Летенка

Летенка - место за вилєт у централней часци Фрушкей гори, на подручу општини Беочин у Войводини. Од Червеного чоту, найвисшого фрушкогорского верху (539 метери), оддалєна є 4,2 километри. Находзи ше на надморскей висини 454 метери. Прейґ Беочину з асфалнима драгами повязана є з Новим Садом, прейґ Лежимиру зоз Сримску Митровицу, прейґ Червеного чоту и Ирижским венцом з Руму и прейґ валалу Визич з Бачку Паланку.

Походзенє мена

Лексема летенка назва за вичножелєну рошлїну. Корень лет- дал велї виведзени слова чия семантика вязана за «лєто»: влєце, лєтушнї, под час лєта, док тирва лєто, лєтнїковец итд.

Павильон школи у природи

Летенка населєнє павильонского типу, ма пейц обєкти, у хторих єст спальнї за 400 школярох, учальнї, ресторан, анбуланта и предавальня сувенирох. На тей локациї направени и три бавилїща: за мали фодбал, одбойку и кошарку. На сиверним боку велька пажца, зоз хторей ше пресцера красни попатрунок на Дунай и Бачку. Южни схили оброснути з мишаним лєсом (дуб, лїпа, граб, а єст и поєдинєчни стебла буку, ясену, клєну и глоговей куцкуруши /Sorbus torminalis/).

Обєкти хтори ше находза у Младежским населєню направени 1975. року. На початку осемдзешатих рокох прешлого вику комплекс почал функционовац як школа у природи за змесценє дзецох предшколского и школского возросту. Под час войнох 90-их рокох 20. вику служел як вибеженски камп.

Одпочивалїще нєшка под руководством Покраїнского заводу за спорт и медицину спорту Влади Войводини, хтори орґанизує роботу лєтнїх школох природи, насампредз за школярох основних школох и за нащивительох спотрских кампох.

Горяцка дражка

За обиходзенє околїска младеж 1978. року направела пешацку дражку на потесу Червени чот-Летенка-Вармедьски чот, коло 7 километри. Тота дражка Младежских роботних бриґадох повязує дзепоєдни вилєтнїцки и историйни места.

Од Летенки на восток дражка водзи през стари дубов лєс у хторим єст и лїпи и буку, по место Широки Дол, дзе гроб партизанки Радинки Витасович Лепинїци. Оталь дражка идзе до Ябуки (локалитет дзе було осамене старе стебло яблонї). Ту бул партизански штаб под час НОБ-а, а тераз ше коло студнї находзи памятни теметов у хторим поховани партизанє хтори погинули у нєприятельскей офанзиви на Фрушку гору у авґусту 1942. року.

Од Ябуки дражка идзе през лєс по Червени чот, през места Лїпов чот, Груби дуб и Кралєвац. При месце Иконице виходзи ше на Партизанску драгу и крижну драгу Беочин-Бешеново.

Дражка од Летенки на заход водзи прейґ пажици през лєс. На 150 метери находза ше Панєви, а оталь ше през лєс приходзи на Гайдуцки брег, дзе справени памятнїк як знак здогадованя на снованє Фрушкогорского партизанского одряду 9. септембра 1941. року.

Єдинствени природни ридкосци

Дражка ше, од места Панєви прейґ предїлу хтори ше вола Мошов гроб, закончує на Вармедьским чоту, дзе защицени природни ридкосци: пещера на южних схилох, ґеоморфолоийни обєкт єдинствени у Фрушкей гори и стебло глоговей куцкуруши, ридки прикладнїк по своїх димензийох, положени под защиту 1965. року. При Вармедьским чоту виходзи ше на драгу хтора водзи на Андревє.

Литература

Енциклопедия Нового Саду 13, ЛЕС – МАП, Нови Сад 1999, б. 18

Вонкашнї вязи

Izletište Letenka, вебсайт Dečiji Grad, decijigrad.rs

Излетиште Летенка (Фрушка гора), вебсайт novisad.travel

Летенка, Википедия на сербским язику, sr.wikipedia.org, 22. фебруар 2008.