Национални парк Вирунґа
Национални парк Вирунґа (фр. Parc national des Virunga) национални парк поверхносци 7 800 км2 [1] у восточней часци Демократскей Републики Конґо (Африка) основани 1925. року. Надморска висина парку ше руша од 680 метери у долїни рики Семлики, по 5 109 метери у горох Рувензори. Длужина парку од сиверу по юг 300 километри, и пресцера ше углавним коло медзинародней гранїци зоз державу Уґанду и Руанду на востоку [2].Зоз националним парком Серенґети найпознатши су защицени подруча у Африки.
У парку ше находза два активни вулкани Нїраґонґо и Нямураґира [3] хтори значнєйше оформели рижни бивальнїки дзивих животиньох. Зазначени вецей од 3000 файти рошлїнох и животиньох, од хторих вецей од 300 ендемични файти, як цо то восточна ґорила (Gorilla beringei) и златни маймун (Cercopithecus kandti).[4]
Року 1979. Национални парк Вирунґа положени на Унесков список шветовей културней скарбнїци пре рижнородни бивальнїки, рошлїни и животинї и пре ендемични файти, а тиж и пре защиту бивальнїка горскей ґорили [5]. Тиж так , парк ше находзи на списку шветовей културней скарбнїци у опасносци од 1994. року пре граждански нємири и прилїв вибеженцох зоз сушедней держави, цо спричинєло ловокрадзенє и керченє лєса и його претворйованє до польопривредних поверхносцох.[6] Од 1996. року забити 140 ловаре – чуваре парку.
Природни характеристики
[ушориц | ушор жридло]Национални парк Вирунґа ше находзи у злїве рики Конґо и Нилу и подзелєни є на три административни сектори: сиверни, централни и южни.
Сиверни сектор ше гранїчи зоз националним парком Семулики у Уґанди и националним парком гори Рувензори [2][7][8]. Надморкса висина ше руша од 680 метери у долїни рики Пуемб, по 5 109 метери висини на гори Стенли, и то у рамикох од 30 километри [2]. Сиверни сектор забера 299 523 гектари и то найвеше копново подруче пару, од рики Пуемба по озеро Едвард. У рамикох того сектору и рика Семлики, гори Рувензори и Чиабериму.
Централни сектор облапя заходни и южни побрежя озера Едвард и ровнїни Рвинди – Рутшуру, подруче коло рики Ишаша (гранїца зоз Уґанду). Прокрива 339 000 гектари, од чого 144 548 гектари поверхносц озера Едвард [7].
У южним секторе доминантни гори Вирунґа, хтори високи 4 500 м. Поверхносц того сектору 145 672 гектари зоз осем вулканами, од хторих два активни (Нїраґонґо и Нямураґира) а гора Микено нє активна, та ше ту находзи и єдно з остатнїх защицених подручох за ґорили.
Рошлїнски швет
[ушориц | ушор жридло]Флора националного парку ше состої зоз 2 077 файтох рошлїнох, уключуюци 264 файти древа и 230 рошлїни хтори ендемични за тоти простори. Ровнїни националного парку прекрити зоз мочарами и пажицами дзе рошнє папирус (Cyperus papyrus), над (Phragmites mauritanica)... У горских часцох рошнє африцки алпски бамбус (Yushania alpina), африцка секвоя (Hagenia abyssinica) и други.
Животиньски швет
[ушориц | ушор жридло]У националнимпарку Вирунґа жию 196 файти цицарох, 706 файти птицох, 109 файти шмикачох и 65 файти водожемцох од 2012. року. [4]
Примати хтори присутни у парку то: горска ґорила (G. b. beringei), обични шимпанзо (Pan troglodytes), златни маймун, червенохвости маймун (Cercopithecus ascanius) и други.
Африцки слон (Lokodonta africana), нилски конь (Hippopotamus amphibius) и африцка бияла (Sincerus caffer) населюю централни сектор. Бушбок, файта антилопи (T. scriptus) и джиновска лєсова швиня (Hilochoerus meinertzhageni) присутни у южним секторе.
