Мирон Канюх

Мирон Канюх
Датум народзеня	9.новембра 1943.
Датум упокоєня	6. юния 2022 (79)
Державянство	мадярске, югославянске, сербске
Язик творох	руски, сербски
Школа	ґимназия, Вербас и Нови Сад
Универзитет	Филозофски факултет, ґрупа математика (перши ступень), Нови Сад
Период твореня	1968—2010
Жанри	литература, театер, културна дїялносц
Поховани	на Новим теметове у Новим Садзе
Припознаня	Награда Невен Награда Светозар Маркович Искри култури КПЗ Войводини

Мирон Канюх (*9.новембер 1943—†6. юний 2022), писатель, културни дїяч, ґлумец и режисер-аматер.

Биоґрафия

Мирон Канюх ше народзел 9.новембра 1943. року у Дюрдьове. Оцец Мирон (1914-1962), тарґовец, мац Зорка (Гайналка), дзивоцке презвиско Турински. Мирон мал младшу шестру Марию. Основну школу закончел у Дюрдьове и у Руским Керестуре (1950-1958), ґимназию у Вербаше и Новим Садзе (1959–1962) и перши ступень Филозофского факултета, ґрупа математика, у Новим Садзе (1966).

Робел як прекладатель у Скупштини САП Войводини (1968), потим як руководитель у КУД Максим Горки у Новим Садзе (1971–1972), вец як новинар у тижньових новинох Руске слово (1973–1978), а потим як редактор у Видавательним оддзєлєню НВРО Руске слово (1978–1984) и на други завод (1987), вец як секретар Предсидательства Скупштини Дружтва писательох Войводини (1984–1986). Потим робел як режисер Драмскей програми Радио Нового Саду (1988–1992).

Од 1993. року Мирон Канюх робел як директор приватного подприємства Finesse у Раковцу, а од 1996. року як директор Акционерского подприємства Плантажа Нови Сад. После того и надалєй остал у приватним бизнису.

Мирон Канюх бул оженєти зоз Наталию родз. Гербут, у малженстве мали дзивку Соню и сина Мирослава.

Драга од писателя...

Мирон Канюх писал поезию, прозу, театрални фалати и радио драми. Вон спада до шору афирмованших руских писательох хтори з часцу своєй творчосци вдерели фундаменти модернизма у литературней творчосци Руснацох. Зоз свою литературну творчосцу Мирон Канюх ше у рускей литератури зявел концом 60-рокох. Потвердзел ше зоз виходзеньом приповедкох за дзеци Добродзенька (1976), з романом Празни цек (1980) и Остатнї викрок (1982), зоз драмскима текстами Концерт за пса и шмеце (1971) и Вистнїк (1979), хтори вошли до шору театралних фалатох модерней драмскей форми, Поглєдай родичох на планети Норим (1971), як и з кнїжку Запах 1987. року, як и числени дзецински, радио и тв драми.

Мирон Канюх бул автор театралного фалата Велька птица хтори у рускей явносци бул означени як дїло хторе припада такволаней чарней габи. Була то политизована оцена у складзе зоз бурнима часами хтори теди уж почали. Познєйше, кед ше после дружтвених пременкох страсци змирели, тот театрални фалат бул з успихом поставени за виводзенє у Вербаше у режиї Янка Лендєра.

Канюх бул замерковани и як автор текстох за композициї хтори виводзени на наших фестивалох. Познати є и як писатель гуморескох. Прекладал зоз сербского, словацкого и росийского язика.

Канюх бул член Дружтва писательох Войводини од 1973. року. Добитнїк є награди Невен за дзецинску литературу, Светозар Маркович за новинарство , Плакети ПС ССРН Войводини и Искри култури КПЗ Войводини.

Од 1993. Мирон Канюх виучовал психо–ментал–психо ориєнтолоґию и дошлїдно сознаньом и прешвеченьом 2008. пременєл власне мено до Михеон ХУН–КАН. Под тим меном обявел кнїжки Найчитанша кнїжка швета, Правда о библийскей маґиї и ГуманШвет по сербски, кнїжку приповедкох за дзеци Мудрило по руски як и даскельо театрални драми и монодрами.

...по вецейнїсти допринос театралней уметносци

У театралней дїялносци ше зявює як студент, у рамикох КУД Максим Горки у Новим Садзе, 1969. року, як коавтор театралного скеча Два Любови и ми, вєдно зоз Владиславом Надьмитьом, а вец и у коавторским скечу з Владиславом Надьмитьом Шалєна хижа, дзе вони двоме, попри других учаснїкох, були и ношителє главних улогох. Тиж так, уж 1969. року у спомнутим КУД режира и Ковачов театрални фалат Чловек з народу, зоз котрим означена и штерацецрочнїца литературней творчосци Михайла Ковача.

Його активносц на театралним планє пришла до вираженя у периодзе 1971-1989. рок, у рамикох Аматерского руского театра Дядя, особлїво у Новосадскей сцени. У 1971. року вибрани є за члена Совиту Новосадскей сцени АРТ Дядя, кед бул и оперативни роботнїк-руководитель представох тей сцени. У 1973. року вибрани є за секретара Театра, а 1975. постава член Управного одбору, вец 1982. року є вибрани за члена Предсидательства Театра и предсидателя його Уметнїцкого совиту, та и за гонорарно плаценого уметнїцкого руководителя Театра. На функциї уметнїцкого руководителя бул од 1982. по 1989. рок.

