Михал Чабала

Михал Чабала
Назвиско	Мишко
Датум народзеня	4. фебруара 1941.
Датум упокоєня	2. авґуста 2002 (61)
Державянство	словацке
Школа	Штредня уметнїцка школа, Брня, Ческа
Универзитет	Висока школа применєних уметносцох, Братислава
Период твореня	1962-2002.
Жанри	пейзаж, портрет
Поховани	У Прешове

Михал Чабала (*4. фебруар 1941-†3. авґуст 2002), академски маляр русинского походзеня, єден з найвизначнєйших русинских малярох у Словацкей у другей половки ХХ вику.

Биоґрафия

Михал Чабала ше народзел 4. фебруара 1941. року у валалє Нїзши Чабини, нєдалєко од Медзилаборцох. Закончел Штредню уметнїцку школу у Брнї у Ческей (1958-1962 и Високу школу применєних уметносцох у Братислави у Словацкей (1963-1969) дзе студирал под надпатрунком професорох Дезидерия Милого, Русина по походзеню, Мудрохо и Матєйки.

Уметнїцка кариєра

По законченю штреднєй школи кратши час робел як пропаґандни илустратор у Музею українскей култури у Красним Броду. По законченю високей школи преподавал подобову уметносц у Трнави, вец на Универзитету П. Й. Шафарика у Прешове а од 1972. року постал шлєбодни уметнїк.

Жил и творел у Прешове. З початку у творчосци Михала Чабали були найчастейше фиґурални композициї з балету и театру и портрети, познєйше ше баржей унапрямел на мальованє природних предїлох, менших шаришских населєньох и побочних местох хтори були населєни углавним зоз Русинами у восточней Словацкей.

Пейзажи и портрети Михал Чабала мальовал у импресионистично-експресивней технїки хтору характеризовал меланхолични лиризем хтори вон витворйовал з комбинацию рижних ниянсох белавей и желєней фарби. Його монументални роботи краша явни будинки у даскелїх местох и валалох восточней Словацкей.

Звучни запис

Михал Чабала: Михал Бицко Приповедка о М. Чабалови хтору порихтал знавец уметносци Михал Бицко (30 мин.)

Михал Чабала участвовал у шицких колективних виставох русинских уметнїкох хтори ше одбули после 1989. року.

Вон бул, як уметнїк и явна особа, у контакту зоз особами зоз русинского руху, часто бул у дружтве и дискусийох зоз Васильом Туроком, Федором Вицом и другима русинскима предняками.

Михал Чабала бул од 1974. року член Союзу словацких подобових уметнїкох. Його творчосц була презентована на 60 колективних и на 6-ох персоналних виставох. Остатня його колективна вистава була у Шаришскей ґалериї у Прешове, а остатня персонална вистава му була з нагоди його 60-ого року живота у Музею модерней уметносци Ендия Вархола у Медзилаборцох.

Михал Чабала умар 2. авґуста 2002. року у Прешове.

Марта Геричкова зоз Шаришскей ґалериї по його упокоєню так о нїм гварела:

„Бул то остатнї боем прешовскей творчей сцени”.

Михал Чабала остал запаметани и по даєдних думкох вязаних за його уметносц.

„Кажде сце буц модерни та сом себе так гварел: Добре, нє будзем модерни як Пикасо, алє будзем свой, Мишко Чабала.”

„До партиї ме нїхто нє волал, я сам нє мал за таке нїяке интересованє а, на концу конца, цо би партия мала од Мишка Чабали хтори нє зна нїч робиц, лєм мальовац?”

Основни дїла

Балет (1969)

Пейзаж (1974)

Автопортрет (1978)

Млада учителька (1979)

Меланхолични пейзаж (1981)

Нїзши Комарнїк (1981)

Остурня (1983)

Портрет дзивчеца у народним обвлєчиве (1984)

Чесц проф. Мудрохови (1984)

Ґалерия

• 
  Предїл при валалох Горнї и Долнї Чабини
• 
  Дзивка у народним облєчиве
• 
  Портрет нєпознатей жени
• 
  Пред уходом до валалу
• 
  Жима на Попрадзе

Литература

• Владислав Грешлик: Чабала Михайло //Краєзнавчий словник русинів-українців. Пряшівщина. Упорядник Федір Ковач. — Пряшів: СРУСР, 1999. ISBN 80-85137-15-1 укр. с. 369
• Олександр Зозуляк: Михайло Чабала (Michal Čabala) //Енциклопедія історії та культури карпатських русинів. Укладачі Маґочій П. Р., Поп І. — Ужгород: Вид-во В. Падяка, 2010. — 856 c.+ХХХІІ с. ISBN 978-966-387-044-1 укр. с. 798

Вонкашнї вязи

• Петро Медвідь (4. 2. 2021). Перед 80-ма роками народив ся Михал Чабала.
• Александер Зозуляк (3. 2. 2021). Недожытых 80 років од народжіня русиньского маляря на Словакії – Михала Чабалы