Мандулї

Мандулї анат. (лат. Tonsilla, серб. крајници, рсй. минда́лины, укр. мигда́лики, поль. migdałek podniebienny, горв. tonzile, mandule або krajnici, а тото од мадь. mandula, цо значи – анат. мандулї) то ґрупи лимфней тканї хтори ше находза спод епитела у устох и пажераку. Вони правя лимфоцити и часц су имунскей системи, а улога им защициц горню часц системи за диханє од инфекцийох.

Файти мандульох

– поднєбни мандулї (лат. tonsilla palatina),

– пажераково мандулї (лат. tonsilla pharygea),

– язични мандулї (лат. tonsilla lingualis),

– тубово мандулї (лат. tonsilla tubaria).

Шицки тоти мандулї творя ткв. Валдеєров лимфатични персцень (лат. annulus lymphaticus Waldeyer). Мандулї найвекши у дзецинским возросту, а у периодзе пубертету починаю помали атрофовац пре зменмшанє числа лимфових ґужлїкох.

Здрави мандулї преткани з имунима клїтинками хтори знїщую бактериї и вируси, медзитим, охорени мандулї преткани з микроорґанизмами хтори спричинюю жирячиско запалєня у орґанизме, хторе ше може прешириц и на други орґани. З одстраньованьом охорених мандульох елиминуєме жирячиско хторе валя имуну систему.

Знаки звекшаних мандульох:

• паузи у диханю у сну

• храпенє

• очежане диханє

• углавним диханє на уста

• части прехлади

• чежкосци при лїґаню

• нємирни сон, мокренє до посцелї и часте будзенє

• нєзвичайни положеня спаня як цо нагнута глава назадок

Знаки запалєня мандульох:

◆ Горучка

◆ червенкаста фарба мандульох

◆ оток

◆ боль у гарлє, хтори дзекеди провадзи и боль у уху

◆ жовте або биле премасценє на мандульох

◆ боляце або нєприємне лїґанє

◆ блага пременка гласа пре оток

◆ оток лимфних ґужлїкох

◆ нєприємни запах

Звекшани мандулї можу привесц до:

◆ инфекциї респираторного тракту

◆ храпеня

◆ краткого претаргнуца диханя у сну

◆ погришного поровнаня видлїци и пременки положеня язика

◆ инфекциї штреднього уха

◆ хронїчного синуситису.

Литература

Словнїк руского народного язика I, А – Н, Нови Сад 2017, б. 700.

Вонкашнї вязи

Крајници

krajnici i imuni sistem