Минея

Минея (миния) ( старогреч. Μηναῖον, латински Menäum , словенски Мињије, Miniya)то велїчезни зборнїк писньох пошвецених шветом и святим каждого дня у року. Минею зложели св. Софроний (патриярх єрусалимски), преподобни Йоан Дамаскин, а познєйше ю дополнєли Теофан Сповиднїк и други. Тота богослужебна кнїжка першираз друкована у Венециї у чаше од 1528. по 1596. рок. Минея, попри Зборнїку, Октоиху, Службенїку, Чиновнїку, богослужебна кнїжка котра служи общому богослуженю.

Кажди дзень през цали рок, кажди датум вязани за даяке швето або даєдного (даєдних) святого: апостола, святителя, мученїка... А кажде швето або святи ошпивани з писнями. Тоти писнї творя Минею.

Минея ше друкує у 12 томох, за кажди мешац єден том. Под каждим числом дня або даяке швето, або єден, двоме або вецей святи. Ту вец комплетна Служба шветочна або святих. Зоз того видно же то барз обсяжни материял, бо кажди том ма коло 500 боки, значи же Минея ма коло 6 000 боки.

Минея ше друкує як:

▶ Мешачна минея: то минея за кажди мешац окреме.

▶ Шветочна минея: то окремна кнїжка у хторей ше друкує богослужебни материял, односно служби шветох, зоз Мешачней минеї пре лєгчейше хаснованє.

▶ Обща минея то кнїжка зоз богослужебним материялом хтори мож применїц на вецей швета або на вецей святих, хторих ше можебуц нє спомина у Мешачней минеї. У тей кнїжки, наприклад, Служба хтору мож служиц за векшину Господнїх шветох, або за векшину Богородицових шветох або ю мож служиц за вецей зродних святих. Обща минея, значи, нє ма Службу каждому святому або святей окреме, алє таки Служби хтори мож служиц за вецей святих подобних характеристикох. Наприклад, кед дзень Андрея, вец ше служи Служба апостолови, кед дзень св. Йоана Златоустого, вец ше служи Служба святительови, алє кед швето Василия Велького, Григория Богослова и Йоана Златоустого, вец Служба святительом.

Литература

Дзвони, марец 2004. рок, протоєрей ставрофор о. Йоаким Холошняй
Церковни литурґийно литурґични лексикон, бок 197, о. др Роман Миз

Вонкашня вяза

Месецослов, sr.wikipedia.org
General Menaion Tłumaczenie angielskie parafii św. Sergiusza z Radoneża, st-sergius.org
Complete text in the Church Slavonic language,www.orthlib.info
Menaion, Catholic Encyclopedia, www.newadvent.org