Музика за танєц

Музика за танєц то музика компонована окреме же би олєгчала лєбо провадзела танєц. Може буц музична композиция лєбо часц векшого музичного аранжмана. Цо ше дотика виводзеня, постоя главни катеґориї:

♦ жива музика за танєц и

♦ знята музика за танєц.

История музики за танєц

Постоя свидоцства и податки о повязаносци танцох и музики зоз старих часох (напр. на старогреческих вазнох, приказани танєчнїки зоз провадзеньом музичарох). Найвчаснєйша заходна музика за танєц хтору ище вше мож репродуковац зоз достаточну сиґурносцу то стари танци. То штредньовиковни танци хтори обстали а то кароли и естампи.

Музика за танєц по епохох

Ренесансна танєчна музика писана за инструменти як цо то лаута, виола, табор, лула, и сакбут. У епохи барока, главни танєчни стили були дворянски танци хтори. Таки приклади уключую французки танци як цо то: куранта, сарабанда, ґавота, менует и жиґа. Зборнїки танцох ше часто зазберовало вєдно до танєчней свити.

Под час класичного периода и єй музики, менует ше часто хасновал як треци став, у нєвокалних дїлох зоз штирома ставами як цо то сонати, смиково квартети и симфониї, у тим контексту нє провадзел би гоч хтори танєц. Музика за танєц наменєна провадзеню танца, а тиж исную подобни музични дїла хтори нє провадза танєц и маю свою уметнїцкуку вредносц. Музику за танєц препознатлїва и характеризує ю високи уровнь танєчносци (ясни ритем, темпо хтори специфични за танєц).

Характеристични прикмети музики за танци инспировали велїх значних композиторох як цо то: Й. С. Бах, Ґ. Ф. Гендл, Л. Бетовен, В. А. Моцарт, Г. Берлиоз, Е. Ґриґ, Ф. Шопен, А. Дворжак, Скрябин, К. Дебиси, М. Лисенко, С. Рахманїнов, Ґ. Малер, И. Стравински, Д. Шостакович, П. Чайковски и други.

Бечски валцер

Валцер тиж настал познєйше у класичней епохи, з оглядом же менует еволуировал до скерца (дослв. преклад „шала”, менует зоз швидшим темпом). Обидва танци остали часц епохи романтизма и романтичней музики, хтори дожили успишни розвой а тиж и други рижнородни национлни форми танцох як цо то баркарола, мазурка, екосеза, балада и полонеза. У периодзе романтичней музики, рост и розвой балета преширел композицию музики за танєц по нови досяги. Часто танєчна музика та и балет були часц опери.

Народна музика за танєц то музика хтора провадзи традицийни танєц и може будз у процивносци зоз историйну/класичну и популарну/комерциялну музику за танєц. Таки приклад народней музики за танєц у Зєдинєних Америцких Державох стара музика хтора ше грає на „квадратних” танцох и контра танцох.

Популарна музика за танєц

Сучасна популарна музика за танєц першобутно настала зоз заходней танєчней и дружтвеней музики позного 19. вику. На початку 20. вику, танци на балох постали популарни медзи роботнїцким сталежом хтори нащивйовали явни танєчни сали. Танєчна музика постала винїмково популарна у цеку 1920-ох. У цеку 1930-их наволана є свинґ ера, свинґ музика була популарна музика за танєц у Америки. Року 1950. рокенрол музика за танєц постал барз популарни и ширел ше швидко по цалим швеце. У цеку позних 1960-тих пришло до успишного розвою соул и Р&Б музики.

Танєц салса

Доминикански и кубански нюйоркшанє концом 1960 -их створели популарни танєц салса хтори настал зоз латино музичного жанра салс. Популарносц и успишни розвой дискотекох вчасних 1970-их допринєсли же би денс музика постала популарна ширшей явносци. До позних 1970-их розвила ше електронска танєчна музика. Така музика створена хаснуюци електронїку, то стил популанрей музики хтора ше емитує у ноцних клубох, радио станїцох, емисийох и рейвох. З часом розвили ше велї под'жанри електронскей танєчней музики.

У 20. вику, денс музика (окреме електронска) здобула вельку популарносц, а комерциялно постала жридло масовней култури.

