Наперсток
Наперсток – (серб. напрстак, укр. напе́рсток, поль. naparstek, рсй. напёрсток) - метална шапочка, щитнїк, хтори ше кладзе на штреднї палєц при шицу. Кед материял грубши або кед игла през нього чежше преходзи, з пальцом на хторим наперсток дриля ше иглу през материял так же ше прициска зоз задню часцу игли.
История – найстариши познати наперсток пренайдзени у розвалянїскох Помпейох у Италиї. Направени є з бронзи, а датирує з 1. вику. Трима ше же ше наперстки почало масовно хасновац у 14. вику.
Голандски продукователь наперсткох Джон Лофтинґ 1693. року почал продуковац наперстки так же як порушуюцу моц хасновал воду. Правел два милиони наперстки рочнє.
Материяли – Наперсток ше нєшка прави зоз желєза або з пластики, алє ше го през историю правело з рижних металох (бронза, челїк, стрибло), зоз скори, ґуми, мрамору, та аж и зоз скла и полцору. Тиж ше их правело и зоз китових и слонових косцох, рогох и под.
Интересантносци – Найдрагши наперстки правени у Майсену, у Нємецкей, зоз полцору хтори бул омальовани ручно. Нєшка таки наперстки на аукцийох досцигую барз високи цени. Наперсток ше хасновало по 18. вик лєм за шице, алє ше познєйше зявели ище даяки применьованя. Єден час ше наперсток хасновало як меру за чечносци (насампредз алкоголу). Проститутки го хасновали за дурканє на облак потенциялним муштерийом. У Анґлиї викториянски професоре з наперстком дуркали глави и так карали нєпослухних школярох.
По 18. вик ше вонкашнї точки за хтори ше заквачи иглу кед ше ю прициска през материял правело ручно, так же ше их вибивало зоз шидлом и млатком, алє после и тоту роботу превжали машини.
Єст колекционерох цо збераю наперстки хтори правени у окремним виданю за важни подїї – ювилейни наперстки. Тоти колекционере ше волаю диґитабулисти. Наперстку дзвигнути и памятнїк високи 9 стопи у Торонту, Канада.
У Першей шветовей войни британска влада зберала наперстки як добродзечне доприношенє од тих „цо нє маю нїч дац“. З предаваньом наперсткох ше куповало гирурґийни инструменти.
Вонкашнї вязи
[ушориц | ушор жридло]- Напрстак. Википедја на српском језику, sr.wikipedia.org