Нада Сабол
| Нада Сабол | |
|---|---|
 | |
| Народзена | 18. фебруара 1954. |
| Умарла | 10. юлия 2018 (64) |
| Державянство | югославянске, сербске |
| Язик творох | руски |
| Школа | ґимназия Жарко Зренянин, Вербас |
| Висша школа | Висша економско-комерциялна школа, Нови Сад |
| Период твоня | 1975—2011. |
| Жанри | спикерство, новинарство |
| Похована | Городски теметов у Новим Садзе |
Нада Сабол (*18. фебруар 1954—†10. юлий 2018), вельорочна спикерка, водителька и новинарка у Радио Новим Садзе и, почасово, на ТВ Нови Сад.
Биоґрафия
[ушориц | ушор жридло]Нада Виславски народзена 18. фебруара 1954. року у Руским Керестуре. Родичи оцец Миронь и мац Ана, родз. Колєсар. Нада мала старшого брата Мироня.
Нада закончела основну школу у Руским Керестуре, ґимназию у Вербаше, а Висшу економско-комерциялну школу у Новим Садзе.
Нада Виславски була одата за Ярослава Сабола, новинара и културного и явного роботнїка, у малженстве мали дзивче Анамарию.
Ище у чаше кед пришла на студиї до Нового Саду, 1974. року, такой ше уключела до роботи Младежскей редакциї, Рускей редакциї, Радио Нового Саду.[1] Замерковани єй приємни глас и добра дикция та о рок достала роботу як спикерка у Рускей редакциї.[2] Окрем спикерских длужносцох, Нада Сабол мала и новинарски задлуженя. Нада Саболова и Микола Дюранїн ушорйовали емисию за роботнїкох на дочасовей роботи у иножемстве. Тота емисия емитована 70-их‚ 80-их рокох, каждого пиятку на 22,40 на штреднїх габох 236,4 метери и добре ше чула вшадзи у Европи.[3]
У Радио Новим Садзе и, почасово, на ТВ Нови Сад,[4] Нада Сабол робела од 1975. року цали свой роботни вик. До пензиї Нада Сабол пошла 2011. року.[5]
Свойочасово, вона була предложена за престижну спикерску награду у СФРЮ „Ґордана Бонети”.
Нада Сабол була член Дружтва за руски язик, литературу и културу од 1977. року.
Нада Сабол умарла 10. юлия 2018. року у Новим Садзе. Похована є на новосадским Городским теметове.
Литература
[ушориц | ушор жридло]- Руски християнски календар 2019. рок, бок 229
Вонкашнї вязи
[ушориц | ушор жридло]- Умарла Нада Сабол, РТВ/Рутенпрес. www.ruskeslovo.com, 12. юлий 2018.
- ИН МЕМОРИАМ - НАДА САБОЛ, Радио телевизия Войводина. rtv.rs/rsn, 11- юлий 2018.
- На нєшкайши дзень, 18 фебруар, В. Вуячич, Рутенпрес. www.ruskeslovo.com, 18. фебруар 2025,
Референци
[ушориц | ушор жридло]- ↑ Ґрупа авторох, „Емисия за младихˮ, Гласи и часи, 70 роки Рускей редакциї Радио Нового Саду, Новинарска асоцияция Руснацох - НАР, Нови Сад 2019, б. 51.
- ↑ Ґрупа авторох, „Члени Рускей редакциї од 1949. по 2019.ˮ, Гласи и часи, 70 роки Рускей редакциї Радио Нового Саду, Новинарска асоцияция Руснацох - НАР, Нови Сад 2019, б.139.
- ↑ Ґрупа авторох, „ Стаємносц и пременки у програмиˮ, Гласи и часи, 70 роки Рускей редакциї Радио Нового Саду, Новинарска асоцияция Руснацох - НАР, Нови Сад 2019, б. 48.
- ↑ Ґрупа авторох, „ Седемдзешати роки у Радио Новим Садзеˮ, Гласи и часи, 70 роки Рускей редакциї Радио Нового Саду, Новинарска асоцияция Руснацох - НАР, Нови Сад 2019, б. 35.
- ↑ Ґрупа авторох, „ Редакцийни живот ˮ, Гласи и часи, 70 роки Рускей редакциї Радио Нового Саду, Новинарска асоцияция Руснацох - НАР, Нови Сад 2019, б. 88.