Куцкуруша

Куцкуруша
Наукова класификация
Домен	Eukaryota
Царство	Plantae
Кладус	Tracheopytes
Кладус	Angiospermae
Кладус	Eudicotidae
Кладус	Rosids
Ряд	Rosales
Фамилия	Rosaceae
Род	Sorbus
Под род	Sorbus subg. Cormus
Файта	S.domestica
Биномне мено
	Sorbus domestica
	Linnaeus

Куцкуруша (лат. Sorbus domestica) то лїсцопадна файта древа зоз фамилиї Rosaceae.^[1]

Розширеносц

Розширена є у южней и стреднєй Европи, сиверней Африки, на Криму и у Малей Азиї. Чежко одредзиц точни гранїци природней розширеносци, понеже є од давна садзена и спонтано преширена. Чежиско ареала на Балканским полуострове, Апенинским полуострове и у южней Французкей.

Випатрунок

Куцкуруша то 15—20 метери високе древо широкей оругло вайцастей коруни. Лупа древа ґарово-шивей, червенкасто-кафовей до цмо-шивей фарби, часточно ше одлупює, а познєйше є подлуговасто плочасто попукана. Корень єй подобни шерцу зоз розконаренима добре розвитима жилами. Младнїки жовкасто-кафовей фарби, голи, часточно прекрити зоз шивкастим пасмом епидерма, посипани зоз лентицелами. Кратки младнїки числени и персценясто зранцавени.

Пупча спирално розпоредзени коло младнїка, длуги коло 1 центиметер, вайцасто копасти, тупо кончистого верха, прекрити зоз векшим числом лупкох. Лупки пупчох широки, лїпкаци, желєнкасти, часточно червенкасти з цмейшима рубцами, голи, блїщаци. Верхове пупче векше и видлуженше од бочних хтори часточно нагнути ґу младнїку, отворених верхох. Кед лїсце одпаднє остава троугласти шлїд або шлїд хтори здабе на полумешац зоз пейцома преводнима снопчками.

Лїсце длугоке 15—18 центиметри, составене од нєпарого числа лїсточкох хторих єст од 11 до 21, а вони уско длуговасти, длугоки 3 до 8 центиметри, симетричней основи, оштро назубеного рубца, од верху голи, а од долу прекрити з мохотками, познєйше голи и белавкасто-желєни. Вєшенї почервеня та лїсточка вчас одпадую.

Квитки двополни, ентомоґамни, били, широки коло 1,5 центиметра, 35-75 квитки склопени до 6-7 центиметри широкей ґронї. Лїсточка у погарику єст 5, прашнїки 20, плодни лїсточка 5, подполно зроснути, шиї тлучка 5. Квитню у маю и юнию.

Плоди сочни, здабу на яблуко або грушку, длугоки су до 3 центиметри, жовкасто-желєни до кафовкасти, посипани зоз лентицелами, а на ослункованим боку червенкасти. Горко-кваскавого су смаку, а аж кед одстоя и после першого мразу поставаю кафово, мегки, смачни и сладки. Дозреваю у септембру и октобру, маю 5-6 нашенька, хтори до 7 милиметри длугоки, широко вайцасти, скляпчисцени, кончистого верху, кафово, вецей або менєй швицаци. Нашенє розноши дзивина, птици и глодаре.

Еколоґийни свойства

Рошнє помали (окреме у младосци), а може дожиц старосц 200—300 роки. То хелиофилна и калцифилна файта, хтора лєм у вчасней младосци часточно подноши хладок. Люби цеплу и благу климу. Нє вимага окремни условия цо ше дотика квалитета, алє найлєпше рошнє у глїбокей и плодней жеми. Добре подноши сушу, а чувствительна є на позни ярнї мрази. Вжиме може витримац температуру до -30°С. Чувствительна є на компетицию дригих файтох. То пионирска файта зоз широку еколоґийну валенцию.^[2] Зявює же поєдинєчно або у менших ґрупох на надморскей висоти до 1400 метери (у медитеранским подручу), а у стреднєй Европи до 650 метери.^[3]^[4]

Хаснованє

Тварди плоди куцкуруши сцаговаци, горки и квашни. Аж кед длужей одстоя и после перших мразох, кед нагнїю, поставаю мегки, смачни и сладки. Плоди ше єдза сирови, а можу ше преробиц до маджуну або компоту. Хасную ше и як додаток при продукованю яблуковей палєнки або ше преробя до палєнки од куцкуруши. Куцкуруша ма у себе 11—14% цукру (вельо вецей фруктози як ґлукози). У презретей овоци єст и дакус алкоголу и яблуковей квашнїни (0,6%), танини, азотни материї и надосц целулози. Од витаминох, 100 ґрами маю коло 8 милиґрами аскорбинскей квашнїни и 2,5 милиґрами каротену. Плоди любя єсц сарнї и єленї. Од древа куцкуруши прави ше польопривредне орудиє, кундаки за пушки, древянки, палїчки за билияр, модели за ковальски фурми, чембала, шкотски ґайди и драгоцини мебель.

Галерия

Лїсце и плод
Сорбус доместица (лат.мено)
Узрети плоди
Узрета овоц
У Берлинскеј ботаничнеј заградки

Вонкашнї вязи

Oskoruša,agroklub.rs

Oskoruša, portalanalitika.me

Oskoruša, tehnologijahrane.com

Референци

↑ Wilson, B. (2018). "Sorbus domestica". Red List of Threatened Species. 2018 e.T79921100A119836528. Retrieved 30 May 2022.
↑ Bean, W. J. (1980). Trees and Shrubs Hardy in the British Isles 8th ed., vol. 4. John Murray ISBN 0-7195-2428-8.
↑ Hrdousek V. et al: "Oskeruše - strom pro novou Evropu" (tr. "Oskeruše - a tree for a new Europe"). Brazda, Hodonin, 2014, 240 pages; 550 pictures
↑ Speierling Sorbus domestica Beschreibung Steckbrief Systematik" www.pflanzen-deutschland.de (in German). Retrieved 6 January 2021.

[1] Wilson, B. (2018). "Sorbus domestica". Red List of Threatened Species. 2018 e.T79921100A119836528. Retrieved 30 May 2022.

[2] Bean, W. J. (1980). Trees and Shrubs Hardy in the British Isles 8th ed., vol. 4. John Murray ISBN 0-7195-2428-8.

[3] Hrdousek V. et al: "Oskeruše - strom pro novou Evropu" (tr. "Oskeruše - a tree for a new Europe"). Brazda, Hodonin, 2014, 240 pages; 550 pictures

[4] Speierling Sorbus domestica Beschreibung Steckbrief Systematik" www.pflanzen-deutschland.de (in German). Retrieved 6 January 2021.

[1]

[2]

[3]

[4]