом першей масовней продукциї ножнїчкох починаюци од 1761. року по 19. вик. Там було коло 60 компаниї за продукцию челїчних ножнїчкох. Медзитим, од 1980-их, ґлобализация индустриї и преход на туньши, масовно випродуковани ножнїчки створели дефлацию ценох зоз хтору ше велї ремеселнїки нє могло змагац.
Нєшка єст лєм двох продуковательох ножнїчкох у Шефилду и вони обидвоме фокусовани на вершински виробок «продуктох за живот», а нє на масовну продукцию.
Вонкашнї вязи
[ушориц | ушор жридло]- Zoom Inventors and Inventions, enchantedlearning.com.
- Municipality of Premana: Economy. website comune.premana.lc.it.
- Ken, “Sasuke: Witness the Art of Japanese Blacksmithing in Osaka”. Matcha Japan.
- Kazue, “Discovering Quality Japanese Scissors and Knives”, website japanonlinetour.com.
- Sudworth, John (2013-04-22). „The scissor-maker that has cut through Chinese history”. BBC News.