Курнїк

Курнїк (серб. кокошинац, кокошињац, живинарник; всл. kurňik: kuri śpja v kurňiku) будинок у хторим дробизґ (живина) шпи. То сосотойна часц заднього двора, окремна простория дзе була вноци змесцена живина (дробизґ), поготов кури. Живину кажде обисце ховало. Курнїки найчастейше направени у гумнє (заднїм дворе) польопривредних/парастких ґаздовствох. През дзень живина бегала по дворе, а вечаром пред змерком сама одходзела до курнїку.

Курнїки були направени з дескох або набивани з глїни. У шопи спущеней з плєвнїка тиж могол буц направени курнїк.

Курнїк по горизонтали бул преградзени з падлащиком, хтори давал вигляд и здабал на пойдзик. Долу, на жеми, ноцовали качки и гуски. ,,На поверх,” т.є. на пойдзик живина виходзела по древеней драбинки. Там ноцовали кури и пульки. И горню и долню часц ше заверало з истима дзверками. У нєпреградзених курнїкох кури шедали на банти. Банти то ценши древа забити до бочних мурох. Велї менши обисца нє мали курнїки, та кури, пульки и друга живина шедали на ягоди або даяки други древа у дворе. Часто у шопи були направени драбинки, на хтори шедала живина.

Сучасни курнїки

Нєшкайши часи и нова технолоґия хованя живини допринєсла системи масовного хованя, односно пестованє и хованє живини на вельких живинарских фармох хтори оможлївюю векшу продукцию вайцох, лєбо векшого количества и продукциї живинского меса. У таких фармох живина (кури, пульки) заварти у окремних преградох-клїткох хтори змесцени єдна при другей, а часто вецей шори поставени и єдна над другу же би заберали менєй простору.

Клїтки обезпечени з покарму и воду и змесцени су у вельких галох дзе ше живина карми зоз окремну покарму: мишанїну зоз муки и рижних нашенькох, часцох даякей одрутней желєняви, млєти одпадки зоз косцох итд.

Нєшка у таких условийох квоки заменєни з инкубаторами, апаратами хтори розвиваю одвитуюцу цеплоту, на хторей ше можу вилягнуц нараз вецей тисячи курчатка. (серб [8])

Литература

• Словнїк руского народного язика I, А – Н, Нови Сад 2017, б. 658.
• Олена Папуга, Руске обисце, 2012. Бок: 46

Вонкашня вяза

• Ideje za izgled i funkcionalnost kokošinjca, www.agroklub.rs