Мелания Мудри
| Мелания Мудри | |
|---|---|
 | |
| Датум народзеня | 1. октобра 1933. |
| Датум упокоєня | 14. юния 2021 (88) |
| Державянство | югославянске, сербске |
| Язик творох | руски, сербски |
| Школа | Учительска школа, Зомбор |
| Период твореня | 1953-1988. |
| Жанри | просвита, култура |
| Поховани | На руским теметове у Шидзе |
Мелания Мудри (*1. октобер 1933-†14. юний 2021), учителька, аматерска дїячка у култури
Биоґрафия
[ушориц | ушор жридло]Мелания Планчак ше народзела 1. октобра 1933. року у Руским Керестуре. Основну школу и нїзшу ґимназию з малу матуру Мелания закончела у родзеним валалє. Потим вона школованє предлужела у Учительскей школи у Зомборе дзе матуровала 1953. року.
Перше роботне место єй було у Дюрдьове, а потим прешла на роботу учительки до Основней школи Петро Кузмяк у Руским Керестуре. Ту ше одала за наставнїка Василя Мудрого у обидвойо нєодлуга прешли службовац до школи при Покраїнским дзецинским шпиталю у Принциповцу при Шидзе. Мелания Мудри 1962. року прешла зоз школи у Принциповцу на учительску службу до Бикич Долу дзе робела по 1975. рок. Теди прешла до Основней школи Сримски фронт у Шидзе, а вец до Основней школи Йован Веселинов Жарко тиж у Шидзе. На тим роботним месце була по 1988. рок кед пошла до пензиї.
Дружтво за руски язик, литературу и културу єй додзелєло Припознанє Осиф Фа, учитель, як учительки велїх ґенерацийох школярох у Бикичу и Шидзе за длугорочну воспитно-образовну роботу зоз школярами и за аматерску културну дїялносц.
Василь Мудри и Мелания родз. Планчак мали у малженстве двойо дзеци, дзивку Меланию и сина Бориса.
После пензионованя и по шмерци супруга Василя Мелания Мудри остала жиц у Шидзе.
Мелания Мудри ше упокоєла 14. юния 2021. року у Шидзе. Похована є 15. юния 2021. року на руским теметове у Шидзе.
Литература
[ушориц | ушор жридло]- Дю. Л. Мелания Мудри (1933-2021), новини Руске слово, рок LXXVII, число 25 (3946, Нови Сад, 18. юний 2021, б. 18.
- Тамаш, др Юлиян, „Просвитни роботнїки 1944-1991. рокуˮ, Руски Керестур, лїтопис и история (1745-1991), Месна заєднїца Руски Керестур, 1992, бок 414.
Вонкашнї вязи
[ушориц | ушор жридло]- Члени Дружтва, чис. 169. Мелания Мудри, 1975, вебсайт Дружтва за руски язик, литературу и културу, druztvo.org
- Дю. Латяк, Умарла учителька Мелания Мудри (1933-2021), Рутенпрес, ruskeslovo.com, 16. юний 2021.