Менует

Le bal paré; деталь зоз ґравури танца-менует, Антоана Жана Дуклоа, 1774. рок.

Менует (франц.- menuet, ит.- minuetto) то музична форма, тип зложеней тродїлней писнї A-Б-A у 3/4 ромири такта. Виводзи ше го у мирнєйшим, умереним темпу.

Менует стари французки ґрациозни народни танєц (16. вик), мено достал пре свойо танцованє зоз лєгкима „малима” крочаями и на ,,пальцох,” (такв. pas menus).

Походзенє

Предпоставка же коренї менуета у Бретанї. Менует припада жанру француского танца, а од 17. вику постал балски танєц, бул през цали вик популарни и розширел ше по цалей Европи. Танцовал ше на балох и других шветочних нагодох.

Ритем менуета

Менует постал нательо популаризовани алє и оддалєни од своїх основних правилох племенїтосци же танєчни фаховци у цеку 18. вика попробовали у своїх трактатох и едукацийох очувац його першобутну чистоту и зачувац менует од контаминациї, поєдноставйованя и прейґмирней „популаризациї“ розпространєней пракси у балских салонох.

Менует, Квинтет и флаута Ґе-дуру, Бернгард Ромберґ

Историят

У 17. вику менует бул звичайно часц барокней свити (циклична форма), а у цеку класичней епохи и далєй остал форма танцу, хасновани є у цикличних композицийох. Треци став стандардней симфониї вше бул записани у форми-жанру менуета. Познєйше ше подполнєйше розвил часто зоз длугшу музичну форму- Менует и трио и бул барз хасновани як став у вчасней класичней симфониї.

Концом 17. и у 18. вику форма (жанр) менует бул широко заступени у клавирскей и камерней музики (Франсоа Куперен, Жан-Филип Рамо, Андре Кампрас и други. „Обовязково,“ менует бул часц у инструменталней свити (Й. С. Баха, Ґ. Ф. Гендла), дакеди аж и у увертири за оперу.

Менует у других музичних формох

Менует зоз класичней епохи

Познєйше ше менует розвил и стилизовал у инструменталней музики та ше хасновал и у оперох и балетох К. В. Ґлука. У класичней епохи, менует ше почал хасновац як часц сонатно-симфонийского циклуса, звичайно поставени медзи спомалшенима часцами. Менует у вчасних симфонийох Й. Гайдна, достава живши и веселши характер, и на тот способ ше приблїжує танєчному характеру. В. А. Моцарт уведол лирски, часто шмели интонациї до менуета. У симфонийох Л. Бетовена, менует поступно заменює скерцо. Познєйше, у 19. вику, менуети писали Петро И. Чайковски, Клод Дебиси, Сати, М. Лисенко и други композиторе.

Нєшка ше менует може найсц на месту предостатнього става сонатного циклуса и може мац характер и ритмични нєправилносци хтори го досц оддалюю од першобутней наменки.

Литература

• Russell, Tilden. 2006. "The Minuet According to Taubert". Dance Research: The Journal of the Society for Dance Research 24, no. 2 (Winter): 138–162.

Вонкашнї вязи

• Менуєт Музыкальный энциклопедический словарь, под ред. Г. В. Келдыша. — М., «Советская энциклопедия» 1990.
• V. A. Mozart - Menuett Музика и танєц.
• menuett wassermusik Менует зоз ,,Музика на води Ф.Гендла, youtube.com