Михайло Биндас
| Михайло Биндас | |
|---|---|
 | |
| Назвиско | Мишел |
| Датум народзеня | 5. децембра 1946. |
| Датум упокоєня | 22. септембра (79) |
| Державянство | югославянске, сербске |
| Язик творох | руски |
| Школа | Ґимназия, Нови Сад |
| Универзитет | Журналистика (позарядово), Заґреб |
| Период твореня | 1974-2011. |
| Жанри | новинарство, редактура, култура |
| Поховани | на теметове у Руским Керестуре |
Михайло Биндас (*5. децембер 1946-†22. септембер 2025), радийски и телевизийски новинар.
Биоґрафия
[ушориц | ушор жридло]Михайло Биндас ше народзел 5. децембра 1946. року у Руским Керестуре. Оцец Дюра и мац Амалия родз. Канюх. Михайло мал младшу шестру Виру.
Перши пейц класи Основней школи Михайло Биндас закончел у Руским Керестуре, а Основну школу и Ґимназию у Новим Садзе. Абсолвовал Югославянску литературу на Филозофским факултету, тиж у Новим Садзе. Позарядово закончел студиї журналистики у Заґребе, як стипендиста Радио Нового Саду. Як студент бул активни у новосадским КУД Максим Горки дзе бул замерковани як член фолклорней секциї. Наступал вецей сезони як член старшей виводзацкей ґрупи.
У Рускей редакциї Радио Нового Саду Михайло Биндас почал робиц 1968. року, гонорарно, на младежских емисийох, а под час студийох ушорйовал боки студентского часописа Индекс. Од 1974. року бул урядово заняти у РНС,[1] а до пензиї пошол кед наполнєл 65 роки, 2011. року.
Робел на емисийох репортажного характеру, бул заменїк и помоцнїк главного и одвичательного редактора програми на руским язику Радио Нового Саду, редактор емисийох Културна панорама, Нащивели зме[2] и Аґенция, подїя, надїя, ушорйовал шицки емисиї хтори теди исновали на програми на руским язику Радио Нового Саду, бул редактор информативних емисийох и окончовал шицки други новинарски задатки и роботи. Сотрудзовал и зоз редакциями других националних заєднїцох Радио Нового Саду.
Михайло Биндас бул оженєти зоз Марию родз. Гарди, у малженстве мали сина Дюру.
Михайло Биндас достал награду Светозар Маркович за телевизийски документарни филм – репортажу зоз тему Роботнїцки рух у Вербаскей општини медзи двома войнами, а до пензиї пошол зоз рочну радийску награду РТВ.
По своїх опредзелєньох Михайло Биндас бул цалого животa прихильни українскей ориєнтациї медзи войводянскима Руснацами.
Михайло Биндас ше упокоєл 22. септембра 2025. року у своїм 79. року живота а поховани бул 24. септембра на теметове у Руским Керестуре.
Ґалерия
[ушориц | ушор жридло]-
Танєчнїки КУД Максим Горки з Нового Саду. Стоя: М. Медєши, нєпозната, нєпозната, Владимир Владуш Колбас, нєпозната, нєпозната, Мартица Страценски. Куча: Мирослав Мико Страценски, Янко Гудак, Михайло Саламун, Михайло Биндас, нєпознати, Михайло Будински. -
Преславйованє 1. мая 1953. року у друкарнї Руского слова. Стоя, з лїва: Любо Малацко, Любомир Такач зоз дзивчецом Олґу, Олґа Такач, Мария Виславски, над ню Дюра Биндас мл, Цецилия Колєсар, Єфрем Колєсар, Янко Дудаш, Яким Варґа Лемко, под нїм Янко Джуня Борец, Янко Виславски, нєпозната, за ню нєпознати, Томислав Рац. Куча: нєпозната, Дюра Дудаш, мали Боґдан Виславски, Янко Будински Бруґош, Гавриїл Колєсар, Нада Сеґеди, Витомир Бодянєц, мала Любка Такач, Василь Мудри, Мижо Биндас, Яким Роман, Весна и Борис Ердельово, Яким Джуня и Юлин Рац.
Литература
[ушориц | ушор жридло]- Ґрупа авторох, „Култураˮ, Гласи и часи, 70 роки Рускей редакциї Радио Нового Саду, Новинарска асоцияция Руснацох - НАР, Нови Сад 2019, б. 60.
Вонкашнї вязи
[ушориц | ушор жридло]- Упокоєл ше Михайло Биндас (1946 –2025) А. Папуґа и В. Вуячич. Рутенпрес, 23. септембер 2025.
Референци
[ушориц | ушор жридло]- ↑ Ґрупа авторох, „Члени рускей редакциї од 1949. по 2019.ˮ Гласи и часи, 70 роки Рускей редакциї Радио Нового Саду. Новинарска асоцияция Руснацох - НАР, Нови Сад 2019, б. 139.
- ↑ Ґрупа авторох, „Седемдзешати роки у Радио Новим Садзе.ˮГласи и часи, 70 роки Рускей редакциї Радио Нового Саду. Новинарска асоцияция Руснацох - НАР, Нови Сад 2019, б. 29.