Молитвенїк

Молитвенїк то богослужебна кнїжка хтора доприноши духовней и етичней формациї вирнїкох. Єст велї рижни виданя и по випатрунку и по змисту.

У молитвенїкох заступени богослужебни тексти Служба Божа, утриня, вечурня, молебени, акафисти, панахида, тропари и кондаки. Часто у тей кнїжочки и катакиз, духовни писнї, у першим шоре коляди.

Перши молитвенїки при Руснацох

Зоз приселєньом до Бачкей, а познєйше и до Сриму, Руснаци зоз собу принєсли и состойну часц свойого живота, та так и церковни кнїжки. Були то требнїки, акафисти, молитвенїки, та и библиї.

Тоти кнїжки ше нє хасновало лєм за духовне читанє, алє були и перши буквари и читанки. Зоз нїх ше виучовало букви и слова и на таки способ ше писменосц у нашим народзе дзвигало на висши уровень.

◆ Перши молитвенїк за наш народ и на нашей бешеди, на нашей бачваньско-сримскей бешеди хтори Руснаци читали то молитвенїк з насловом „Христiянскй Вояк”, кнїжочка на науку, молитву и пoтїху грекокатолїцким руснацким вояком (Заґреб, 1916, парох о. Спиридон Петранович, боки 158). Змист молитвенїка: I Цо маме знац и вериц, II Цо маме робиц, III А цо христiянски вояк, IV Молитви, V Длужносци христiянина, VI Додаток.

◆ Други молитвенїк написал снователь РНПД о. Дюра Биндас, з насловом „Молитвенїк за руски дзеци” (видало РНПД, друкарня Просвити, Руски Керестур, 1938, боки 224). То молитвенїк зоз молитвами раншима, вечаршими, єдна часц катакизму, Служба Божа св. Йоана Златоустого (друкована зоз старославянскима буквами), тропари, кондаки, Молебен у Богородици, коляди, писнї и як ше модлї ружанєц.

◆ Треци молитвенїк пририхтал и дал на друкованє, аж по Другей шветовей войни, керестурски парох о. Михайло Макай, з назву „Отче наш” (Руски Керестур, 1970, друкарня Руске слово, боки 256). Змист того молитвенїка: Катехетна часц, молитви ранши, вечарши, каждодньово, Пацерки, тропари воскресни, дньово, молебен Исусови, Богородици, панахида, коляди.

Ґалерия

Ватикански горватски молитвенїк

Литература

Дзвони, християнски часопис, януар 2005. протоєрей ставрофор о. Йоаким Холошняй
Церковни литурґийно литурґични лексикон, бок 204, о. др Роман Миз
Володимир Нота, Християнски календар, 1974. рок, бок 82-83