Жанри

Танєчни музични дїла часто ноша мено одвитуюцих танцох, напр. валцери, танґо, болеро, кан кан, менует, салса, рижни файти жиґох и бреґдаунох. Инши файти танєчних формох уключую контраданс, меренґи (Доминиканска Република) и ча-ча-ча. Часто чежко препознац чи перше мено назва музики чи мено танцу.

Балади найчастейше маю спомалшени темпо за танєц. За балади иснує думанє же су процивни музики за танєц пре єй темпо. Першобутно балада була и файта танцу (отац и назва „балада” од истого кореня слова як „балска сала” и „балет”). Балади ше ище вше танцую на Фарских островох.

Дансбанд

Дансбанд (танєчни бенд) то термин на шведским язику за бенди хтори граю даєдну файту популарней музики, „дансбандсмусик” (музика за танєчни групи), зоз хтору ше танцує зоз партнером. Тоти термини ше почали хасновац коло 1970. року, а скорей того велї бенди були класификовани як поп ґрупи. Тота файта музики углавним популарна у нордийских жемох.

Танцованє салси у ґрупи

Диско музика

Диско то жанр денс музики хтора ма елементи фанка, соула, попа и салси. Диско музика була найпопуларнєйша од штредку та по позних 1970-их, гоч познєйше мала кратке оживйованє. То музичарох инспировало за жанр електронскей танєчней музики.

Електронска музика

По 1981. рок розвива ше нова форма музики за танєц. Тота музика настала дзекуюци хаснованю електронїки, и то стил популарней музики хтора доминує по ноцних клубох за танєчну музику, радио станїцох, рижних емисийох, и рейвох. У цеку свойого опадованя популарносци позних 1970-их рокох, диско музика подпадла под уплїв електронских музичних инструментох як цо то синтисайзери. Перши замерковани подполно синтетизовани диско гит бул I Feel Love Дьордя Мородерия и Пети Белотия зоз текстами Дони Самер. Лупинґ, семплованє и сеґвей як цо ше находзи у дискотекох предлужели хасновац як креативни технїки у транс музики, техно музики и поготов гаус музики.

Електронска танєчна музика дожила верх розвою позних 1980-их. У Велькей Британиї, тото ше манифестовало у танєчним елементу Хациенда сцени Тония Вилсона (у Манчестеру) и лондонских клубох як цо то Делириюм, Трип и Шум. Сцена ше швидко розширела на Лєто любови у Ибизи, хтора постала европска престолнїца гауса и транса.

Сучасни танєц

Велї музични жанри хтори хасновали електронски инструменти розвили ше до сучасних стилох углавним дзекуюци MIDI протоколу, хтори оможлївюю рахункаром, синтисайзером, звучним карточком, семплером и бубньом же би медзисобно комуниковали и посцигли подполну синхронїчносц звукох. Електронска танєчна музика ше обично компонує помоцу синтисайзера и компютера, а ридко ма даяки физични инструменти. Место того, тото заменєне зоз аналоґнима и диґиталнима електронскима звуками, зоз миру 4/4 такта (4 дуркнуца у такту). Медзитим, велї продуценти тей файти музики, як цо то Дарен Тейт и MJ Cole, мали знаня зоз класичней музики скорей як цо прешли на електронски медиюм твореня.

Литература

• Юцевич Юрій Євгенович , Музика: словник-довідник. — Тернопіль, 2003. — 404 с. — ISBN 966-7924-10-6.
• Adshead-Lansdale, J., ур. (1994). Dance History: An Introduction. Routledge. ISBN 0-415-09030- X
• Charman, S. Kraus, R, G. Chapman, S. and Dixon-Stowall, B. (1990). History of the Dance in Art and Education. Pearson Education. ISBN 0-13-389362-6.
• Dils, A (2001). Moving History/Dancing Cultures: A Dance History Reader.

Вонкашнї вязи

• Међународни научни скуп „Музика и плес на осовини Исток–Запад: Односи и мобилности”, Музиколошки институт САНУ Music.sanu.ac.rs
• Disco All Music
• Philly Soul[ https://en.wikipedia.org/wiki/ AllMusic] Retrieved 14 May 2025