Ладичка

Ладичка (серб. ладица, фијока; всл. ladzečka, ładzička; од мадь. fiók )

1. Менша лада;

2. Фийовка на вицагованє у столє або орманє з отвором на верху же би ше дошло до того цо ше у нєй находзи.^[1] Прави ше их у форми правоугелнїка же би ше найлєгчейше уклопели и положели до стола або ормана. Найчастейше ше их прави з материялу з якого направени и ствари до обисца (древо, иверица, пластика, метал). Ладичка ма ручку зоз хтору ше ю отвера. Кед ладичку треба лєпше защициц, хаснує ше ладички зоз замчками и системами за замиканє:

До (столовей) табли од сподку ше хпала ладичка (фийовка) ... У ладички стал хлєб або ложки и видлїчки;

3. Кошнїца:

Майстор видумал ладичку и рамики од ладичкох. ... И нашо прадїдове пчоларели у лозових кошнїцох, вец у дикиньових, а на остатку у ладичкох з дескох. ... Людзе сами правели ладички за пчоли, котрих дески нє були добре поклиєни та ше през жиму пчоли помарзли;

4. Ладичка за руцанє циґарчкох при куреню:

... и то у каждого ше курело (на праткох), а на жем руцал, та розчухал тот ґибак. А вецка, уж после ладички зоз пирню уж почали жени видумовац: „Нє сцем ґибаки да ми ту, руцай до лавора лєбо до ладички!”

Конструкция

Ладички можу буц направени на розлични способи хаснуюци рижнородни материяли, уключуюци древо, рижни древени композити; фурнир. лесонит и под,, плех и пластику.

Древени ладички часто од предку хторим видлїва предок направени естетски совершено, док боки фийовкoх часто з другого материялу. Же би ше дно обезпечело, звичайно ше на штири вертикални боки правя жлєби/урезани ярчок хтори трима дно ладички на месце. Дно ладички ше лїпи за „ярчки” або прикруцує знука на боки одвитуюци механїзем же би ше боки твардо тримали.^[2]^[3]