Мирко Боїч
| о. др Мирко Боїч | |
|---|---|
| (портрет) | |
| Народзени | 26. мая 1888. |
| Умар | 25. авґуста 1944 (56) |
| Державянство | австроугорске, югославянске |
| Язик творох | горватски, руски |
| Школа | Исусовска семинария, Травник, пията и шеста класа, Тузла, седма и осму з вельку матуру у Заґребе |
| Универзитет | Филозофия, Рим
Богословски студиї, Заґреб, Львов, Станиславов, Львов |
| Наукови ступень | докторат, Академия святого Томи Аквинского |
| Период твореня | 1914—1944. |
| Жанри | душпастирство, парох |
| Поховани | теметов Мироґой, Заґреб |
о. др Мирко Боїч (*26. май 1888—†25. авґуст 1944), парох дюрдьовски, активист РНПД-а и защитнїк Руснацох пред власцами.
Биоґрафия
[ушориц | ушор жридло]Мирко Боїч ше народзел 26. мая 1888. року у босанским городзе Власеници. Оцец Микола походзел зоз жумберацкого валалу Боїчох, котри припадал парохиї у Сошицох. У Власеници постал углядни граждан и учаснїк у политичним живоце. Мал седмеро дзеци – трох синох и штири дзивчата. Мирко бул наймладши. После основней школи штири класи ґимназиї Мирко Боїч закончел у исусовскей семинариї у Травнику, а пияту и шесту класу закончел у Тузли, а вец седму и осму з вельку матуру закончел у Заґребе як питомец Грекокатолїцкей семинариї. Студирал у Риме на Урбанияни, дзе закончел студий филозофиї и докторовал на Академиї святого Томи Аквинского. Богословски студиї започал у Заґребе и ту закончел перши рок. Треци семестер студирал у Львове, а на штвартим уж бул у Станиславове (нєшка Ивано-Франкивс). Штварти рок заш студирал у Львове. Под час студийох научел даскельо язики – нємецки, италиянски, українски и польски.
Скорей пошвецаня за священїка оженєл ше зоз Українку Корнелию (Нелу) Шинкарюк. Пошвецел го крижевски владика Юлий Дрогобецки у церкви св. Кирила и Методия у Заґребе 30. авґуста 1914. року. Истого року бул поставени за управителя новей грекокатолїцкей парохиї у Завидовичох (Босна). Там ше праве приселєли Українци з Галичини и за нїх була основана тота парохия. Медзитим, кед почала Перша шветова война, Українци ше врацели до свойого завичаю, а Боїч бул поволани за воєного священїка и у тей служби бул од 1. новембра 1914. по 27. марец 1919. року. Цали час бул на фронту, перше на Дрини, вец на италиянским, а при концу войни у ґарнизону у Сараєве.
До Коцура за капелана пришол тиж у 1919. року, дзе 1920. року постал администратор коцурскей парохиї. На тей длужносци ше затримал три роки, а 1. мая 1923. року є премесцени за пароха до Дюрдьова, дзе до теди бул парох о. Дюра Биндас, котри поставени за пароха до Коцура.
У Дюрдьове др Мирко Боїч службовал по 31. октобер 1936. року, кед є поставени за пароха у Беоґрадзе у ранґу каноника, а бул и банатски декан.
Найплоднєйши период активносци о. др Мирка Боїча, вязаней за национални и културни препород Руснацох у Бачкей и Сриме, бул праве тот под час службованя у Дюрдьове. Як заграти активист РНПД-а, вон темпераментно заступал його програму и дїялносц у народзе, особлїво у Дюрдьове трицетих рокох, кед там почал дїйствовац КПСЮР як опозицийни РНПД-у. Теди пришол и до зраженя зоз дотедишнїм приятельом Янком Хромишом, котри ше приклонєл ґу КПСЮР („заряшом“). Од теди мож замерковац його полемични написи у „Руских новинох“ унапрямених процив дїялносци „заряшох“, розодкриваюци їх прикриту аґитацию процив грекокатолїцкей вири и священства.
И после преселєня до Беоґраду, дзе остал по април 1941. року, др Мирко Боїч заступал интереси Руснацох и бул нєофицийни представнїк Владичества пред державнима власцами у Беоґрадзе. Дзекуюци здобутому угляду при беоґрадских власцох, йому ше удало достац од управи городу порту за вибудов грекокатолїцкей церкви и парохиялного дому нєдалєко од желєзнїцкей станїци. Були уж порихтани и проєкти за будованє, алє праве теди у держави настала война и дальша реализация занавше препадла.
Мирко Боїч ше 1941. року одселєл до Заґребу. Там почал робиц у Министерстве правди и вири новопреглашеней Нєзависней Держави Горватскей, алє пошвидко постал сумнїви и мушел напущиц тоту службу. Од теди почал водзиц финансийну службу у нашей семинариї у Заґребе, поучовал богословох у наказованю, а примал и надалєй странки и заступал їх интереси. Умар у Заґребе 25. авґуста 1944. року, а поховани є 26. авґуста спомнутого року на заґребским теметове Мироґой.
Литература
[ушориц | ушор жридло]- о. проф. др Роман Миз: „Священїки дакедишнього Осєцкого викариятаˮ, Видавателє Парохия св. ап. Петра и Павла, Нови Сад и Максима, друкарня и видавательна хижа, Петроварадин, 2016, б. 63-66.
- Др Мирко Боїч: „Мой одвит Дру М. Ґубашуˮ, Руски новини ч. 43(464), Дяково, 2. новембер 1934, б. 3.
- Др М. Боїч: „Процив нєправдохˮ, Руски новини ч. 28, Дяково, 10. юла 1936, боки 1-2.