Миклошевци


Миклошевци
Грекокатолїцка церква у Миклошевцох
Администрацийни податки
Держава	Горватска
Жупания	Вуковарско-сримска
Општина	Томпоєвци
Найблїзши векши варош	Вуковар
Жительство
Вкупно (2021.)	265 ^[1]
- густосц	23 жит./km²
Ґеоґрафски характеристик
Координати	45°15′07″N 19°05′10″E
Поверхносц	11,5 km2 ^[2]
Миклошевци Миклошевци на мапи Горватскей
Инши податки
Поштове число	32242 Слаковци ^[3]
Поволуюце число	+381 (0)32
Реґистерска ознака	VU

Миклошевци (рсн: Миклошевци, горв. Mikluševci) то населєнє у составе општини Томпоєвци. Векшински то руски валал. Валал ше находзи у Горватскей, у Вуковарско-сримскей жупаниї.

История

Першираз ше валал спомина 1758. року як Миклушевци. Населєнє мало 30 хижи и було населєне зоз Влахами. Вери ше же валал або населєнє було вельо скорей и пред тим под назву Дякра под часц турскей власци на подручу Срима. Алє, материялни докази одходза далєй до историї та бешедую о густо населєним подручу менших населєньох Дражиновци и Каишевац. Материялни доказ то тополя (била тополя) хтора ма коло 370 роки а находзи ше на на сиверозаходним рубцу населєня на крижаню трох драгох хтори далєй водзели по старей драги (пред вибудову калдермох) спрам Вуковару та спрам населєню Ґрабово, истоменному озеру и терашньому населєню Чаковци. Древо ма пречнїк 3,07 метери та ше предпоставя же є засадзене у турским чаше скорей самого мена Миклошевци. Нєшка тото стебло символ населєня.

Скорей турского освойованє нєт материялни докази з того подруча окрем єдней мапи хтора ше находзи у варошским музею у Вуковаре и хтора гутори о населєню Дунбастра на юговосточней часци Миклошевцох як и о нєшкайшим лєше Єлаш.

Штредком ХIХ вику тот валал населюю Руснаци.^[4] Вони ше приселюю зоз подруча Мишколца у нєшкайшей Мадярскей и маю помадярени презвиска (Чордаш, Ковач, Колбас, Вереш, Орос и др.), як и з подруча югозаходних Карпатох (Мудри, Лїкар, Гирйовати, Папуґа и др.). Насельованє тирвало коло 30 роки и ту ше населєли коло 150 руски фамелиї або 600 члени, з оглядом же теди фамелиї були численши. Руснаци ширели и розвивали населєнє, збудовали грекокатолїцку церкву, школу та постали векшински народ у валалє хтори мал уж пред Першу шветову войну 956 жительох од чого 92% були Руснаци. У валалє остали и православни жителє, коло 15 хижи з малу церквочку.

Отечествена война

Миклошевци досц чежко страдали под час Отечественей войни у першей часци 1990. рокох. Побунєти Серби, подпомогнути з боку ЮНА, завжали валал 8. октобра 1991. року та векшина жительства напущела валал. Под час спомнутей войни свойо животи за одбрану оцовщини дали 9 жителє влала. После шейсцох рокох под окупацию, 2. новембра 1997. року ґрупа Миклошевчаньох нащивела свойо зруйноване место и теметов. Дня 5. фебруара 2009. року Рада за воєни злодїйства Жупанийского суду у Вуковаре осудзело 12 особи з Миклошевцох на вецейрочни гарешт пре каребне дїло воєного злодїйства над цивилним жительством.^[5]

Жительство

З пописом жительства з 2011. року було утвердзене же у Миклошевцох єст 378 жительох.

Спрам попису зоз 2001. у влалє жили 486 жителє.

Року 1991. вaлал мал 673 жительох з чого

493 були Руснаци (73.25%),

76 Серби (11,29%),

49 Горвати (7,28%),

20 Югославянє (2,97%),

7 Українци (1,04%),

7 Мадяре (1,04%)

и 20 други нєвияшнєти.


Населєнє Миклошевци: Рушанє числа жительох од 1857. по 2021. рок
Рок	1857.	1869.	1880.	1890.	1900.	1910.	1921.	1931.	1948.	1953.	1961.	1971.	1981.	1991.	2001.	2011.	2021.
Число жительох	608	697	712	814	819	800	876	1010	966	989	859	769	758	673	486	378	265