Мендиґовдал

Мендиґовдали, мн. (серб. помоћнице, мадь. vendégoldal, у Коцуре ше хаснує форму мендиґолдал хтора блїзша мадярскому жридлу – meddig az óldal) - помоцни бочни древа на парастским кочу хтори ше кладзе крижно на драбинки коча. То як преширени рам на запрагним кочу за превоженє кукуричанки, слами, шена, снопох жита, бетелїни и под.

На валалє було найвецей роботни кочи, а такповесц кажде обисце мало голєм єден коч, бо ше без нього, як превозки, нє могли окончовац нїяки парастски роботи. На кочу ше превожело на польо и з поля шицко цо требало. Вожело ше польопривредни орудия (плуг, ролю, брану, дерлячу), зоз дому ше на кочу вожело гной на польо. Зоз поля ше дому вожело шицко цо зродзело (кукурица, кукуричанка, жито, шено, цвикла и др.).

Кед ше вожело кукуричанку, шено, або дацо подобне, вец ше зоз нього на кочу наскладало вельке брадло же би ше цо вецей месцело и же би мож було цо вецей нараз превезц. Так ше шено накладло до коча кельо ше месцело „до драбин“, а потим ше на драбинки кладло древа же би ше кочу звекшало поверхносц. То ше робело так же ше крижом прейґ драбинкох кладло два або три „крижни древа“, хтори були длугши як драбинки и стирчали зоз каждого боку коча коло метер и пол. На тоти крижни древа, односно на їх конци хтори стирчали з коча, положело ше два длугоки древа, „мендиґовдали“, так же стали паралелно зоз драбинками коча. На крижни древа и на мендиґовдали мож було далєй складац високе брадло.

Литература

Наташа Фа Холошняй, Колєсарске ремесло, Терминолоґия, Studia Ruthenica 19/2014, б.

78-79

Вонкашнї вязи

Rečnik bačkih bunjevaca tripod.com

čatlov, Vikirečik, sr.wiktionary.org