Миодраґ Мики Євремович
| Миодраґ Мики Євремович | |
|---|---|
| Особни податки | |
| Назвиско | Мики |
| Датум народзеня | 27. марца 1941. |
| Датум упокоєня | 13. януара 2017 (75) |
| Професия | Шпивач |
| Музична робота | |
| Активни период | 1962-2016. |
| Жанр | Забавна музика, поп музика |
| Инструмент | Вокал |
| Видавательна хижа | Юґотон, ПҐП РТС |
Миодраґ Євремович (*27. марец 1941 - †13. януар 2017), бул сербски и югославянски шпивач забавней музики. [1]
Биоґрафия
[ушориц | ушор жридло]Миодраґ Євремович ше родзел 27. марца 1941. року у Беоґрадзе. Оцец Видоє и мац Анґелина родз. Блаґоєвич.[2] Мики мал брата Зорана. До основней школи ходзел у Пожаревцу, кед му було 13 роки фамелия ше преселєла до Валєва дзе одроснул и закончел штреднє образованє. Студирал машинство алє у тим периодзе музика цалком превладала у його живоце, його глас постал його защитни знак, и вон ше цалком придал вибудови музичней кариєри.
Нєт сумнїву, Мики Євремович бул єден з найпопуларнєйших шпивачох забавних композицийох у Югославиї. Любели го шицки, а особлїво женска часц публики, бо вон барз емотивно шпивал, його глас, красни тенор, бул "часто на рубцу же почнє плакац" а препознавани бул и по тим же мал шмелосци експериментовац у рижних музичних жанрох з тим же свой основни уметнїцки интеґритет вше тримал на уровню. Мики Євремович окремну увагу пошвецовал наступом пред публику.
Мики Євремович почал кариєру зоз прешпивами познатих шветових хитох же би, прейґ ориґиналного греческого сиртакия, старогородских писньох и романсох, постал краль забавного попу. Початок Євремовичовей кариєри означели шпиванки Мама, Корина и Осемнац жовти ружи, а познєйши його хити були Кед дакеди обачиш Марию, З ким ши кед смутна хвиля и Поетова ґитара. З писнями Пиєм, Умрем без тебе, Цо да му повем и Ластовка гнїздо вила однєсол побиду у конкуренциї комплетней югославянскей естради на фестивалу забавней музики Писня лєта, а писня Силне морйо зоз Сплитского фестивала постала антолоґийна. Поряднє участвовал на тедишнїх фестивалох Ваш шлаґер сезони у Сараєве, на Беоґрадскей яри, на Заґребским фестивалу, Опатийским и Сплитским фестивалу.
Седемдзешатих рокох, попри Дьордя Маряновича и Радмили Караклаїч, и вон бул барз популарни у Совєтским Союзу.
За його кариєру хтора тирвала вецей як 50 роки, за милионски тиражи ґрамофонских плочох и других ношачох звука на просторох бувшей держави, за числени припознаня и награди заслужни и гити Мешачку, ти стари товаришу, Адио, Грекиня, Старе вино,У каменю писня записана,Єдина моя,Кичкириджи плачу, любови та велї други.
Мики Євремович задлужел и нашу, руску забавну музику. Наш найпознатши композитор Яким Сивч длуго жадал же би пар руски композициї одшпивал праве Мики. Понеже з часох кед студирал у Беоґрадзе Сивч познал Микийового менаджера вон ступел з нїм до вязи и удало ше орґанизвац же би Мики Євремович знял по руски Ружи, червени ружи и Били орґони.
У малженстве зоз Ґордану Мики мал сина Дьордя, а у другим малженстве зоз Соню родз. Дьордєвич мали дзивку Єлену хтора рушела по власней шпивацкей драги и сина Стефана.
Попри музики, шах бул велька любов Микия Євремовича. Вон участвовал на вецей турнирох у жеми и иножемстве. Найвекши успих му бул реми зоз шветовим шампионом у шаху Анатолийом Карповим. [3],[4]
Мики Євремович 5. новембра 2012. року представел публики моноґрафию Пейдзешат роки з вами.[5]
Дня 29. децембра 2016. року вон дожил шлоґ и два тижнї бул у коми. Упокоєл ше 13. януара 2017. року.[1]
Миодраґ Мики Євремович поховани у Алеї заслужних граждано на Новим теметове у Беоґрадзе.[6]
Композициї Якима Сивча хтори одшпивал Мики Євремович по руски.
Ружи, червени ружи - Мики Євремович
Били орґони - Мики Євремович
Вонкашнї вязи
[ушориц | ушор жридло]- Певач Мики Јевремовић лакше повређен. („Блиц“, 12. новембар 2011)
- Мики Јевремовић: Концерт за пола века каријере. („Вечерње новости“, 5. новембар 2012)
- Од несуђеног машинца до машине за хитове. („Вечерње новости“, 17. август 2013)
- Последњи Мохиканац. („Вечерње новости”, 16. јануар 2017)
- Јачи и од руске зиме. („Вечерње новости”, 17. јануар 2017)
- Преживео популарност. („Вечерње новости”, 18. јануар 2017)
- Моје боемске ноћи. („Вечерње новости”, 19. јануар 2017)
- Оставио неизбрисив траг. („Вечерње новости”, 13. јануар 2017) .
Референци
[ушориц | ушор жридло]- ↑ 1,0 1,1 „Preminuo Miki Jevremović”. blic.rs. 13. januar 2017.
- ↑ Порекло Микија Јевремовића (Порекло, 23. мај 2012).
- ↑ Преминуо Мики Јевремовић („Политика”, 13. јануар 2017)
- ↑ Јевремовић — обожаван од публике и цењен од колега („Политика”, 14. јануар 2017).
- ↑ Каријера која је дотакла звезде („Политика“, 7. новембар 2012).
- ↑ Мики сахрањен уз „А сад адио” („Вечерње новости”, 19. јануар 2017).