Михаил Афанасиєвич Булґаков

Михаил Афанасиєвич Булґаков
	Михаил Булгаков 1937
Особни податки
Датум народзеня	15.05.1891.
Место народзеня	Києв, Русийска империя
Датум упокоєня	10.03.1940. (48 роки)
Место упокоєня	Москва, Совєтски Союз
Язик творох	русийски
Образованє	Перша києвска ґимназия Медицински факултет, Києвски универзитет
Занїманє	лїкар, писатель, драматурґ, режисер
Познати по	Написал роман Майстор и Марґарита
Поховани	Новодевичански теметов, Москва
Подпис

Михаил Афанасиєвич Булґаков (рус. Михаи́л Афана́сьевич Булга́ков; Києв, 15. май 1891 – Москва, 10. марец 1940.) бул русийски писатель, драматурґ и театрални режисер^[1]. Писал на русийским язику. Автор є велького числа приповедкох, фельтонох, театралних фалатох, драматизацийох, филмских сценарийох и оперскох либретох. Найпознатши є по роману Майстор и Марґарита, обявеним постгумно, котри представя єдно од ремек-дїлох 20. вику.

Биоґрафия

Дзецинство и младосц

Михаил Булґаков ше народзел 15. мая 1891. у фамелиї професора Києвскей духовней академиї Афанасия Ивановича Булґакова и його жени Варвари Михайловней Булґаковей (дзивоцки Покровскей) у Києву.^[2] У фамелиї було седмеро дзеци: Михаил, Вера, Надежда, Варвара, Николай, Иван и Елена.

Михаил Булґаков 1909. року закончел Першу києвску ґимназию и потим ше уписал на медицински факултет Kиєвского универзитету.

Першираз ше оженєл зоз Татяну Николаєвну Лапе 1913. року. Проблеми зоз пенєжом почали уж на дзень свадзби, цо мож пречитац у здогадованьох Татяни Николаєвней: „Розуми ше, нє мала сом анї шлаєр-якош сом страцела шицок пенєж цо оцец послал. Мац пришла на винчанє и була запрепасцена. Мала сом зранцавену лєнову сукню; мац ми купела блузну.“ Татянов оцец им посиалал 50 рублї мешачно, цо у тот час була цалком пристойна сума. Алє, пенєж им швидко нєставал, понежє Булґаков бул спонтана особа и нє любел шпоровац. Кед би надумал же му потребна такси превозка, потрошел би и останю рублю на тото нє роздумуюци.

Кед почала Перша шветова война Булґаково були на одпочивку у госцох у фамелиї Лапа, у варошу Саратов. Там Михаил помагал у орґанизованю шпиталя, а потим даскельо мешаци робел на русийско-австрийским фронту як хирурґ. Кед ше врацел до Києва, поднєсол вимогу за упис до реґистру як звичайни лїкар (лїкар без дипломи) и бул прияти до шпиталю Червеного Крижа у Печерску.

Кед положел испити зоз барз добрим успихом, Булґаков достал диплому медицини у априлу 1916. року и розпоредзени є до воєного шпиталю у Каменец-Подольским, а потим у Черновцох, дзе робел даскельо мешаци. После того послати є же би робел у валалу Никольское у Смоленскей ґуберниї. Од септембра 1917. року робел у шпиталю у Вязми.

Року 1917. Булґаков почал писац серию кратких приповедкох Призначки младого лїкара, котри першираз обявени 1925. – 1926. року. Того року почал хасовац морфиюм же би олєгчал алерґийни реакциї орґанизма на лїк процив дифтериї, хтори вжал после оконченей операциї особи котра мала тоту хороту, а вон ше злєкол же ше заражел.^[2] После того, хаснованє морфиюму постало порядне. Тот його стан описани у приповедки Морфиюм, законченей 1927. року.

