Кревова ґрупа 0

Антиґени кревових ґрупох присутни у червених кревових заренкох и присуство IgM антицела у серуму креви

Нулта (0) кревова ґрупа, попри кревовей ґрупи А, Б и АБ, присутна при популациї людзох. Кажда кревова ґрупа достала назву по присустве одредзеного антиґену на блани наших червених кревових заренкох — еритроцитох. Источасне присуство А и Б антиґену маю людзе АБ кревовей ґрупи, а тоти без присуства гоч хторого антиґену то особи зоз 0 (нулту) ґрупу.

Австрийски лїкар и науковец Карл Ландштайнер, на початку 20. вику, одкрил тоти штири основни кревово ґрупи и за тото достал Нобелову награду з обласци медицини. Дальши науково виглєдованя приведли до спознаня же драга наставаня кревових ґрупох провадзела цалу драгу розвою чловечества. Америцки лїкаре, оцец и син, Джеймс и Питер Д Адамо, утвердзели факт же детерминанта одредзеней кревовей ґрупи присутна нє лєм у наших червених кревових заренкох, алє и у шицких наших клїтинкох, тканї и орґанох, та так цали орґанизем функционує спрам особеносцох кревовей ґрупи припаданя. У одношеню на поживу хтору кажди дзень єме, одредзена пожива нам барз хасновита, як лїк, даєдна нєутрална, а даєдна и нєадекватна (як отров и нє треба ю єсц, а то барз важне прето же єме даскельо раз на дзень).

Таблїчка компатибилносци креви

Приматель	Даватель
	O-	O+	B-	B+	A-	A+	AB-	AB+
AB+	X	X	X	X	X	X	X	X
AB-	X		X		X		X
A+	X	X			X	X
A-	X				X
B+	X	X	X	X
B-	X		X
O+	X	X
O-	X

Особи зоз кревову ґрупу 0 — ловаре, месоєди, моцни, самопрешвечени, тип вожда

История нултей кревовей ґрупи

Коло 40 000 роки пред н.е., у чаше хтори означени як Стари камени час, зявел ше Кроманьонски чловек, ришени вшелїяк прежиц. Бул то ловар и борец хтори єдол лєм месо и даяки плоди рошлїнох хтори зберал. Зоз датого периоду еволуциї датує найстарша кревова ґрупа — нулта (0). Єй добри боки то моцна имуна система, моцна система за претровйованє, природна защита од инфекцийох и ефикасни метаболизем. Од слабосцох при тих особох наводзи ше нєтолеранция ґу новому костираню и новим условийом околїска, а пре барз вельку активносц имуней системи може ше случиц же орґанизем „нападнє сам себе”, т.є. прихильносц ґу автоимуним хоротом. Окрем того, при тих особох, частейше як при особох зоз другу кревову ґрупу, обачує ше завадзаня при коаґулациї, стиданю креви, а прихильни су и на хороти запалєня, ревматизма, улкусней хороти жалудка и дванацпальцового черева (вреди у жалудку), та и на поремеценя у роботи щитного шлїжнїку.

Костиранє

Векшина особох нултей кревовей ґрупи ноша у себе ґенетску меморию за моц, витримовносц, сиґурносц до себе, интуицию, оптимизем, як и инстинкт за успих ище од початкох популациї. Їх орґанизем вимага високопротеїнске костиранє хторе їх мискулом обезпечує благу кваскавосц, цо им дава схопносц и ефикасносц при физичних активносцох.

Костиранє яке ше препоручує особом зоз нулту кревову ґрупу, а уплївує на лєпше функционованє и ефикасносц їх орґанских системох, состої ше преважно зоз месових жридлох — швиньского меса, говедзини, баранчецини, пульчецини, курченици, дзивини и риби. Тип 0 кревовей ґрупи може ефикасно претворйовац и метаболизовац месо, бо ма досц квашнїни у жалудку, цо праве одвитує частейшому наставаню катару, ґастродуоденитису, улкусней хороти, вреда жалудку и дванацнїка – дуоденума. Одвитуюца желєнява зоз хтору ше реґулує їх жалудкову квашнїну то найчастейше капуста, желєна шалата, броколи, шпинат, петрушка, хрин, цибуля, бундава, а од овоцох шлївки (и сухи), смокви. При векшини тих особох хасновити яблука, банани, кайси або грозно. Од присмачкох окреме ше им препоручує червену горку паприґу, петрушку, хлєбичок, кари, та морски алґи хтори маю за їх орґанизми потребни йод. Йод ключни елемент за реґулацию и нормалне функционованє роботи щитного шлїжнїку.

Особом нултей кревовей ґрупи житарки чкодза, жито и кукурица спомалшую їх метаболизем, цо спричинює спомалшене претворйованє поживи до енерґиї, а приходзи и до превелького нагромадзованя масцох. Пасулї трба єсц у огранїчених количествох, бо вона спомалшує розкладанє других значних состойкох, як цо тоти з меса, та на таки способ онєможлївює кваскавосц мускуловей тканї. Капуста, карфиол и броколи спомалшую роботу щитного шлїжнїку, а белава парадича и кромпля спричинюю запалєнє ставцох и потенцирую ревматизем при тих особох. Од овоци ше нє препоручую чернїци, кокос, динї, ягоди и мандарини, а од присмачкох нє треба хасновац цимет, попер, есенц (анї яблуков).

Диґестивни тракт нултей кревовей ґрупи нє адаптовани на хаснованє млєчних продуктох, млєка, аж анї сладоляду. У одношеню на витамини и минерали (микронутритиєнти), комплекс Б витаминох дїйствує як подпорка метаболичним процесом (окрем того з квасу и зоз жита), витамин К з лїсцових и желєних заградкових рошлїнох помага при коаґулациї креви, понеже тоти особи маю прихильносц ґу кирвавеню.

Од окремней значносци калциюм, поготив при роснуцу и у менопаузи, бо костиранє типу 0 нє черпа достаточно калциюму з млєка и млєчних продуктох.

Без консултациї з лїкаром нє препоручує ше дополнююце хаснованє векших дозох Е и А витамину пре їх дїйство на розридзованє креви.

Вежби за цело особох кревовей ґрупи 0 треба же би були: аеробик, бежанє, танєц, вежби зоз кулями и борительни спорти. Особи хтори нє манифестую свою физичну природу прейґ реаґованя на стрес можу спаднуц до депресиї, чувтвую вистатосц, нє можу спац, поставаю чувствительнєйши на велї запалєньски и автоимуни хороти, як цо то артритис, астма и поставаю прихильнєйши ґу затитосци.

Литература

• Християнски календар Руски календар 2005, бок 275—278, „Жиц у складзе з вашу кревову ґрупу”, автор асист. мр сц. др Владимир Сакач, специялиста интерней медицини

Вонкашнї вязи

• 9 tajni koje otkriva vasa krvna grupa www.danas.rs

• 8 stvari koje-morate da znate ako ste nulta krvna grupa www.telegraf.rs

• Ishrana za nultu krvnu grupu, fittproteam.com