Мелания Планчак (учителька)

Мелания Планчак
Назвиско	Аранка
Датум народзеня	13. мая 1929. року
Датум упокоєня	22. новембра 2017 (88)
Державянство	югославянске, сербске
Язик творох	руски, українски
Школа	Учительска школа, Сримски Карловци и Суботица
Период твореня	1950—1985.
Жанри	образованє, просвита, редактура
Поховани	на теметове у Руским Керестуре
Припознаня	Припознанє Осиф Фа, учитель

Мелания Планчак (*13. май 1929—†22. новембер 2017), учителька и панїматка, дружтвена дїячка.

Биоґрафия

Мелания (Аранка) Канюх ше народзела 13. мая 1929. року у Руским Керестуре. Оцец Михайло и мац Єлена родз. Надь. Мелания мала три шестри, Амалию, Славицу и Емилию. Основну школу Мелания закончела у Руским Керестуре, предлужела школованє у Нєподполней мишаней ґимназиї з руским наставним язиком у фебруаре 1945. року и потим пошла до Учительскей школи у Сримских Карловцох и познєйше прешла до Учительскей школи у Суботици хтору закончела 1950. року.

Мелания Канюх ше одала за о. Кирила Планчака. У малженстве вони мали штири дзивки - Марию, Емилию, Олену и Татяну.

Мелания Планчак зоз школярами у Новим Орахове

Перше роботне место єй було у Руским Керестуре дзе робела єден рок. Накадзи ше одала за паноца, о. Кирила Планчака, премесцена є до школи у Новим Орахове дзе робела осем роки, а потим, кед єй супруг Кирил премесцени на душпастирску роботу до Руского Керестура, єден рок робела и у Коцуре. До Руского Керестура учителька Мелания ше врацела и робела од 1962–1969. року.

Мелания Планчак найдлужей робела у Петровцох у Сриме (нєшка Република Горватска) дзе ше цала фамилия преселєла кед єй супруг Кирил меновани за петровского пароха, 1969. року. Ту такой почала робиц як учителька класней настави, а по одходу Вири Гудаковей до Петроварадину, превжала и годзини руского язика. У школи пририхтовала рочни школски часопис за литературни роботи Венчик. У Петровцох, окрем настави, учителька Мелания Планчак пририхтовала шицки школски програми з нагоди державних шветох, вєдно зоз членми КПД Яким Гарди.

Мелания Планчак, як дзивка и штредньошколка, ґлумела  у пар театралних фалатох у Руским Керестуре. У Петровцох вона режирала 6 аматерски представи а кед Юрий А. Шереґи 1970. року режирал у валалє  театрални фалат Сорочински ярмарок Мелания Планчак зоз супругом ґлумела у фалаце у хторим, медзи иншим, було и надосц шпиваня. У тим фалаце участвовала векша часц просвитних роботнїкох зоз школи.

У Петровцох Мелания Планчак була єден час и директорка подручней школи, хтора припадала под вуковарску ОШ Други конґрес КПЮ. У школи у Петровцох Мелания Планчак дочекала и пензию 1985. року.

Уж як пензионерка вона зоз супругом, паноцом Кирилом Планчаком, пошла до Нємецкей, до Нирнберґу, дзе препровадзели 13 роки. Року 1998. Мелания и Кирил Планчаково ше врацели до Руского Керестура ґу своїм дзецом и унуком.

Учителька Меланка Планчакова була член Дружтва за руски язик, литературу и културу од 1974. року. У матичней кнїжки Дружтва уписана є под числом 68.

За свою витирвалу роботу у просвити учителька Мелания Планчак достала вецей припознаня и награди, а єдно з нїх и Припознанє Осиф Фа, учитель Дружтва за руски язик, литературу и културу 2016. року за длугорочну воспитно-образовну роботу зоз школярами.

Учителька Мелания Планчак ше упокоєла 22. новембер 2017. року (88). Похована була на теметове у Руским Керестуре.

Ґалерия

• 
  Мелания и Кирил Планчак
• 
  Мелания Планчак як млада учителька

Литература

• Тамаш, др Юлиян, „Просвитни роботнїки 1944—1991. рокуˮ, Руски Керестур, лїтопис и история (1745-1991), Месна заєднїца Руски Керестур, 1992, бок 413.
• Сенка Папуґа Славчев: Руски учителє у Новим Орахове, Studia Ruthenica, Дружтво за руски язик, литературу и културу, ч. 7 (20), 1999-2000, б. 84.

Вонкашнї вязи

• С. Сабадош, Образовна вертикала, од оводи по факултет (VI), новини Руске слово, ruskeslovo.com, 9. октобер 2023.
• Zvonko Kostelnik, UMRLA JE UČITELJICA MELANIJA PLANČAK, Savez Rusina Republike Hrvatske, vebsajt savezrusina.hr , 23.11.2017.
• В. Вуячич, На нєшкайши дзень, 13. май, Аґенция Рутенпрес, вебсайт www.ruskeslovo.com, 13. май 2026.
• Умарла Мелания Планчак, учителька (1929-2017), вебсайт Дружтва за руски язик, литературу и културу, druztvo.org.