Лайбик

Лайбик (серб прслук; з истим або подобним значеньом всл. lajbik и lajblik; слц. lajblík; карп.укр. лайбик и лайбек; од нєм. Leibchen) часц хлопского облєчива без рукавох:

Леґиньом було перше ношиво: чарни ранцовани чижми и били ценки длугоки и широки ґачи, лайбик (чарни) з велькима ґомбичками и чарни калап. Часто лайбик похасновани як часц нашей традицийней ношнї а тиж и дургих народох у Сербиї.^[1].

Файти

Нєшка єст вельо файти лайбикох розличних файтох хтори ше хаснує за рижни наменки. Лайбики тиж мож подзелїц и спрам материялу зоз хторих су ушити.

Штрикани або ткани лайбик без отвору

Таки лайбик найподобнєйши трикову, алє нє ма рукави. Ноши ше го прейґ даєдней другей шмати за облєканє (блузни, сукнї, кошулї, рекельче) як цеплотну защиту, алє и як модни детаљ. Лайбики хтори штрикани лєбо геклани, найчастейше штрикани зоз правей волни, синтетичней лєбо памучних нїткох.^[2]

Лайбик на закапчованє

Тота файта лайбику ма спредку отвор хтори ше закапчує з ґомбичками. Популарни є за ношенє поверх кошулї у шветочних и урядових нагодох.

Лайбик за означованє

Лайбик за означованє ше часто вола ище и рефлектуюци лайбик. У скорейшим периодзе тота файта лайбику нєобходни деталь на велїх местох дзе треба означиц особу хтору треба обачиц же би ше обкеровало нєщесце. У каждодньовим хаснованю є на транспортнїцох за означованє транспортних милиционерох,

окончовательох роботох на драги, алє и вожачох на драги. У автох постал таки лайбик обовязна опрема.

Защитни лайбик

Защитни лайбик ше часто вола и панцирни лайбик. Тота файта лайбику постала нєзаменлїви деталь при воєних и полицийних оперативцох, як и при особним обезпеченю. Його основни циль защициц цело од кулькох хтори виштрелєни з огньового оружия. Прави ше го з барз моцних синтетичних материялох з укладаками з даякого металу хтори ублажую вдеренє кульки.

Лайбик за ратованє

Тота файта лайбику найчастейше направена з водоодпорних материялох и лєгко ше полнї з воздухом. Основна наменка му ратованє при чиряню. Прето є нєобходни предмет у скоро шицких файтох плївадлох. Тиж так є обовязни и у авионох у случаю примушуюцого злєцованя на воду.

Женски украсни лайбик

Нєшка и жени часто ноша лайбики як часц облєчива або як модни деталь. Звичайно ше их шиє як верхню часц ґу панталоном, або ше их комбинує у поглядзе материялу, фарби и крою ґу шосом або костимом. Єст штофово лайбики, з тексас-платна, гадвабни, брокатово, лєново, зоз синтетичних масох итд.