Мех

Мех ручно ткани на дрелїх, Руска одлога у Дюрдьове.

Мех (слово мех семитского походзеня (феничанско-гебрейски saq, „платно зоз шерсци“, „мех“) сцигло до Европи прейґ греч. sákkos за грубе платно зоз кожей – (козовей) шерсци и лат. saccus. (мадь. zsák)

Мех то найпростейша файта торби за чуванє, одкладанє, пакованє менших значних и нє значних стварох, артиклох. Часто ше и сам мех прави зоз найєдноставнєйших материялох а дизайн му тиж прости, без даяких ручкох и других можлївосцох. Найрозпространєйши мехи були шити зоз лєну (юта).

Мех, мала торба, мещок зошити зоз двох правоуглових полох, або зоз єдного фалата платна зогнутого по поли. Текстил хтори наменєни за мехи бул зоз мегкого материялу найчастейше зоз лєну, предзи. Мех може буц ушити пременлївих ґеометрийских формох платна и, кед же потребно додаваю ше и пришиваю звязовки (порващки) за вязанє меха.

Сучасни мехи

Окрем традицийного меха шитого зоз лєну, конопи и под. нєшка ше мехи правя зоз рижних материялох як цо то папер лєбо пластика. Часто таки мехи нє шити алє лїпени зоз окремнима лїпкачами. Тиж ше зявюю комбинациї розличних материялох, напр. паперово мехи хтори зоднука маю пластичне пасмо хторе онєможлївює присутносц влаги (напр. мехи у хторих паковани цимент итд.).

Домашнє ткане платно за мехи при Руснацох

Дакеди Руски ґаздинї през жимски период ткали платно и за мехи. Тканє платна за мехи було з окремну технїку такв. на дрелїх. Ґаздинї у своїх обисцох на кроснох ткали вжиме кед нє було на полю и у заградох роботи. Ткали зоз конопових нїткох-зоз предзи. Зоз витканого платна найчастейше шили ручно мехи. Зошивали их на твардо зоз моцну предзу же би ше на боку нє розпарали.

Таки мехи зоз платнох своєй роботи ткани на дрелїх, були грубши и витримовнєйши прето же були на густо ткани и длужей тирвали. До нїх ше звичайно сипало и тримало жито, ярец, овес, кукурица.

Наменка и файти

Паперови мех зоз муку.

Наменка меха першенствено була за преношенє та и одкладанє/пакованє /розличних артиклох або польопривредних културох (жито, кукурица, ярец и под.) и рижних других материялох. Спрам того на тарґовищу ше у новших часох зявели рижнородни мехи шити або направени зоз рижних материялох:

• Паперови мех; будовательни материял, цимент, окремна файта вапна, пакує ше найчастейше до паперових мехох одредзеней чежини. Так ше будовательни материял одклада/пакує, предава и преноши по локацию за конєчне хаснованє. Найчастейше ше и цена того материялу одредзує спрам количества у меху.

• Мех зоз синтетичних або природних влакнох. Таки мехи служа за преношенє польопривредних културох як цо то: жито, кукурица, кромплї и друге.

• Решеткасти мех зоз синтетичних влакнох. Таки мехи ше тиж хасную за транспортованє овоци и желєняви хторим потребна вентилация и як защтита од плєшнєнїни як цо то: паприґа, рижнородна овоц, капуста и друге.

Мех за одкладанє одруткох, шмеца.

• Найлонови мех. Тота файта мехох ше хаснує першенствено за пакованє/одкладанє материялох хтори пребарз чувствительни на воду лєбо робу хтора влажна. Може ше хасновац за транспортованє швижей риби и подобне, алє и за пакованє штучних гнойох, пращки за райбанє и других хемикалийох.

• Слово мех ше хаснує за розлични наменки. Напр. у войски – особни воєни мех-торбичка, Огньогасна торба-мех, ловарска торба-мещок, у ботаники ембрионов мещок, мех за спанє, поштово мехи за писма и пакети, мех за ратованє у води, пластични мехи за шмеце хтори розличних димензийох-мали и вельки такв. джамбо мехи итд. Аж и мех за спортски бависка-обегованє скакаюци у меху.

• У индустриї ше рижнородни мехи и зоз барз рижних материялох, и форми мехох, хасную за рижни продукти.

Историят

Зоз розвиваньом цивилизациї, чловечество медзи иншим здумало и мех –торбу (хтори ше при народох розлично наволує. Мех, напр., Турски çuval) за ношенє и одкладанє стварох. Стари Греки мали путнїцку торбу (Στρωματόδεσμος) - мех за прибор за путованє, окреме посцелїну и поньви за спанє . У цеку путованя, раби звичайно ношели путнїцки мехи-торби своїх ґаздох. У Старей Русиї, торба, каиш - Калита. У южней Русиї, у Тулскей и Орловскей обласци, сама (сум, сумка) або торба ше вола Кобеняк або Кобка.

Мехи ше хасновало за одкладанє, ношенє и транспорт рижних дробних будовательних материялох, прехрамбених продуктох и под. Звичайно су направени зоз витримовних материялох (мат, бурлап), паперу, скори або синтетичних материялох.

Предносци меха

Наскладани мехи.

Предносц меха спрам одношеня на други контейнери (за одкладанє и чуванє) тота же су лєгки, и можу буц рижних менших димензийох, поготов кед су празни (и же их мож празни поскладац). Мехи звичайно вельо туньши од других контейнерох истого капацитета. Єдини нєдостатки меха тота же ше може предзиравиц, нєзґоднє го ношиц кед є наполнєти а додаванє даяких звязовкох, ручкох, або ременчкох деформує мех.

Слово мех ше хаснує за розлични наменки. Напр. у войски – особни воєни мех, Огньогасна торба- мех, ловарска торба-мещок, у ботаники ембрионов мещок, мех за спанє, поштово мехи за писма и пакети, мех за ратованє у води, пластични мехи за шмеце хтори розличних димензийох мали и вельки такв. джамбо мехи итд. Аж и мех за спортски бависка-обегованє скакаюци у меху.

Ґалерия

• 
  Мех напольнєти зоз чутками кукурици.
• 
  Дрелїх, файта ручного тканя платна за мехи.
• 
  Мех з написаним презвиском власнїка у Руским Керестуре.
• 
  Мех и мирица з ручку, Руска одлога , Дюрдьове.
• 
  Пластични мехи за одрутки.
• 
  Лєнове платно за мехи (ридше тканє).
• 
  Звичайно шити лєнови мех.
•