Любомир Дудаш
| Любомир Дудаш | |
|---|---|
 | |
| Назвиско | Инґе |
| Датум народзеня | 13. фебруара 1955. |
| Датум упокоєня | 21. септембра 2025 (71) |
| Державянство | сербске |
| Язик творох | руски, сербски |
| Школа | Ґимназия, Руски Керестур |
| Школа у фаху | Школа фото-репортерох Югославянского институту за новинарство, Беоґрад |
| Период твореня | 1985 — 2015. |
| Жанри | фоторепортерство, новинарство, аматерска ґлума |
| Поховани | у Руским Керестуре |
Любомир Дудаш (*13. фебруар 1955 —† 21. септембер 2025), новинар, фоторепортер, длугорочни ґлумец-аматер ансамблу РНТ Петро Ризнич Дядя и сотруднїк Руского слова.
Биоґрафия
[ушориц | ушор жридло]Любомир Дудаш Инґе народзени 13. фебруара 1955. року у Вербаше. Основну школу закончел у Руским Керестуре, а потим од 1970. року бул школяр першей ґенерациї Другей рускей ґимназиї у Керестуре. После Пионирскей заградки, уж як штредньошколєц писал за праве формовани МАК. Од ґимназийских часох интересовала го фотоґрафия. Знова у першей ґенерациї, 1981/1982. року закончел Школу фото-репортерох Югославянского институту за новинарство, дзе му ментор бул Томислав Петернек, доаєн югославянскей новинарскей фотоґрафиї. Од 1985. року та шлїдуюци 30 роки по пензионованє 2015. бул заняти у ИПЦ Кула як фоторепортер и технїчни редактор, а потим и редактор, и новинар рускей и сербскей редакциї, редактор рускей радио-програми, прекладатель…
Тиж од школских дньох, Любомир Дудаш Инґе бул активни и присутни у руским театре. Ґлумел у дзецинских представох учителя Евґения Медєша, а потим од 1981. року ґлумел у скоро 20 руских представох за одроснутих же би ше зоз сцени поцагнул 2017. року, после Ковальох.
Скоро през цали професийни вик, а окреме одкеди пошол до пензиї, Любомир Дудаш Инґе бул и сотруднїк Руского слова. Обявйовал фотоґрафиї, репортажи, опробовал ше як фельтонист, а бул и редактор гумористичного додатку Дикица. За свою замерковану роботу, з нагоди 75-рочнїци НВУ Руске слово, Любомир Дудаш Инґе 2020. року достал Награду Редакциї новинох.
Як пензионер Любомир Дудаш ше анґажовал у роботи Здруженя пензионерох Руски Керестур, чий бул и предсидатель.
Любомир Дудаш умар у Руским Керестуре 21. септембра 2025, у 71. року живота. Поховани є на теметове у Руским Керестуре.
| Любомир Дудаш ґлумел у шлїдуюцих театралних фалатох
| |||
|---|---|---|---|
| Рок | Театрални фалат | Улога | |
| 1981. | Е. Лабиш-М. Мишел: ФЛОРЕНТИНСКИ КАЛАП | Тардиво | |
| 1982. | Б. Нушич: ПОДОЗРИВА ОСОБА | Алекса Жунич,
срезки шпиюн | |
| 1984. | О. Давичо: ПИСНЯ | Дьордє | |
| 1985. | М. Ковач: ГРИЦОВО ВОЯЧЕНЄ | Гасо | |
| 1986. | Дю. Папгаргаї: БАВИСКА ЗОЗ СЛАМИ | Сима | |
| 1993. | Рей Куни: СЦЕКАЙ ОД СВОЄЙ ЖЕНИ | Дипон Синат, таксиста | |
| 1996. | Дю. Папгаргаї: ЖОБРАЧА ГОРА | ||
| 1999. | Ж. Фейдо: ПАН ЛОВАР | Други милиционер | |
| 2003. | Др Г. Костельник: ЄФТАЙОВА ДЗИВКА | ||
| 2004. | Р. Доманович: СТРАДИЯ | Колб, Граждан, Посланїк | |
| 2005. | Душан Ковачевич: ЗБОРНЕ МЕСТО | Докор Катич | |
| 2005 | Муза Павлова: КАРУСЕЛ | Коцкар, Стретнуце | |
| 2008. | А. Николай: ГАМЛЕТ У ПИКАНТНЕЙ МАЧАНКИ | ||
| 2009. | М. Х. Кан (М. Канюх): МУДРИЛО | ||
| 2011. | М. В. Ґоґоль: КОЦКАРЕ | ||
| 2012 | Х. Бойчев: ОБЛАСНИ ШПИТАЛЬ | ||
| 2016. | Е. М. Кочиш: ВОНА НЄ ВИНОВАТА | ||
| 2017. | М. Николич: КОВАЛЄ | ||
Литература
[ушориц | ушор жридло]- Дюра Латяк, "Любомир Дудаш - новинар, глумец аматер", 50 роки Драмского меморияла Петра Ризнича Дядї, Завод за културу войводянских Руснацох, НВУ Руске слово и Дом култури Руски Керестур, Нови Сад, 2018, бок 146.
- Тамаш, др Юлиян, „Дом културиˮ, Руски Керестур, лїтопис и история (1745-1991), Месна заєднїца Руски Керестур, 1992, бок 420.
Вонкашнї вязи
[ушориц | ушор жридло]- Славко Винаї, Любомир Дудаш у емисиї Мой швет. Маковчань, www.youtube.com, юлий 5, 2023.
- Яким Винаї, Месна орґанизация пензионерох зоз Руского Керестура отримала Рочну скупштину. РТВ, 17. фебруар 2025.
- ВОНА НЄ ВИНОВАТА, Датум премиєри: 24.10.2015. Руски Керестур, вебсайт rntdjadja.com
- И. Сабадош-А. Медєши Упокоєл ше Любомир Дудаш (1955-2025). Рутенпрес, 21. септембер 2025.