Митра (владикова коруна)
(За друге значенє опатрице бок Митра (вецейзначна одреднїца))
Митра (греч. μίτρα, укр. митра, слц. mitra) пас, шал зоз хторим ше окруца главу, шапка; венєц або коруна хтору владикове або и даєдни священїки кладу на главу под час богослуженя. Митра символично представя закривач за главу старозавитних священїкох, алє и церньову коруну хтору ношел Христос.
Митри у вчасним християнстве иншак випатрали. Кед спаднул Царгород 1453. року, венєц императора прешол на главу васелєнског патриярха, як верховного чувара православя. Так митру у форми коруни прияли з Царгороду други патриярхове и епископове ширцом православного швета.
Опис
[ушориц | ушор жридло]Митра то розкошно урашена шапка. Украшена є зоз иконами, драгоциним каменьом, вишита зоз златом и стриблом. Владическа митра ма на верху крижик, а митра митрофорних протоєрейох без крижика.
Симболика
[ушориц | ушор жридло]Митра означує нє лєм архиєрейске достоїнство, алє и покорносц архиєрея Євангелиї Христовей. То приказане так же ше на митру, як и на пристолну Євангелию, кладзе подоби Христа, Богородици и євангелистох. Симболично означує Христов церньов венєц, алє ма значенє и царского венца (коруни).Та и венцох молодятох при винчаню. Царски венєц означує царску власц, венци при винчаню означую младежску власц родзиц и воспитовац свойо потомство, а владически венєц ‒ митра означує владическу власц над своїм священством и епархиянами.
Литература
[ушориц | ушор жридло]- Словнїк руского народного язика I, А – Н, Нови Сад 2017, б. 723.
- Дзвони, юний 2003, рок, Протоєрей ставрофор о. Йоаким Холошняйv
- Дзвони, марец – април 2006 рок, Протоєрей ставрофор о. Йоаким Холошняй
Вонкашнї вязи
[ушориц | ушор жридло]- DJAKONSKA ODEZDA, Radmila Misev
- Митра (одежда), Википедија на српском језику, Немањам, sr.wikipedia.org, 21. фебруар 2006.