Ксения Кугайда
| Ксения Кугайда | |
|---|---|
 | |
| Датум народзеня | 10. септембер 1947. |
| Датум упокоєня | 16. май 2026. |
| Державянство | югославянске, сербске |
| Язик творох | сербски, анґлийски, руски |
| Школа | Ґимназия, Нови Сад |
| Универзитет | Природно-математични факултет, Нови Сад |
| Наукови ступень | Доктор наукох |
| Период твореня | 1970—2012 |
| Жанри | наукова робота, образованє |
| Похована | Городски теметов у Новим Садзе |
Др Ксения Кугайда (*10. септембер 1947— †16. май 2026), була рядови професор на Природно-математичним факултету у Новим Садзе и руководителька Катедри за биохемию и хемию природних продуктох. Занїмала ше зоз хемийним, биолоґийним и фармаколоґийним виглєдованьом жовчових квашнїнох.
Биоґрафия
[ушориц | ушор жридло]Ксения Гарди ше народзела 10. септембра 1947. року у Коцуре, у учительскей фамилиї, оцец Микола Гарди и мац Мария родз. Гаргаї. Ксения мала младшу шестру Зденку. До основней школи Ксения Гарди почала ходзиц у Коцуре а кед була у висших класох фамелия ше преселєла до Нового Саду дзе Ксения закончела основне образованє и ґимназию. Студиї на Природно-математичним факултету у Новим Садзе Ксения уписала 1966. року а дипломовала 1970. року. Такой по дипломованю уписала маґистерски студиї хтори закончела з маґистратуру 1977. року.
Ксения Гарди ше одала за Мирослава Кугайду. У малженстве вони мали сина Ивана.
После маґистрованя Ксения Кугайда уписала докторантски студиї а докторску дисертацию одбранєла 1986. року. До званя доцента за предмет Препаративна биохемия вона вибрана 1988. року, до званя позарядового професора 1993. року а 1998. року Ксения Кугайда була вибрана до званя рядового професора.
Як стипендист ЕЕЗ-и вона була на постдокторским усовершовню на Универзитету у Ню Кастлу апон Тюне у Анґлиї.
По врацаню до жеми др Ксения Кугайда тримала преподаваня зоз предметох: Експериментална биохемия, Препаративна биохемия и Липиди и келийски мембрани. Була руководитель Катедри за биохемию и хемию природних продуктох по 1. октобер 2012. року кед пошла до пензиї.
У своєй професорскей кариєри др Ксения Кугайда була ментор 35 дипломних роботох, єдней маґистерскей роботи и трох одбранєних докторских дисертацийох. Була коавтор двох практикумох и єдней збирки задаткох. На науковим планє др Ксения Кугайда ше занїмала зоз хемийним, биолоґийним и фармаколоґийним виглєдованьом жовчових квашнїнох. Обявела 85 науково роботи у медзинародних и домашнїх часописох, мала 128 сообщеня на медзинародних и домашнїх наукових сходох и коавторка є двох моноґрафийох. Др Ксения Кугайда участвовала як сотруднїк на 14 наукових проєктох и єдним медзинародним проєкту. Коавтор є єдного патента приявеного у ЗАД.
Др Ксения Кугайда була член Сербского хемийного дружтва и Биохемийного дружтва Войводини. Тиж так, вона була активни член Дружтва за руски язик, литературу и културу (уписана була у реґистре Дружтва под числом 539). Сотрудзовала у Студиї рутеники и була сотруднїк на виробку Словнїка медицинскей терминолоґиї, сербско-руско-латински.
Ксения Кугайда ше упокоєла 16. мая 2026. року. Похована є на городским теметове у Новим Садзе.
Литература
[ушориц | ушор жридло]- Ирина Папуґа, Коцурски учителє - Мария и Микола Гарди, Studia ruthenica, чис. 3, Дружтво за руски язик и литературу, Нови Сад, 1992-1993, б. 341.
- Мирон Жирош, „Малочислени, а вельки народ (синтеза)ˮ, Бачванско-сримски Руснаци дома и у швеце 1745-1991, Том II, Грекокатолїцка парохия св. Петра и Павла, Нови Сад, 1998, б. 406 (40).
Вонкашнї вязи
[ушориц | ушор жридло]- Ksenija Kuhajda’s research while affiliated with University of Novi Sad, website www.researchgate.net
- Ksenija Kuhajda, Katedra za biohemiju i hemiju prirodnih proizvoda, vebsajt cris.uns.ac.rs,
- The Chair of Biochemistry and Chemistry of Natural Products, vebsajt www.dh.uns.ac.rs