По вецейрочней паузи, у 2006. року ше знова уключел до театралней дїялносци, тераз Руского народного театра Петро Ризнич – Дядя, котрому шедзиско було у Руским Керестуре.

Мирон Канюх умар 6. юния 2022. року, у шпиталю у Сримскей Каменїци. Поховани є на Новим теметове у Новим Садзе.

Ориґинални драмски твори
Рок	Наслов драмского твору	Надпомнуце		Рок	Наслов драмского твору	Надпомнуце
1969	Два любови и ми	коавтор		1985	Поглєдай родичох на планети Норим	радио драма
1972	Концерт за пса и шмеце			1987	Петро Чаловка	драматизация народней приповедки
1976	Пчолка смолка			2006	Михеон Хун-Кан: Я, исцилїтель	Фантастично-документарне предсказанє
1984	Била голубица			2006	Михеон Хун-Кан): Я, пророк	Фантастично-документарне предсказанє
				2008	(Михеон Хун-Кан): Мудрило	Веселе приказаниє по истоменовей кнїжки котре ше бави цалком озбильно

ПРЕЛОЖЕЛ ДРАМСКИ ТВОРИ
Рок	Автор	Театрални фалат		Рок	Автор	Театрални фалат
1982	Милош Николич	Светислав и Милева		1983	Ґоран Стефановски	Hi-Fi (театрална мутация)
1978	Любомир Симович	Чудо у Шарґанє		1983	Душан Ковачевич	Балкански шпиюн
1978	Андрей Хинґ	Страцени син, мелодрама у 4 сликох		1987	Мирко Ковач	Увод до другого живота
1980	Душан Ковачевич	Радован Треци		1986	Андрей Нємлага	Питюлик (комедия у двох часцох)
1983	Ян Їлек	Моя твердиня

ҐЛУМЕЛ				РЕЖИРАЛ
Рок	Театрални фалат	Улога		Рок	Театрални фалат
1969	М. Канюх–В. Надьмитьо: Шалєна хижа			1969	Михайло Ковач: Чловек з народу
1972	М. Канюх: Концерт за пса и мачку	Цопи		1980	Душан Ковачевич: Радован треци
1973	А. П. Чехов: Медведз	Смирнов		1982	Дюра Папгаргаї: Телефон мой приятель
1974	Дю. Папгаргаї: Остац у себе	Колф		1983	Алфред Жари: Каль Иби
1975	Ґордан Михич: Жовта	Жовта		1984	Горан Стефановски: Хай-фай
1977	М. В. Ґоґоль: Ревизор	Хлєстаков		1986	Дюра Папгаргаї: Бабки зоз слами
1978	Любомир Симович: Чудо у Шанґанє	Жобрак		1987	Мирко Ковач: Увод до другого живота
1981	Й. С. Попович: Спреводзкоше	Стерия

Мирон Канюх бул автор текстох за композициї хтори виводзени на Фестивалу култури Червена ружа.

ТЕКСТИ ПИСНЬОХ ЗА КОМПОЗИЦИЇ

Рок	У народним духу	Автор музики		Рок	У забавним духу	Автор музики
1970	Нїхто ме нє розуми	Маґдалена Горняк-Лелас		1977	Млада писня маю	Владимир Коолбас
1974	Камени чловек на памятнїку	Иван Чукляш		1977	Позни стретаня	„
1978	Нєвольнїк	Шандор Даниш		1978	Ти мой швет	Шандор Даниш
				1978	Вечарши мриї	Дюра Будински
Рок	У забавним духу	Автор музики		1979	Перши бочканя	Иван Чукляш
1973	Любов и блуканя	Иван Чукляш		1982	Меркуй, най будзе нїжно	"
1973	Нїґда сами	„		1982	Любов зна цо сце	"
1973	Пребачце, пайташе	„
1973	Твойо очи чарни	„		Рок	ЧЕРВЕНЕ ПУПЧЕ	Автор музики
1975	Ґимназиялка	„		1974	Писня яри	Маґдалена Горняк-Лелас
1975	Ми любови своєй дом	„		1977	Штафета любови	Мария Бабич (Гирйовати)

Литература

• Дюра Латяк, „IV Видавательна дїялносц и периодикаˮ, Руске слово 1945-1985, НВРО Руске слово, Нови Сад, 1985, б. 95.

• Дюра Латяк: ДВАЦЕЦПЕЙЦ РОКИ АРТ–РНТ „ДЯДЯ“ (1970–1995), Покраїнски секретарият за витворйованє правох националних меншинох, управу и предписаня АП Войводини и Покраїнски секретарият за културу и образованє АП Войводини, Нови Сад 1997, б. 36-42, 112-117, 168.

• Дюра Латяк: ТЕАТРАЛНИ ЖИВОТ РУСНАЦОХ, ІІ часц, Театрални живот од 1945. по 1976. рок, Театрални музей Войводини – НВУ Руске слово, Нови Сад 2011, б. 398-400, 496, 556.
• P. R. Magocsi  and Ivan Pop: Kaniukh, Miron. See Literature: Vojvodina, Encyclopedia of Rusyn History and Culture, University of Toronto, 2005, SBN 0-8020-3556-3, p. 227.

Вонкашнї вязи

• Мирон Канюх (биоґрафия и список композицийох), Червена ружа 1962-2011, Том II, Завод за културу войводянских Руснацох, Нови Сад, 2014., б. 501.

• Умар Мирон Канюх, Дю. Латяк/Є. Перкович, Рутенпрес, 8. юний 2022.