Микола Буша

Микола Буша
Датум народзеня	24. юния 1917.
Датум упокоєня	7. юлия 1988 (71)
Державянство	угорске, югославянске
Школа	висококвалификовани машински шлосер
Мотиви	Етноґрафски мотиви Руснацох
Период твореня	1947-1988.
Технїка	олєйово фарби
Поховани	у Вербаше

Микола Буша (*24. юний 1917- †7. юлий 1988), маляр аматер.

Биоґрафия

Микола Буша ше народзел 24. юния 1917. року у Коцуре. Оцец Микола и мац Веруна нар. Пашо. У фамелиї були 9-еро дзеци, Микола мал ище штирох братох и штири шестри.

У родним валалє закончел шейсц класи тедишнєй основней школи. Микола любел мальовац од дзецинства. На салашу, дзе препровадзал дзецинство, вон по обилєним муре з угльом, зоз желєним лїсцом, червену або жовту цегелку, зоз шицким цо за собу охабяло шлїди, мальовал и райзовал рижни мотиви.

З дошколовйованьом закончел за висококвалификованого машинского шлосера.

По войни, 1946. року, Микола Буша почал робиц у фабрики цукру у Врбаше, на желєзнїци, як машинист, а у шлєбодним чаше мальовал.

Микола Буша бул оженєти зоз Ану родз. Виславски, у малженстве мали синох Силвестера и Ивана и дзивку Амалию.

Замерковане доприношенє подобовей уметносци Руснацох

Перши малюнок Микола Буша виложел 1947. року на вистави у Руским Керестуре з нагоди преслави 200. рочнїци приселєня Руснацох до тих крайох.

Член Подобового клуба Дюро Салай у Беоґрадзе Микола Буша постал 1970. року. Як член того клуба викладал малюнки у Беоґрадзе, Заґребе, Вербаше, Кули, Зомборе, Руским Керестуре и даєдних других местох у Бачки.

Клуб за своїх членох орґанизовал и курси, дзе и Микола достал подуки о малярстве и технїки мальованя. Прилапел совит на своїх малюнкох обрабяц руски етноґрафски мотиви, чому ше потим и найвецей пошвецел. Микола Буша мальовал углавним з олєйовима фарбами на лесониту и на платну.

За Бушово малярство мож повесц же го уключує до круга наївних малярох, а писатель и познати карикатуриста и вершински илустратор, Любомир Сопка, думаня же по пориве, декоративносци и инстинктивносци подобового приповеданя Бушово малюнки бешедую на способ наївного малярства, алє же ше Микола Буша у сущносци нє уклапял до такволаней наїви, та мож повесц же його роботи представяю єдинствене зявенє у историї малярства при Руснацох.

Застановени час котри видзиме на малюнкох Миколи Буши враца нас до прешлосци, старших же би ше здогадли, а младих поучує и указує нашу прешлосц у роботи, обичайох, облєканю, та и розваги, гоч Руснак за ню, за розвагу, барз мало часу мал. Мотиви пратки, забивачка, полудзенок на полю могли би ше третовац як розвага, алє и тота розвага лєм часточна, бо знаме же ше на праткох предло, вишивало, коло забивачки ище кельо єст роботи, а полудзенок на полю тиж пре роботу.

На вецей Бушових малюнкох обачуєме типични пейзаж ровнїни, витворени з линеарну, углову або централну перспективу, оформену на основи свойого знаня и искуства, алє вшадзи присутни старински хижи, церква або даяки други обєкти котри означую рускосц.

Микола Буша умар 7. юлия 1988. року у Вербаше дзе є и поховани.

Литература

• Едиция Русини/Руснаци/Ruthenians (1745-2005). Видаватель Прометей, Нови Сад, 2006. рок, б. 375.

• Моноґрафия Подобова творчосц Руснацох, Видаватель Дружтво за Руски язик, литературу и културу, Нови Сад, 2003. року, б. 22.