Либретиста
Либретиста (слово "либретиста" походзи зоз ит. слова "libretto", хторе значи "кнїжочка " або "мала" (од "libro" - "кнїжка") то писатель, творец либрета – текста за музично-сценске дїло як цо то опера, оперета, мюзикл, ораториюм лєбо кантата.[1] Либретиста пише, твори тексти хтори ше шпиваю (ариї, хорски часци) лєбо вигваряаю (диялоґи, рецитативи), и на тот способ формує збуванє, особи и драмску структуру дїла у пригодней форми за музичну обробку.
Дефиниция либрета
[ушориц | ушор жридло]Либрето (итал. libretto – "кнїжочка") то текстуални модел (образец) за музично-сценске дїло. Либрето содержи комплетни текст хтори ше виводзи, уключуюци шпивани часци, рецитативни диялоґи (кед постоя), як и сценски инструкциї (дидаскалиї) хтори описую збуванє, випатрунок сцени або справованє особох. Либретиста ма задаток написац текст хтори провадзи музику, дефинує дїю-збуванє, особох и цалу драмску структуру.[2]
Улога и задатки либретисти
[ушориц | ушор жридло]Улога либретисти зложена и вимага специфични схопносци. Його главни задатки то:
• Творенє або адаптация приповедки: Либретиста може написац ориґиналну приповедку лєбо адаптує постояце литературне дїло (роман, драма, приповедка, сказка) за потреби музично-сценске виводзенє.
• Формованє драмскей структури: Орґанизованє збуваньох до дїйох и сценох, дефинованє заплєтох, кулминациї и розплєтох на способ хтори одвитує музичному цеку.
• Розвой особох: Творенє прешвечлївих особох и їх медзисобних одношеньох.
• Писанє текста за шпиванє: Креированє стихох за ариї, дуети, ансамбли и хори, водзаци старосц о ритме, метрики и звучносци словох же би були вигодни за шпиванє и музичну обробку.
• Писанє диялоґох або рецитативох: Формулованє бешедних часцох або текстох за рецитативи хтори водза збуванє медзи музичнима нумерами.
• Сотрудзованє зоз композитором: Либретиста вше муши блїзко сотрудзовац зоз композитором.
Одношенє зоз композитором
[ушориц | ушор жридло]
Сотрудзованє зоз либретистом и композитором значне за творенє успешного музично-сценского дїла. Тото одношенє може мац различни форми:
• Текст скорей музики: Либретиста перше напише текст, а композитор го потим музично обрабя (части случай у 18. и 19. вику).
• Музика скорей текста: Композитор ма музичну идею або схему-модел, а либретиста пише текст хтори ше уклопює до тей музики (ридко алє ше случує).
• Паралелна робота: Композитор и либретиста робя вєдно, медзисобно уплївую на розвой и текста и музики (характеристичне за велї мюзикли и блїзки сотрудзованя як цо то тоти медзи Р. Штраусом и Хофманом).
• Композитор як либретиста: Даєдни композиторе, як цо то Ригард Ваґнер або Рудєро Леонкавало, сами писали либрета за свойо опери.
Часто потребно же би либретиста прилагодзел текст музичним вимогом (напр. понавянє стихох, скрацованє або преширйванє сцени).
Схопносци либретисти
[ушориц | ушор жридло]Добри либретиста треба же би мал:
♦ Таланат за драмске писанє (структура, диялоґ, характеризация).
♦ Поетски сензибилитет и схопносц писаня стихох.
♦ Разуменє музики и музичних формох (ария, рецитатив, ансамбл, финале).
♦ Свидомосц о можлївосцох людских гласох.
♦ Способносц збиваня-скрацованя и адаптациї зложених наративних часцох.
♦ Схопносц сотрудзованя зоз композитором и другима членами авторского тима.
Познати либретисти
[ушориц | ушор жридло]Дзепоєдни зоз познатих либретистох то; Пєтро Трапаси (1698–1782) познатши як Метастазио (Pietro Metastasio) и Отавио Ринучини (Ottavio Rinuccini).
Познати либретиста зоз 18. вику бул и Лоренцо Да Понте. Написал либрета за три найобсяжнєйши Моцартово опери, та и за велїх других композиторох. Ежен Скриб бул єден зоз найплоднєйших либретистох 19. вику, компоновал тексти за дїла Маєрбера (зоз хторим мал тирваце сотрудзованє), Обера, Белиния, Доницетия, Росиния и Вердия. Французки писателє либрета Анри Меяк и Лудовик Галеви написали вельо оперски и оперетски либрета за композиторох: Жак Офенбах, Жил Масне и Жорж Бизе. Ариґо Боито, хтори писал либрета, медзи другима, и за Дюузепа Вердия и Амилкара Понкиелия, тиж и за свойо два власни опери хтори компоновал.
Постоя копозиторе хтори и сами писали либрета а найвизначнєйши бул Ригард Ваґнер (Rihard Vagnera), хтори познати по тим же писал либрета за свойо власни опери.
Статус либретистох
[ушориц | ушор жридло]Либретисти историйно патраци нє були тельо визначовани як композиторе. У дзепоєдних оперох зоз 17. вику хтори ше виводзели, мено либретисти нє було анї зазначене. Аж кед ше почали либрета друковац за предаванє/за предай на представох таки записи баржей обставали од нотних записох (у рукопису). Медзитим и концом 18. вику ище вше ше ридко споминало либретистох а то констатовал и записал либретиста Лоренцо Да Понте у своїх мемоарох.
През длуги период ше розправяло питанє цо важнєйше у опери –музика чи текст (слова). Велї трактати о тим написани. (За приклад розправи и хтори були основа вжати два опери „Капричо“ Ригарда Штрауса и „Перше музика а потим слова“ („Prima la musica e poi le parole“) Антония Салиєрия. Новши часи допринєсли тому же ше меную обовязково попри композиотрох и автора либрета у музично-сценских дїлох.
Вонкашня вяза
[ушориц | ушор жридло]
Референци
[ушориц | ушор жридло]- ↑ Warrack, John; West, Ewan, ур. (1992). „Librettist”. The Oxford Dictionary of Opera. Oxford University Press. стр. 409. ISBN 0-19-869164-5.
- ↑ Macy, Laura (ур.),,Libretto" Grove Music Online. Oxford University Press. Приступљено 2025-04-25. (Потребна претплата или институционални приступ)