У октобре 1917. року Булґаков першираз пошол до Москви, нащивиц свойого бачика, познатого московского лїкара-ґинеколоґа Н.М. Покровского, котри постал прототип професора Преображенского зоз приповедки Псово шерцо. Вєшєнї 1918. року Булґаков ше врацел до Києва и почал приватну праксу як венеролоґ. Того року престал хасновац морфиюм. Под час гражданскей войни у Русиї, у фебраре 1919. року, Булґакова мобилизовали як воєного лїкара до войска Українскей народней републики.

У составе Трецей Терскей козацкей пуковниї борел ше на Сиверним Кавказу. Активно обявйовал у новинох (статя Будуци перспективи). Под час поцагованя Доброволєцкей армиї початком 1920. року нє пошол до Ґрузиї, алє остал у Владикавказу прето же охорел од тифусa.^[2]

Роки творчосци

Концом септембра 1921. року Булґаков ше преселєл до Москви и почал сотрудзовац як писатель фельтонох за московски новини (Гудок, Труд и Рабочий) и часописи (Медицинский работник, Россия и Возрождениe). Теди даєдни дїла обявел и у новинох Накануне котри виходзели у Берлину. Од 1922. по 1926. у новинох Гудок були обявени вецей як 120 репортажи, есеї и фельтони котри написал Булґаков.

Року 1923. Булґаков постал член Всерусийского союзу писательох (рус. Всероссийский Союз писателей). 1924. року упознал Любов Белезерску котра ше праве врацела зоз иножемства и котра 1925. року постала його друга жена.

У октобре 1926. року у Московским Уметнїцким театре (рус. Моско́вский Худо́жественный теа́тр, сокр. МХТ) з вельким успихом отримана представа Днї Турбинових, котра була забранєна такой шлїдуюцого дня прето же партийни идеолоґове твердзели же драма идеализує малогражданство, алє Сталїн на концу особно подписал допущенє за приказованє представи. У исти час ше у Совєтскей преси ширела интензивна и оштра критика творчосци Михаила Булґакова. Концом октобра 1926. у державним академским театре Вахтанґов з вельким успихом приказана и представа Зойков квартель.

Року 1928. МХТ-у придата представа Сцеканє, дїло о людзох уцагнутих до форґову револуциї котри у тим страцели свою оцовщину. Главрепертком (главни комитет за репертоар) два раз забранєл представу ,а на бокох периодичних виданьох часописох пооштрела ше кампаня процив Булґакова и Сцеканя.

Истого року при Булґакову ше родзели думки о роману котри познєйше будзе наволани Майстор и Марґарита , а започал и роботу на драми о Молиєрови под назву Кабала святительох.

У 1929. року упознал Елену Шиловску, котра 1932. року постала його треца и остатня жена.^[2] Од 1930. року дїла Булґакова були забранєни за виводзенє, представи поцагнути зоз репертоару,^[1] алє од януара 1932. Сталїн ознова допущел виводзенє представи Днї Турбинових. Медзитим, анї єдєн театер, окрем МХТ-а, нє сцел представу положиц на репертоар. Року 1936. Булґаков почал робиц у Большой театру як либретист и прекладатель.

Хорота и шмерц

Року 1939. Булґаков робел на либрету Рашел, а тиж и на дїлу о Сталїнови Батум. Його здравє ше почало нагло погоршовац. Дияґноза була гипертензивна нефросклероза (очкодованє покруткох як пошлїдок длуготирвацого и нєконтролованого високого прициску). Ознова брал морфиюм же би зменшал болї. У тим периодзе почал диктовац супруги остатню верзию романа Майстор и Марґарита. Роман першираз обявени аж 1966. року у часопису Москва 26 роки после писатльовей шмерци, а принєсол му шветову славу.

Од фебруара 1940. року приятелє и фамелия нєпреривно дежурали при посцелї писателя. Булґаков умар 10. марца 1940. року.^[2] Моковски скулптор Серґей Меркуров знял посмертну маску зоз писательовей твари, а потим цело кремиране. Його прах поховани на Новодевичанским теметове, а на гробе, дзекуюци його супруги, поставени камень волани Ґолґота, котри ше скорей того находзел на Ґоґольовим гробе.

