Микола Кучмаш
| Микола Кучмаш | |
|---|---|
 | |
| Датум народзеня | 25. юлия 1936. |
| Датум упокоєня | 4. юлия 2021 (85) |
| Державянство | югославянске, сербске |
| Школа | Штредня ветеринарска школа, Шабец |
| Висша школа | Висша педаґоґийна школа, на Цетиню |
| Период твореня | 1955-1993. |
| Жанри | Шах - орґанизация, судзенє, бавенє |
| Поховани | у Новим Садзе |
| Припознаня | Орден роботи зоз стриберним венцом Предсидательства СФРЮ, Орден за заслуги за народ зоз стрибернима зарями, Повеля Шаховского союзу Войводини за 50 роки роботи на розвою и унапредзеню шаха 1948-1998, Плакета Шаховского союзу Войводини 1948-1978 |
Микола Кучмаш (*25. юлий 1936†4. юлия 2021), визначни шахиста, майсторски кандидат и интернационални шаховски судия.
Биоґрафия
[ушориц | ушор жридло]Микола Кучмаш ше народзел 25. юлия 1936. року у Коцуре. Оцец Митро и мац Мария родз. Хромиш. Мал брата Янка и шестри Марию и Ирину. У Коцуре закончел основну школу, а штредню ветеринарску школу закончел у Шабцу 1954. року, алє ше нє задоволєл з ветеринарским фахом та предлужел школованє на Висшей педаґоґийней школи, ґрупа ґеоґрафия и история, на Цетиню (Чарна Гора). После дипломованя Микола Кучмаш робел як наставнїк, а єден час и як директор школи Братство-єдинство у Коцуре.
Микола Кучмаш у швеце шаха
[ушориц | ушор жридло]Микола Кучмаш почал бавиц шах пейдзешатих рокох прешлого вику кед мал 13–14 роки. Член Шаховского клуба Омладинєц у Коцуре постал ище 1952. року и з часом постал єден з найактивнєйших популаризаторох того спорта у Коцуре. Зоз своїм ентузиязмом и любову ґу шаху, Кучмаш у Коцуре и других наших местох прицагнул вельо валалчанох же би бавели шах.
Коцур бул роками на верху шаховскей рейтинґ-листи, алє найвекши екипни успих мал 1969. року кед ше ШК Омладинєц змагал у (першей) єдинственей войводянскей лиґи. Шах клуб Омладинєц ше уключел и до шаховских фестивалох у тедишнєй СФР Югославиї та шахисти з Коцура, медзи нїма вше бул Микола Кучмаш, бавели на шаховским фестивалу у Порторожу, Опатиї, Пули, Врнячкей Банї, Бледу, Крку, Улциню. Одходзели вони и на медзинародни турнири до Голандиї, Швайцарскей, Чехословацкей, Румуниї, Мадярскей и Польскей.
Микола Кучмаш бул оженєти зоз Амалию родз. Кочиш, у малженстве мали дзивки Таню и Машу.
Алє, рамики валалского шаховского клуба Кучмашови постали цесни за його шаховски амбициї. Прето од 1. фебруара 1971. року прешол на длужносц комерциялиста до НВРО Руске слово у Новим Садзе. Ту вєдно з тедишнїм директором Миколом Москальом, тиж визначним шаховским майстром, основали Шаховски клуб Руске слово при НВРО Руске слово. Тот клуб през вецей роки посциговал замерковани резултати на турнирох у рамикох Покраїни, бо у його рамикох бавели познати войводянски шаховски майстрове.
Микола Кучмаш бавел за вецей шаховски клуби, медзи котрима за Войводину (388) и Омладинєц (215). Попри тим, наступал и за новосадски клуби – Партизан, ШК Руске слово, Бубамара и ҐРАС, та и за керестурски ШК Русин. Як майсторски кандидат участвовал и на медзинародних шаховских турнирох у бувшей ЧССР, Польскей, Болгарскей и Румуниї.
Бул два роки предсидатель и два роки подпредсидатель Городского шаховского одбору Нового Саду, бул член Одбору судийскей комисиї Югославиї, Член Предсидательства Шаховского союзу Войводини, два мандати бул селектор младежскей репрезентациї Войводини.
Микола Кучмаш бул и єден з иницияторох и орґанизаторох Спортских бавискох Руского слова хтори основани 1972. року. Шах на тих спортских бавискох бул наймасовнєйши спорт.
Шах престал бавиц 1981. року, теди мал рейтинґ майсторского кандидата. Од 1952. року одбавел вецей як 2 500 партиї у стандардним, швидкоцагаюцим и дописним шаху. Од 1981. року Микола Кучмаш постал интернационални шаховски судия. Судзел на велїх европских першенствох и на шаховских олимпиядох у Дубаию 1986, Новим Садзе 1990, и у Єревану 1996. року.
За свою роботу на шаховским полю Микола Кучмаш достал велї припознаня: Орден роботи зоз стриберним венцом Предсидательства СФРЮ, Орден за заслуги за народ зоз стрибернима зарями, Повелю Шаховского союзу Войводини за 50 роки роботи на розвою и унапредзеню шаха 1948-1998, Плакету Шаховского союзу Войводини 1948-1978 за пропаґанду шаха, Плакету СОФК Нови Сад 1945-1975 за 30-рочнїцу роботи, Златну плакету СОФК Вербас, Златну плакету Спортских бавискох Руского слова,1971-1981.
После вецей як два децениї роботи у НВРО Руске слово Микола Кумаш пошол до пензиї 1. септембра 1993. року.
Микола Кучмаш ше упокоєл 4. юлия 2021, по лєм цо нє наполнєних 85 рокох живота.
Поховани є на Городским теметове у Новим Садзе
Литература
[ушориц | ушор жридло]- Микола Кучмаш. НАР Новинарска асоцияция Руснацох, nar.org.rs, децембер 29, 2017
- Александар Паланчанин Од коцурскей байбернї по турнир у Дубаию. новини Руске слово, issuu.com, ч. 44, 4. новембер 2016, бок 34-35
- Михал Симунович, Микола Кушмаш, бавяч, орґанизатор и медзинародни шаховски судия ФИДЕ (фельтон). новини Руске слово, 1910, число 29 по 33.
Вонкашнї вязи
[ушориц | ушор жридло]- Умар Mикола Кучмаш (1936–2021). Дю. Латяк, Рутенпрес, 6. юлий 2021