Мефтодий Ґубаш

Мефтодий Ґубаш
Народзени	1. януара 1941.
Умар	16. октобра 1998 (57)
Державянство	югославянске, сербске
Язик творох	руски, старославянски
Школа	Основна школа, Коцур
Период твореня	1971—1998.
Жанри	дзиякованє
Поховани	На дюрдьовским грекокатолїцким теметове

Мефтодий Ґубаш (*1. януар 1941—†16. октобер 1998), вельорочни дюрдьовски дзияк.

Биоґрафия

Мефтодий Ґубаш народзени у Коцуре 1. януара 1941. року од оца Ґабра и мацери Юли нар. Колєсар. Мефтодий мал ище двох братох. До основней школи Мефтодий ходзел у Коцуре а до "клироса ставал" од тринастого року свойого живота. Полюбел слухац шпиванє дзиякох од дзецинства и мал жаданє постац дзияк у церкви.

Кед ше фамелия Ґубашових преселєла до Дюрдьова Мефтодий предлужел з ученьом дзияцкей служби. Поряднє бул на Службох Божих у грекокатолїцкей церкви Рождества Пресвятей Богородици. Кед тедишнї дюрдьовски дзияк Юлиян Буїла 1971. року одказал на дзияцтве Мефтодий Ґубаш подполно превжал клирос дюрдьовскей церкви и служел як дзияк полни 27 роки, до свойого упокоєня.

Обход коло церкви за Кирбай. Дзияци: Мефтодий Ґубаш (Дюрдьов), Йовґен Лендєр (Руски Керестур), Велимир Чижмар (Вербас).

На дзияка Мефтодия Ґубаша и його дзияцку службу остали тирваци памятки. Вон бул без сумнїву єден з найлєпших дзияцох нє лєм свойого часу, алє и вельо ширше. Бул правдиви майстор кед слово о читаню богослужебних текстох. Його точне читанє каждого слова, перфектна артикулация и правилне наглашованє давали совершену ясносц шицкому цо читал. А кед читанє мало прейсц до шпиваня, вон то з першокласним слухом и природзену музикалносцу витворйовал на професионални способ. Ґу тому, нє мож а нє спомнуц ище голєм три дзияцки прикмети Мефтодия Ґубаша. Вон знал барз добре комплетне простопинийне шпиванє, найлєпше знанє мал кед бул у питаню компликовани устав комплетного богослуженя и при тим бул барз точни. Кельо познате вон нїґда нє зробел погришну комбинацию богослужебних текстох. Вше бул барз точни на своїм роботним дзияцким месце. Його вельорочне и удатне дзиякованє може послужиц будуцим дзияком як красни приклад тей роботи.

Мефтодий Ґубаш нєсподзивано умар 16. октобра 1998. року. Поховани є на дюрдьовским грекокатолїцким теметове.

Литература

• In memoriam: Мефтодий Ґубаш, Руски календар, НВО Руске слово, 1999, б. 162.