Национални парк Вирунґа зоз сушедним Националним парком кралїци Елизабети творя „єдинку за защиту лєва” [9]. Подруче наменєне за защиту лєва (Panthera leo), кед ше уда викоренїц ловенє без дозволи и кед ше число єдинкох звекша.
Британска нафтна компания Soco International, после виглєдованьох 2010. року наявела експлоатацию нафти чийо ше резерви находза под Едвардовим озером. Зоз експлоатацию би були загрожени 80 проценти националного парку, а тоспричинєло явне нєзадовольство. [10]Реакция медзинародних орґанизацийох за защиту природи и животного штредку, як и промоция о тим през длуготирваци документарни филм Вирунґа допринєсло тому же би ше шицки активносци експлоатациї випитало пре очуванє рижнородносци рошлїнского и животиньского швета и других вредносцох Националного парку Вирунґа, [11][12][13] прето же анї на єдним другим подручу у Африки нє зазначени таки биодиверзитет.
Литература
[ушориц | ушор жридло]- Marko Kataneo – Jasmina Trifoni, Svetska baština pod zaštitom UNESKA, prirodni rezervati, Izdavač Pravoslavna reč, Novi Sad, 2007. godina, strana 86—89
Референци
[ушориц | ушор жридло]- ↑ "About Virunga National Park: Facts, History & Conservation". Virunga National Park. Retrieved 27 December 2025.
- ↑ 2,0 2,1 2,2 Crawford, A. & Bernstein, J. (2008). MEAs, Conservation and Conflict – A case study of Virunga National Park, DRC. Geneva: International Institute for Sustainable Development.
- ↑ Tedesco, D. (2002). "1995 Nyiragongo and Nyamulagira activity in the Virunga National Park: A volcanic crisis". Acta Vulcanologica. 14 (1/2): 149–155.
- ↑ 4,0 4,1 Plumptre, A. J.; Davenport, T. R.; Behangana, M.; Kityo, R.; Eilu, G.; Ssegawa, P.; Ewango, C.; Meirte, D.; Kahindo, C.; Herremans, M. & Peterhans, J. K. (2007). "The biodiversity of the Albertine Rift". Biological Conservation. 134 (2): 178–194.
- ↑ "Virunga National Park". UNESCO World Heritage Centre. United Nations Educational, Scientific, and Cultural Organization.
- ↑ Debonnet, G. & Hillman-Smith, K. (2004). "Supporting protected areas in a time of political turmoil: the case of World Heritage Sites in the Democratic Republic of Congo". Parks. 14 (1): 9–16.
- ↑ 7,0 7,1 Karumba, Janvier Bagula (2011)."De l'opportunité du développement du tourisme au nord Kivu: Cas de la ville de Goma" The opportunity for tourism development in North Kivu: The case of the city of Goma] (in French). Goma, North Kivu, Democratic Republic of the Congo: Institut Supérieur de Tourisme de Goma (ISTou-Goma). Retrieved 26 December 2025.
- ↑ Mubalama, L. & Mushenzi, N. (2004). "Monitoring law enforcement and illegal activities in the northern sector of the Parc National des Virunga, Democratic Republic of Congo". Pachyderm (36): 16–29.
- ↑ IUCN Cat Specialist Group (2006). Conservation Strategy for the Lion Panthera leo in Eastern and Southern Africa. Pretoria, South Africa: IUCN.
- ↑ WWF, Ukidanje naftnih dozvola, Posted on June, 21 2013,wwf.panda.org
- ↑ Афрички Национални парк Вирунга победио нафташе, приступљено 18.05.2026.
- ↑ Филм Вирунга из 2014. године (језик: енглески) приступљено 18.05.2026.
- ↑ филм Вирунга на фестивалу 7 величанствених у Београду , приступљено 18.05.2026.