Никола Чизмар
| Никола Чизмар | |
|---|---|
 | |
| Особни податки | |
| Назвиско | Коле |
| Датум народзеня | 12. априла 1955 |
| Датум упокоєня | 12. януара 2026 (71) |
| Музична робота | |
| Активни период | 1971—2025. |
| Жанр | Музика, рижни жанри |
| Инструмент | ґитара |
| Поховани | на теметове у Вербаше |
Никола Чизмар Коле (*12. април 1955—†12. януар 2026), музичар, длугорочни член Културно просвитного дружтва Карпати у Вербаше.
Биоґрафия
[ушориц | ушор жридло]Никола Чизмар Коле народзени у Вербаше 1955. року. Никола мал брата Йовґена. У основней школи Никола ходзел до рускей класи, бул у остатнєй ґенерациї школярох хтори учели по руски. Никола од малючка любел музику, любел грац и шпивац, та од 9 рокох почал ходзиц и до Музичней школи дзе грал на гармоники. Опробовал ше на вецей музичних инструментох, почал 1971. року на бас приму алє ше, на концу, опредзелєл за ґитару на хторей грал под час своєй музичней кариєри. Почал грац и зберац музичну праксу у ґрупи младих музичарох на танцох у Вербаше и по сушедних валалох у општини.
На одслуженє воєного року пошол до Любляни. До касарнї дзе служел приходзели велї познати музичаре, ґлумци, маляре и вон ше дружел зоз искуснима музичарами, формовали вояцки оркестер та Никола и ту здобувал музични искуства.
Никола Чизмар Коле бул член рижних бендох алє найдлужей остал у оркестре под назву Треца змена. Оркестер бул основани при Доме култури у Вербаше 1985. року и обслужовал наступи фолклорней ґрупи алє мал и окремни репертоар за явни наступи на танцох, на свадзбох и явних сходох. Оркестер бул поволовани з боку тедишнїх Клубох югославянох у жемох Европи дзе наступал з нагоди державних шветох. Оркестер, так, наступел у скоро шицких европских жемох, у Канади и Єгипту.[1]
Никола Чизмар ше оженєл зоз Марию родз. . У малженстве мали синох Томислава и Данила хтори, з оцову подпору, виросли до добрих музичарох.
Никола Чизмар ше уключел до роботи КПД Карпати у Вербаше. Грал у оркестре дружтва а концом 2000. року превжал векшину обовязкох вязаних за орґанизацию оркестра,[2] за репертоар та провадзенє секцийох дружта на наступох. Оркестер КПД Карпати, под руководством Николи Чизмара, наступал на вецей фестивалох у Войводини и БиГ, на велїх манифестацийох у Вербаше, грали на Коцурскей жатви и на Фестивалу култури Червена ружа.
Од єшенї 2007. року Никола Чизмар водзел и Младежску женску шпивацку ґрупу.[2] Никола нєсебично помагал и оркестром у других руских КУД як зоз совитами так и як музичар.
Як искуснєйши музичар Никола Чизмар ше опробовал и як композитор и його даєдни композициї виводзени на руских фестивалох.
Никола Чизмар Коле умар 13. януара 2026. року, у 71. року живота. Поховани є на теметове у Вербаше.
Литература
[ушориц | ушор жридло]- Мартица Тамаш. Любов ґу музики надвладала, новини Руске слово, Рок LXIII, число 22 (3267), Нови Сад, 30. май 2008. б. 11.
Вонкашнї вязи
[ушориц | ушор жридло]- Златка Перович, Живот зоз музику красши и лєгчейши, Ютюб, www.youtube.com, марец 18, 2016.
- Микола Чизмар (1978), Червена ружа 1962-2011, Том II, Завод за културу войводянских Руснацох, Нови Сад, 2014, б. 468.
- РТ Войводина, Умар Никола Чизмар Коле (1955–2026), Рутенпрес, www.ruskeslovo.com, 14. януар 2026.
Референци
[ушориц | ушор жридло]- ↑ Златка Перович, Живот зоз музику красши и лєгчейши, Ютюб, www.youtube.com, марец 18, 2016.
- ↑ 2,0 2,1 Мартица Тамаш. Любов ґу музики надвладала, новини Руске слово, Рок LXIII, число 22 (3267), Нови Сад, 30. май 2008. б. 11.