Линийни систем

Нєвиписани - празни линийни систем

Линийни систем (линийски або нотни систем) (франц.: portée, анґл.: staff, stave, ит.: pentagramma, нєм. Notensystem, Notenlinien)^[1] служи як основа до хторей ше записую ноти (нота то знак хтори означує висину, тирванє тона, гласносц итд.).

Кратки историят

Линиї ше у музики почали хасновац ище од 10. вику. З помоцу нїх ше одредзовала висина неумох (тедишнї знаки за тони). Предходно ше хасновали єдна лєбо два линиї а потим познати штредньовиковни теоретичар музики Ґвидо зоз Ареца (995 - 1050) поставел основу нотней системи и одредзел же би ше неуми писали на 4 линиї. На початку линийох уписовал (нотни) ключи, так же позиция нотней глави означовала висину тона (слика на право).

Предносци нєшкайшей линийней системи

Нєшкайши линийни систем сучаснєйши и вельо совершенши од дакедишнього прето же оможлївює точнєйше (дакедишнї систем таку можлївосц нє мал) записованє:

• висину тонох,

• тирванє тона,

• интервалски розмаки медзи тонами.

Надпомнуце: Означованє способу виводзеня дїлох, односно знаки за интерпретацию, музичаре уписую над линийну систему.

Основни характеристики линийней системи

♦ Линийна система ше состої зоз 5 горизонталних паралелних линийох и 4-ох пражнїнох (пражнїна то простор медзи линиями). Линиї линийней системи ше читаю од долу на горе. До ньго мож записац 11 розлични основни ноти/тони.

♦ Помоцни линиї (помоцнїци) же би ше огранїчени линийна система преширела, над нїм и под ню ше додаваю помоцни линиї - помоцнїци. Найчастейше 4-5 нависше и 3-4 нанїжей, прето же ше зоз нїзшима нотами преходзи до другого ключа: ^[2]

Помоцни линиї пошлїдок дакедишнєй вельолинийней системи хтору ушорел Ґвидо зоз Ареца у 11. вику.

Елементи линийовей системи

♦ Kлюч

На початку линийней системи кладзе ше знак хтори ше вола ключ (франц. и анґл. clef) [1][3] на основи хторого ше одредзує мено ноти и єй октава (хторей октави ноти припадаю). Нєшкайша музична нотация позна вецей файти ключох. Ту приказани лєм тоти хтори ше найвецей хасную:

᛫ G-ключ (або виолински ключ)

Записує ше го од другей линиї и дава мено ноти g1 (сол) у першей октави.

Виолински ключ найбаржей хасную инструменти: виолина, флаута, обоа, кларинет, саксофон, труба. Тиж кед ше грає зоз праву руку на гарфи и на клавиру, з праву руку на гармоники (дискант –типки лєбо ,,ґомбички"), єдна часц на удерних инструментох. До линийовей системи зазначую ше ноти зоз першей и єдна часц зоз другей октави, док ше ноти часц другей, у трецей, штвартей, пиятей октави записую з помоцу помоцних линийох (помоцнїцох) над линийовей системи.

• F-ключ (бас ключ)

Зазначує ше го од штвартей линиї и дава мено ноти f (фа) у малей октави. Бас ключ хасную тоти инструменти: виолончело, контрабас, хорна, тромбон, бас кларинет, фаґот, гармоника (лїва рука-баси), на клавиру лїва рука и гарфа. Тони субконтри и контра октави зазначуєме з помоцнима линиями –смужками (помоцнїцами) под линийову систему.

• C - (Це) ключи (вокални ключи)

C-ключи ше волаю и вокални ключи прето же су вигодни за зазначованє шпивацких гласох. Шицки даваю мено ноти це1 (до) у першей октави. Найчастейше ше хасную алт и тенор ключ.

• Алт (алтов) ключ

Зазначує ше на трецей линиї и дава мено ноти це1 (до у першей октави) на трецей линиї. Алтов ключ хаснує виола.

• Тенор (теноров) ключ

Хаснує ше на штвартей линиї и дава мено ноти це1 (до у першей октави) на штвартей линиї. Теноров ключ хасную инструменти виолончело, фаґот, и тромбон за високи ноти же би ше заобишло писанє вельо помоцнїцох (помоцних смужкох).

Приклад як ше єдна иста нота це1 ("до" у першей октави) зазначує у спомнутих трох ключох: :

♦ Пред'знаки

Пред'знаки ше пишу:

Споза нотного ключа и важа нєпреривно за истоменни ноти у композициї. Вони представяю скали (дурски, молски, молдур), односно вяжу ше за такв. тоналитет.

Пред'знаки можу буц написани и опрез ноти на истей линиї лєбо у пражнїни и одноша ше на истоменни ноти у тим такту .

♦ Такти

Такт (музика) то найменша метрично одредзена часц композициї хтори змесцени медзи два тактово смужки (тактовки). Тактовка то вертикална линия през линийни систем хтора роздзелює такти.

У музики постоя вельо файти тактох. Вони ше зазначую на початку линийней системи, за ключом або за пред'знаками (хтори означую тонски род; дур, мол, молдур и др. односно тоналитет) и то зоз розламку, без розламковей смужки.

♦ Ноти

.

Нота то знак за зазначованє висини и тирванє тонох у линийней/линийскей системи, розличного випатрунку (елипсова, зоз нотну смужку, виполнєта-почарнєта зоз нотну смужку и єдну заставку, двома, трома итд.)

♦ Паузи

Пауза у музики знак за претргнуце (знак за кратшу або длугшу прерву цека у композициї). Паузи ше тиж записую до линийней системи спрам випатрунку и места хтори їм припадаю.

♦ Заградзенє, аколада (велька тактовка)

• Аколада: вецей линийни системи на початку партитури мож означиц зоз такв. заградзеньом, т.є. скапчац зоз вельку тактовку або аколаду (франц: accolade, анґл.: brace, bracket, accolade, ит.: graffa, нєм.. Akkolade, Klammer).^[3]

Заградзеня - аколади можу буц:

а) угласти [ ] або б) заокруглєни/габасти { }

Практични приклад як випатраю 2 и 3 линийово системи зоз заградзеньом (велька тактовка-аколада):

Заокруглєна / габаста { аколада

(велька тактовка) у партитури за клавир:

Угласта аколада [ (велька тактовка / заградзенє) за смикови трио:

Угласта [ и габаста { аколада (одноцно велька тактовка, заградзенє) у партитури за дуйни оркестер и тимпани:

Нотни приклад:

Референци

↑ Властимир Перичић Višejezični rečnik muzičkih termina Београд, SANU - Zavod za udžbenike i nastavna sredstva - Univerzitet umetnosti, 1997, 608 str.
↑ Radivoj Lazić, Škola za klarinet: Učim klarinet I
↑ Akolada (muzika) (язик: польски)

[1] Властимир Перичић Višejezični rečnik muzičkih termina Београд, SANU - Zavod za udžbenike i nastavna sredstva - Univerzitet umetnosti, 1997, 608 str.

[2] Radivoj Lazić, Škola za klarinet: Učim klarinet I

[3] Akolada (muzika) (язик: польски)

[1]

[2]

[3]