Кревова ґрупа Б

Антиґени кревових ґрупох присутни у червених кревових заренкох и присуство IgM антицела у серуму креви

Кревова ґрупа Б, попри кревовей ґрупи 0, А и АБ, присутна при популациї людзох. Кажда кревова ґрупа достала назву по присустве одредзеного антиґену на блани наших червених кревових заренкох — еритроцитох.

Австрийски лїкар и науковец Карл Ландштайнер, на початку 20. вику, одкрил тоти штири основни кревово ґрупи и за тото достал Нобелову награду у обласци медицини. Дальши науково виглєдованя приведли до спознаня же драга наставаня кревових ґрупох провадзела цалу драгу розвою чловечества. Америцки лїкаре, оцец и син, Джеймс и Питер Д. Адамо, утвердзели факт же детерминанта одредзеней кревовей ґрупи присутна нє лєм у наших червених кревових заренкох, алє и у шицких наших клїтинкох, тканї и орґанох, та так цали орґанизем функционує спрам прикметох припаданя кревовей ґрупи. У одношеню на поживу яку кажди дзень єме, одредзена пожива нам барз хасновита, як лїк, даєдна нєутрална, а даєдна и нєадекватна (як отров и нє треба ю єсц, а то барз важне прето же єме даскельо раз на дзень).

Таблїчка компатибилносци креви

Приматель	Даватель
	O-	O+	B-	B+	A-	A+	AB-	AB+
AB+	X	X	X	X	X	X	X	X
AB-	X		X		X		X
A+	X	X			X	X
A-	X				X
B+	X	X	X	X
B-	X		X
O+	X	X
O-	X

История кревовей ґрупи Б

Коло 10 000— 5 000 роки пред н.е. , з дальшу еволуцию и пре селїдби людского роду помали настава преважно млєчно–месове протеїнске костиранє зоз додатком рошлїнових плодох яки росли у животним штредку. Як одвит на пременки у костираню знова наставаю ґенетски пременки и приходзи до твореня новей кревовей ґрупи — Б. Ґенетски патрено, тип Б у поглядзе костираня добре вибалансовани, щешлїва кревова ґрупа, прилагодзена на рижнородни, уравноважено, мишано тип костираня. Особи з тоту кревову ґрупу єдза шицко. Лєгко находза склад зоз розличнима типами особох, бо маю гармоничну ґенетску структуру и менєй су прихильни на спокуси и зраженя. Моцни су, осторожни, звичайно ше добре одупераю чежким хоротом сучасного часу, як цо хороти шерца и кревових судзинох, рак. Їх орґанизми виложени ридшим поремеценьом имунолоґийней системи, як цо то мултипла склероза, системски лупус и синдром хронїчней вистатосци, та одредзеним вирусним инфекцийом, алє у сущносци можу штреднє длужей жиц у одношеню ма особи других кревових ґрупох.

Особи зоз кревову ґрупу Б— номад; уровноважени, еластични, креативни

Костранє

До профилу костираня кревовей ґрупи Б як лїк уходзи баранчецина, баранїна, заячецина и дзивина. Од морскей поживи, на особи тей кревовей ґрупи позитивно дїйствує бакалар, ослич, скуша, нєутрални тунєвина и потька, а на шицки файти ракох и кориткох лєпше най забуду. Тоти особи єдини цо можу без огранїченя уживац у шицких файтох млєчних продуктох. Можу єсц пасулї, а препоручує ше им овшана мука и отруби, просо и рискашова мука.

За розлику од особох других кревових ґрупох, тип Б може у подполносци уживац у кромпьох, печаркох и шицких файтох капусти. Попри тим, як лїк им служи цвикла, броколи, петрушка, паприґа, карфиол, мархва, пастернак и белава парадича. До єдзеня можу додавац шицки присмачки окрем цимету и попру, а найбаржей им смакую петрушка, хрин, дюмбир, кари и пикантна червена папричка.

За особи з кревову ґрупу Б характеристични дефицит маґнезиюму, та треба най додаваю микронутритиєнти хтори змоцнюю имунитет, зменшую вистатосц, синдром хронїчней вистатосци, прихильносц ґу депресиї, вообще поремеценя нервовей системи. Рошлїна хтора хасновита як додаток ґу єдзеню то сибирски жен-шен, потим ґинко билоба, хтори даваю моц, злєпшую мозґову циркулацию и змоцнюю имунитет. Теї зоз шипку, лїсца з малини и жалфиї маожу хасновац за окрипенє, а алою, кукурицов баршонь и лїпи най керую.

Литература

• Християнски календар Руски календар, 2005, бок 282 и 283, „Жиц у складзе з вашу кревову ґрупу”, автор асист. мр сц .др Владимир Сакач, специялиста интерней медицини

Вонкашнї вязи

• Krvna grupa B i ishrana. medicalcg.me

• Šta osobe sa krvnom grupom B čini posebnim. eklinika.telegraf.rs