Дїла

Приповедки и романи

Дожица Чичикова (рус. Похождения Чичикова), поема зоз 2 чинох, зоз прилоґом и епилоґом, 1922.
Била ґарда (рус. Белая гвардия), роман, 1922-1924
Дяболияда (рус. Дьяволиада), приповедка, 1923
Призначки на манжетох (рус. Записки на манжетах), приповедка, 1923
Ґримизне острово (рус. Багровый остров), приповедка видата у Берлину 1924
Фатални вайца (рус. Роковые яйца), приповедка, 1924
Псово шерцо (рус. Собачье сердце), приповедка зоз 1925., у Совєтским Союзу видата аж 1987.
Вельки канцелар.Княз цмоти (рус. Великий канцлер. Князь тьмы), часц скици романа Майстор и Марґарита, 1928-1929
Копито инженєра (рус. Копыто инженера), роман, 1928-1929
Тайному товаришови (рус. Тайному другу), нєзакончена приповедка, 1929, у Совєтским Союзу видата 1987
Майстор и Марґарита (рус. Мастер и Маргарита), роман, 1929-1940, у Совєтским Союзу видавани 1966-1967, у цалосци 1973.
Живот пана де Молиєра (рус. Жизнь господина де Мольера), роман, 1933, у Совєтским Союзу видати 1962.
Театрални роман (рус. Театральный роман), Призначки покойного (рус. Записки покойника), нєдокончени роман, 1936-1937, у Совєтским Союзу видати 1965.

Театрални фалати, либрета, филмски сценариї

Зойков квартель (рус. Зойкина квартира), драма, 1925, у Совєтским Союзу виведзена 1926., вишла у масовней штампи 1982.
Днї Турбинових (рус. Дни Турбиных), драма написана на основи романа Била Ґарда 1925, у Совєтским Союзу виведзена 1925., вишла у масовней циркулациї 1955.
Сцеканє (рус. Бег), драма, 1926-1928
Ґримизне острово (рус. Багровый остров), драма, 1927., у Совєтским Союзу видата 1968.
Кабала святительох (рус. Кабала святош), драма, 1929. (у СССР-у виведзена 1936.), 1931. цензура допущела виводзенє зоз вельо скрацованями под назву Молиєр, алє и у такей форми приказованє було одложене
Адам и Ева (рус. Адам и Ева), драма, 1931
Малоумни Журден (рус. Полоумный Журден), драма, 1932., у Совєтским Союзу видата 1965.
Блаженство (сон инженєра Рейна) (рус. Блаженство (сон инженера Рейна)), драма, 1934., у Совєтским Союзу видата 1966.
Ревизор (рус. Ревизор), филмски сценарио, 1934.
Остатнї днї (Александар Пушкин) (рус. Последние дни (Александр Пушкин)), драма, 1935., у Совєтским Союзу видата 1955.
Нєзвичайна подїя, або Ревизор (рус. Необычайное происшествие, или Ревизор), драма по комедї Николая Ґоґоля, 1935.
Иван Василєвич (рус. Иван Васильевич), драма, 1936
Минин и Пожарски (рус. Минин и Пожарский), либрето за оперу, 1936. ,у Совєтским Союзу видати 1980.
Чарне морйо (рус. Чёрное море), либрето за оперу, 1936., у Совєтским Союзу видати 1988.
Рашел (рус. Рашель), либрето за оперу по мотивох новели Мадемоиселле Фифи Ґия де Мопасана, 1937-1939, у Совєтским Союзу видати 1988.
Батум (рус. Батум), драма о младосци Сталїна, першобутно наволана Пастир (рус. Пастырь), 1939., у Совєтским Союзу видата 1988.
Дон Кихот (рус. Дон Кихот), либрето за оперу по роману Миґела де Сервантеса, 1939.

Булґаков тиж бул автор числених новелох ( Аритметика, Вочи 3. дня, Як вон пошалєл, Я забил, Морфиюм, Штири портрети...) и фельтонох (Малженска катастрофа, У карчми, Будуци перспективи, Дзень нашого живота...).