Нове Орахово
| Нове Орахово | |
|---|---|
.jpg)
| |
 Герб Нового Орахова
| |
| Административни податки | |
| Держава | Сербия |
| Автономна покраїна | Войводина |
| Управни округ | Сивернобачки |
| Општина | Бачка Тополя |
| Жительство | |
| —2022 | 1449 |
| —густосц | 23/km2 |
| Ґеоґрафски характеристики | |
| Координати | 45° 50′ 34″ С; 19° 46′ 01″ В |
| Часово зони | UTC+1 (CET), влєце UTC+2 (CEST) |
| Абс. висина | 111 m |
| Поверхносц | 65,3 km2 |
.svg) | |
| Инши податки | |
| Поштове число | 24351 |
| Поволуюце число | 024 |
| Реґистерска ознака | BT |
Нове Орахово ( мадь. Zentagunaras) валалске населєнє у централней часци високоровнїни Телечка, медзи Бачку Тополю на югозаходзе, Чантавиром на сиверу, Боґарошом, Светичевом и Нєґошевом на югу и ричку Чик на востоку. Валал ма вигодне ґеоґрафске положенє, бо ше находзи нєдалєко од важних транспортних драгох. Нове Орахово ше находзи на 111 метери надморскей висини. Населєнє забера поверхносц 65,3 квадратни километри. Зазначене число жительох 1449. То значи же на 1 квадратни километер єст 23 жительох.
Восточно од Нового Орахова чече рика Чик. Єй жридло у Мадярскей нєдалєко од гранїци. Цек Чика закончує ше при Бачким Петровим Селу, дзе ше улїва до Тиси. Вкупна длужина рички 100 километри. Глїбина 3-5 метери, а ширина даскельо метери.
История подруча
[ушориц | ушор жридло]Понеже Бачка у прешлосци мала барз добри природни условия за насельованє, даєдни часци Бачки були населєни ище у каменим чаше. Зоз неолиту єст шлїди и нєдалєко од Нового Орахова, на Криваї при Пачире, коло Байши, Старей Моравици и Малого Идьошу, а зоз бронзового часу на Чику при Чантавире. На тим подручу 1975. року окончовани археолоґийни випитованя, та установене же ту у штвартим вику було населєнє Сарматох. Писани историйни документи твердза же ту у XIII вику було пустарске населєнє хторе ше волало Лакашедьгаза. После Мохацкей битки 1526. року тоти краї остали цалком пусти. После турского руйнованя траца ше шлїди и населєня и його жительства.
У периодзе од XVI по XVIII вик ту була пустара на хтору з часу на час приходзели лєм статкаре номади, алє ше нє затримовали длуго. После Сентянскей битки 1697. року, зоз поцагованьом турского войска и ошлєбодзованьом територийох нєшкайшей Войводини, почина розвой околних населєньох и починаю нови селїдби народох. У XIX вику у пустари на териториї нєшкайшого Нового Орахова настало валалске населєнє чийо ше жителє занїмали зоз землєдїлством, алє статкарство и далєй остало главне занїманє, дзекуюци добрим пасовиском.
У XVII и XIX вику на тим подручу свойо салаши направели Мадяре зоз Сенти.
У другей половки XIX вику ше предлужує усельованє. Орачей жеми єст вше вецей, та на початку XX вику рошню вельки маєтки чийо их ґаздове тримаю аж по конєц Другей шветовей войни. Аґрарна реформа валалу меня твар.
Нове Орахово основане на початку XX вику. Як подруче розруцаних салашох од 1702. року припадало Сенти. После Другей шветовей войни приєдинєне є ґу Бачкей Тополї. Мено – назву места Нове Орахово ше хаснує од 1948. року.
Колонизация валала
[ушориц | ушор жридло]После 1918. року сцигли приселєнци зоз Лики и Герцеґовини.
У першей половки 1946. року до населєня хторе теди наволоване Ґунарош колонизовани 360 фамелиї рускей националносци. Перша ґрупа колонистох зоз Руского Керестура рушела 13. мая 1946. року. У нєй було 49 фамелиї хтори ше наздавали же на другим месце почню лєгчейше жиц. Мали лєм три кочи, та валалски орґани власци розказали най тоти цо оставаю у валалє, а маю свойо кочи, задармо одселя колонистох до Ґунарошу.
У Ґунарошу вєшенї 1946. року було коло 60 дзеци за школу, а валал нє мал анї школу анї учителю. За школски будинок предвидзени стари Каштель, а зоз Руского Керестура принєшени лавки и нєобходни инвентар. За першого учителя меновани Владимир Рогаль. после нього Владимир Владо Бесерминї, та його шестра Олґа Бесерминї, потим Янко Медєши и Йовґен Планчак. Кажди зоз нїх по дацо зохабел и у култури тамтейших Руснацох.
Зоз приходом учительки Аранки Канюховей (познєйше Планчаковей) и єй шестри Милици и учителя Янка Раца, понеже валал уж бул вибудовани, та остало кус вецей часу за дружтвени живот и тедишнє културне дружтво збогацовало свой репертоар. Рихтало ше драми, нє лєм єднодїйки. Младеж активно участвовала у шицких секцийох. Давало ше театрални представи На синокосу, Пан Тома, Зла жена, Єрофейска чаривна травка и други. Госцовало ше и по наших валалох. У тей роботи найвецей заслуги мали Янко Будински, Олґа и Владо Бесерминьово, Дюра Паланчаї, Штефан Шпрох, Любо Папуґа и велї други. Оркестер ше пополньовал зоз младшима; починали грац Любо Папуґа и Янко Бучко, Дюра и Владо Еделински и други. Учителє основали и фолклорну секцию. Зоз приходом до Нового Орахова учителя Витомира Бодянца и познєйше Миколи Сеґедия, а потим и паноца Владимира Тимка зоз супругу-наставнїцу Марию, културни живот у месце здобул тоту праву форму. Основало ше тамбурови оркестер зоз младежу и зоз школярами, робела драмска секция, основало ше хорску секцию зоз соло-шпивачами, а фолклорна секция робела при школи. Нє мож нє спомнуц нашо соло-шпивачки цо перши крочаї у шпиваню направели у нашим дружтве, а то Натала Арваї, нєшка Барна и Гелена Будински, тераз Сабадош зоз Кули, односно Вербасу.
