Кревова ґрупа АБ

Антиґени кревових ґрупох присутни у червених кревових заренкох и присуство IgM антицела у серуму креви

АБ кревова ґрупа, попри кревовей ґрупи 0, А и Б, присутна при популациї людзох. Кажда кревова ґрупа достала назву по присустве одредзеного антиґену на блани наших червених кревових заренкох — еритроцитох.

Австрийски лїкар и науковец Карл Ландштайнер ,на початку 20. вику, одкрил тоти штири основни кревово ґрупи и за тото достал Нобелову награду у обласци медицини. Дальши науково виглєдованя приведли до спознаня же драга наставаня кревових ґрупох провадзела цалу драгу розвою чловечества. Америцки лїкаре, оцец и син, Джеймс и Питер Д Адамо, утвердзели факт же детерминанта одредзеней кревовей ґрупи присутна нє лєм у наших червених кревових заренкох, алє и у шицких наших клїтинкох, тканї и орґанох, та так цали орґанизем функционує спрам прикметох припаданя кревовей ґрупи. Одредзена пожива яку кажди дзень єме нам барз хасновита, як лїк, даєдна нєутрална, а даєдна и нєадекватна (як отров и нє треба ю єсц, а то барз важне прето же єме даскельо раз на дзень).

Таблїчка компатибилносци креви

Приматель	Даватель
	O-	O+	B-	B+	A-	A+	AB-	AB+
AB+	X	X	X	X	X	X	X	X
AB-	X		X		X		X
A+	X	X			X	X
A-	X				X
B+	X	X	X	X
B-	X		X
O+	X	X
O-	X

История кревовей ґрупи АБ

Кревова ґрупа АБ у еволутивним шоре наймладша и ридка кревова ґрупа. Настала пред 1 000 роками у новей ери, зоз мишаньом рижних расох з розличнима ґенетскима прикметами. Особи зоз тоту кревову ґрупу то злученє емотивно-сензитивно-нервозней природи припаднїкох ґрупи А и балансовано, унапряменей природи ґрупи Б. Резултат того злученя то духовна, спиритуална и на одредзени способ їх чудна природа. З позитивного становиска, трима ше их за найприцагуюцши и найинтересантнєйши особи у поровнаню з особами других кревових ґрупох. Їх добри боки то швидше прилагодзованє на сучасни условия живота, толерантна имуна система и зєдиньованє предносцох кревових ґрупох А и Б. Слабосци им чувствительна диґестивна система, прихильносц ґу инфекцийом и малокревносци, а окреме опасносци за живот — кардиоваскуларни хороти и рак.

Особи зоз кревову ґрупу АБ — загадочни, ридки, гаризматични, таїнствени.

Костиранє

У одношеню на костиранє тих особох, основне зєдиньованє (алє нє у подполносци) як неґативних, так и позитивних прикметох и кревовей ґрупи А и Б. Нє препоручує ше превельки количества животиньских протеїнох, а смакує им баранчецина, баранїна, заяче месо, пульче месо, док шицки файти преробкох зоз швиньского меса треба керовац. Од риби, позитивно дїйствує тунь, бакалар, ослич и скуша. Тоти особи би мали єсц кваскави ферментовани млєчни продукти: йоґурт, кефир, кожи и кравски швижи сир.

Ґенерално им смакує зарно, з надпомнуцом же жито спричинює продукцию мукусу, та особи прихильни ґу астми и синузитисмом би их мали менєй єсц. Вигодни цереалиї то овшана мука, сойово продукти, просо и млєта рискаша. Од швижей желєняви червена цвиклочка, броколи, карфиол, целер, огурки, петрушка и цеснок им служа як лїк у превенциї од карциному, хоротох шерца и ослабеного имунитету. Од овоци — грозно, шлївки, ягоди и малини им одвитую, як и ананас, кайси и смокви. Рошлїново теї хтори хасновити за особи АБ кревовей ґрупи то першенствено били глог, як превенция од кардиоваскуларних охореньох, потим руменєц и корень валерияни за змиренє, луцерка, репик и ехинацеа як подпорка имуней системи. За погар чарного вина ше зна же зменшує ризик од хоротох шерца при особох обидвох полох. Физични вежби або бавенє зоз спортом би подрозумйовали позитивни уплїв на тїлесни и духовни мир и зменшанє стресу, а то першенствено шейтанє, бициґлизем, плїванє, йоґа, тай-чи, медитация.

Литература

• Християнски календар Руски календар, 2005, бок 283 И 284, „Жиц у складзе з вашу кревову ґрупу”, автор асист. мр сц. др Владимир Сакач, специялиста интерней медицини

Вонкашнї вязи

• Psihološki profil na osnovu krvne grupe. www.stetoskop.info
• Krvna grupa AB, tajanstvena, retka I posebna. eklinika.telegraf.rs

• Ishrana krvne grupe AB. www.prometej-beograd.rs