Младен Яґушт
| Младен Яґушт | |
|---|---|
| Ту будзе слика | |
| Датум народзеня | 10. децембер 1924. |
| Датум упокоєня | 29. юлий 2025 (101 рок) |
| Державянство | югославянске, сербске |
| Школа | ґимназия |
| Висша школа | Музична академия, Заґреб |
| Период твореня | 1945-2016. |
| Жанри | Дириґент, професор, малярство |
| Поховани | у Беоґрадзе |
| Припознаня | Октоберска награда Нового Саду (1968), Октоберскa наградa города Беоґрада, Вуковa наградa, Наградa Здруженя композиторох Югославиї, Награда за животне дїло. |
Младен Яґушт (Суня, 10. децембар 1924 — Беоґрад, 29. юлий 2025) бул єден зоз найвизначнєйших дириґентох у Сeрбиї. Искусни хорски, оперски, симфонийни и ораториюмски дириґент медзинародного реномеа.
Народзел ше у Сунї нєдалєко од Сиска (Горватска), од 6. рокох почал учиц грац на виолини а попри основней школи учел грац и на клавиру. Єден период пре Другу шветову войну зоз родичами пребувал у Краґуєвцу алє ше познєйше з фамелию врацели до родного места. Наставел далєй музичне школованє а 1943. року закончел и ґимназию у Сиску). Опредзелєл ше за професию фахового музичара и на Заґребацкей Музичней академиї уписал ше на оддїл дириґованє. Бул студент професора и дириґента Фридриха Цауна при хторому дипломовал 1949. року. [1] Свойо практичне оспособйованє за дириґентске поволанє започал ище 1945. року зоз хором „Иван Ґоран Ковачич” хторого и основал. Потим робел зоз Камерним хором Радио Заґреба, а тиж бул корепетитор и дириґент заґребацкей Опери. Руководзел зоз хором и оркестром Уметнїцкого ансамбла Дома ЮНА у Беоґрадзе у периодзе 1957-1966, а дириґент и директор Опери зоз Балетом Српского народного театра од 1 юлия 1966. по 31 децембера 1970. У тим периодзе (1968) додзелєна му Октоберска награда Нового Саду. После одхода зоз Нового Саду, бул дириґент и шеф Симфонийней оркестри и хора РТВ у Беоґрадзе.[1]
Добитнїк є Октоберскей награди города Беоґрада, Вуковей награди, а награду Здруженя композитора Югославиї достал за виводзенє дїлох домашнїх авторох-композиторох и за знїмки тих виводзеньох (Коштана, Охридска леґенда, як и комплетни опус Стевана Ст. Мокраньца)[1]. Робел и бул активни и як порядни професор на Академиї уметносцох у Новим Садзе и Факултету музичней уметносци у Беоґрадзе, а за анґажованосц зоз оркестру новосадскей Академиї достал и Награду за животне дїло.
Дириґент Младен Яґушт мал коло 1000 наступи, госцовал у велїх варошох у швеце: у Австриї, Белґиї, Анґлиї, Италиї, Канади, Куби, Мадярскей, Мароку, Нємецкей, Польскей, Русиї, Румуниї, Швайцарскей и України, тиж и у шицких векших центрох бувшей Югославиї.
Свою 80 рочнїцу живота и 60 роки уметнїцкей роботи означел зоз виводзеньом познатого Реквиюма Дюзепа Вердия у Центре Сава у Беоґрадзе 19 новембра 2004.
Остатнїраз дириґовал зоз Симфонийним оркестром и хором РТС-а Нємецки реквиєм композитора Й. Брамса у концертней сали Коларац (Задужбина Илиї Коларца) у Беоґрадзе 24 децембра 2016. року у 92-им року живота.
Винїмкови дириґент-уметнїк, мал таланта ище за єдну уметносц а то малярство. Мальовал од дзецинства а поготов у заднєй децениї живота кед уж нє дириґовал и бул у пензиї, та по конєц живота покля ше могол виражовац зоз фарбами Так же за собу охабел и вельо намальовани слики.
На репертоару хтори Яґушт дириґовал находза ше понад 140 композициї зоз шицких епохох, хторим вон удатно зоз своїм дириґованьом з рижнороднима професийнима ансамблами удиховал нови живот.
Велї ше здогадую його познатих словох: „Вкупносц найкрасше розпоредзених нотох у композициї то ипак лєм єдноставни нотни знаки-мертве слово на паперу, док тоти ноти дахто нє одграє лєбо нє одшпива. А кед то зроби, на нєдосяжни и нєпохоплїви способ, заслужує шицки тутейши жемски припознаня. То нє лєм репродукция слики, алє зоз каждим виводзеньом, нове творче збуванє и дожице, нова дїя.”
Младен Яґушт ше упокоєл 29 юлия 2025. року у Београдзе, у своїм 101 року, дзе є и поховани.[2]
Вонкашнї вязи
[ушориц | ушор жридло]- Mladen Jаgušt ŽIVOT I KARIJERA: Mladen Jagušt youtube.com
- Филхармонија свира за 90. рођендан Младена Јагушта („Блиц“, 7. новембар 2014)
- Љубав се данас мери ценом мобилног телефона – интервју („Политика”, 6. мај 2017)
- Маестро са бројним талентима politika.rs
- Dirigent Mladen Jagušt youtube.com
Референци
[ушориц | ушор жридло]- ↑ 1,0 1,1 1,2 Млaден Јaгушт Енциклопедија Српског народног позоришта. Приступљено 21. 1. 2019.
- ↑ Umro poznati srpski dirigent Телеграф. Приступљено 29. 7. 2025. sr.wikipedia.org]