Микола Преґун

Микола Преґун
(портрет)
Назвиско	Пепси
Народзени	29. авґуста 1946.
Умар	28. януара 1999.
Державянство	югославянске
Язик творох	руски
Школа	Штредня машинска школа
Период твореня	1965—1998.
Жанри	ґлумец-аматер, режия, орґанизация ТВ програми
Поховани	у Коцуре

Микола Преґун (*29. авґуст 1946—†28. януар 1999), драмски аматер, ґлумец, режисер, орґанизатор програми на ТВ Нови Сад.

Биоґрафия

Микола Преґун народзени 29. авґуста 1946. року у Коцуре. Оцец Янко и мац Паулина народзена Бесерминї. Микола мал двох старших братох, Мирослава и Иринея.

Микола основну школу закончел у родимим валалє а потим штредню машинску школу. По законченю штреднєй машинскей школи перши роки препровадзел у роботи у фаху. У новембре 1975 року, петнац днї пред тим як почало емитованє ТВ програми у новим студию у Новим Садзе, Микола Преґун Пепси почал робиц у Телевизиї. У ТВ Нови Сад Микола препровадзел полни 12 роки на роботох орґанизатора програми хтору рихтала Редакция ТВ Нови Сад на руским язику. Тоту роботу охабел у юнию 1987. року кед ше пошвецел приватней роботи, кратши час у Макарскей у Горватскей, а потим у Коцуре.

Микола Преґун бул у малженстве зоз Марию родз.Скубан и мали два дзивки, Надежду и Николету.

Активносц у култури

Микола Преґун запаметани медзи приятелями як комуникативна и вше розположена особа хтора у каждей хвильки зна направиц добру атмосферу за роботу, пофрантовац, а хтора свою роботу кончела наисце професионално.

Микола Преґун охабел окремни шлїд у драмским аматеризме Коцура як ґлумец и як режисер. Його схопносц же би скоро до перфекциї креировал гуморстични улоги у театралних представох у Коцуре, и нєшка ше памета.

Перши театрални фалат у хторим ґлумел Микола Преґун бул Молиєров Уображени хоротнїк (1972). Ансамбл Дома култури з Коцура пошол з тим фалатом и на републичну смотру театрох Вечари братства у Призрену.

Наступал и у гумористичних прилогох на телевизиї. Микола здобул реноме доброго ґлумца у франтовлївих театралних фалатох и улогох на ТВ та му то постал бренд так же ше Микола Преґун Пепси зявйовал як гумориста и на фестивалу култури Червена ружа, у радийских емисийох На габох музики и гумору як и на Коцурскей жатви.

Микола Преґун умар 28. януара 1999. року у Коцуре. Поховани є на Руским теметове у Коцуре.

Микола Преґун режирал тоти театрални фалати:

Йован Буковчан, Шилька за двох, 1984.

Дьордє Фишер, Ноц за Марию, 1985.

Ґордан Михич, Жовта, 1993.

Литература

• Дюра Латяк, 50 роки Драмского меморияла Петра Ризнича Дядї, Завод за културу войводянских Руснацох, НВУ Руске слово и Дом култури Руски Керестур, Нови Сад, 2018, бок 67.

• Ґрупа авторох, „Управяцки и роботни орґани фестивалаˮ, 30 Червни ружи, НИУ Руске слово, Нови Сад, 1991, бок 141.

Вонкашнї вязи

• Slave Santa prikazuje: Život na valalje, Kocur 1983, Po uljicoh Kocura, Mikola Pregun Pepsi], Славе Шанта, Ютюб, октобер 6, 2021

• Гумор з Руского Керестура - ґлумци АРТ Дядя, Маковчань, Ютюб, януар 1, 2016.

• ZABIVAČKI ŠVINJOH - Običaji z tradiciji Rusnacoh u Vojvodini - 1. časc, Маковчань, Ютюб, децембер 11, 2009.

• ZABIVAČKI ŠVINJOH - Običaji z tradiciji Rusnacoh u Vojvodini - 2. časc, Маковчань, Ютюб, децембер 11, 2009.

• ZABIVAČKI ŠVINJOH - Običaji z tradiciji Rusnacoh u Vojvodini - 3. časc, Маковчань, Ютюб, децембер 12, 2009.