Метеоролоґийни условия
[ушориц | ушор жридло]Податки од мераних штреднїх температурох Нового Орахова то:
- рочна штредня температура виноши 10,7 ступнї Целзиюса;
- у януаре найжимнєйше, штредня температура виноши – 1,4 ступнї Ц;
- у юлию найцеплєйше и температура виноши штреднє 21 ступень Ц;
Паданя у Новим Орахове:
- 1969. року виношели 734,8 мм;
- 1971. року тот мерани податок виноши 452,9 мм
Жительство Нового Орахова
[ушориц | ушор жридло]Спрам попису зоз 2022. року у валалє було 1449 жительох. Штредня старосц жительох виноши 40,7 роки (39,4 при хлопох и 42,0 при женох).
Число жительства ше, такповесц, нєпреривно зменшує. Нове Орахово напущую углавним млади. Одходза з векшей часци до варошох котри ту нєдалєко, до Бачкей Тополї, Сенти, Суботици. Тото указую и числа:
| Демоґрафия[1] | ||
|---|---|---|
| Рок | Жительох | |
| 1948. | 3119 | |
| 1953. | 2859 | |
| 1961. | 2970 | |
| 1971. | 2673 | |
| 1981. | 2307 | |
| 1991. | 2263 | 2.207 |
| 2002. | 2029 | 2.151 |
| 2011. | 1768 | |
Тоти тренди потвердзую и таки статистични податки:
| Рок | 1948. | 1953. | 1961. | 1971. | 1981. |
|---|---|---|---|---|---|
| Число фамелийох | 779 | 819 | 905 | 846 | 830 |
| Штреднє членох у фамелиї | 4,00 | 3,49 | 3,28 | 3,16 | 2,78 |
| Етнїчни состав жительства спрам попису 2002. року[2] | |
|---|---|
| Мадяре | 1737 85,60%
|
| Руснаци | 181 8,92% |
| Серби | 59 2,90% |
| Югославянє | 14 0,68% |
| Горвати | 7 0,34% |
| Чарногорци | 4 0.19% |
| Муслиманє | 1 0.04% |
| Бунєвци | 1 0.04% |
| Нєпознати | 1 0.04% |
Економски профил валала
[ушориц | ушор жридло]Жителє Нового Орахова углавним землєдїлци. Зоз польопривреду ше самостойно занїма 681 фамелия. У месней задруґи и у месних и бачкотопольских фирмох и индустриї заняти члени зоз 249 фамелийох.
1981. року у Новим Орахове 151 ґаздовство мало трактор, а було и 13 комбайни.
Польопривреда
[ушориц | ушор жридло]Жителє Нового Орахова занїмаю ше зоз овчарством, говедарством и швинярством, односно зоз продукцию житаркох, цукровей цвикли, слунечнїку и кукурици.
Транспорт
[ушориц | ушор жридло]Нове Орахово нє ма желєзнїцу. Путнїцки транспорт ше одвива на автобусох. Путнїки можу каждодньово путовац зоз Нового Орахова до Бачкей Тополї, Нового Саду, Кули, Зомбора, Сенти, Кикинди, Чантавиру, Суботици, Горґошу, зоз можлївосцу одходу до Сеґедину (Мадярска), Темишвару (Румуния), Осеку (Горватска).
Як валал напредовал
♦ 1946. року отворена пошта: теди Нове Орахово достало 2 телефонски линиї зоз 30 приключками (предплатнїками);
♦ 1977. року вигласани месни самодопринос и од теди драги асфалтовани и тротоари вибетоновани.
♦ 1981. року у Новим Орахове єст 450 ТВ апарати и 170 радиоапарати
♦ 1970. року отворена самопослуга. Окрем того, єст ище три предавальнї.
♦ До 1970. року у штред валала була єдна з надом закрита хижа „Чарда”, єдини погосцительни обєкт. Теди на тим месце вибудовани модерни мотел „Рона”. Тераз єст ище три погосцительни обєкти – карчми.
♦ Ловни туризем каждого року вше моцнєйши. За тото заслужне Ловарске дружтво Нове Орахово, котре ма 35 членох.
Предїли – часци Нового Орахова маю окремни назви:
Чарна школа
Кадвань-шор
Ґунарош
Угел
Руски (русински) валал
Мали шор
Били криж итд.
Литература
[ушориц | ушор жридло]Русини у Новом Орахову/Ruszinok Zentagunarason/Руснаци у Новим Орахове, Дружтво за руски язик, литературу и културу и КУД Петро Кузмяк, Нове Орахово, Нови Сад-Нове Орахово, 2009.
Референци
[ушориц | ушор жридло]- ↑ „Књига 9”. Становништво, упоредни преглед броја становника 1948, 1953, 1961, 1971, 1981, 1991, 2002, подаци по насељима (PDF). webrzs.stat.gov.rs. Београд: Републички завод за статистику. мај 2004. ISBN 86-84433-14-9.
- ↑ „Књига 1”. Становништво, национална или етничка припадност, подаци по насељима. webrzs.stat.gov.rs. Београд: Републички завод за статистику. фебруар 2003. ISBN 86-84433-00-9.