Кревова ґрупа А

Антиґени кревових ґрупох присутни у червених кревових заренкох и присуство IgM антицела у серуму креви

А кревова ґрупа, попри кревовей ґрупи 0, Б и АБ, присутна при популациї людзох. Кажда кревова ґрупа достала назву по присустве одредзеного антиґену на блани наших червених кревових заренкох — еритроцитох.

Австрийски лїкар и науковец Карл Ландштайнер, на початку 20. вику, одкрил тоти штири основни кревово ґрупи и за тото достал Нобелову награду у обласци медицини. Дальши науково виглєдованя приведли до спознаня же драга наставаня кревових ґрупох провадзела цалу драгу розвою чловечества. Америцки лїкаре, оцец и син, Джеймс и Питер Д. Адамо, утвердзели факт же детерминанта одредзеней кревовей ґрупи присутна нє лєм у наших червених кревових заренкох, алє и у шицких наших клїтинкох, тканї и орґанох, та так цали орґанизем функционує спрам особеносцох припаданя кревовей ґрупи. У одношеню на поживу яку кажди дзень єме, одредзена пожива нам барз хасновита, як лїк, даєдна нєутрална, а даєдна и нєадекватна (як отров и нє треба ю єсц, а то барз важне прето же єме даскельо раз на дзень).

Таблїчка компатибилносци креви

Приматель	Даватель
	O-	O+	B-	B+	A-	A+	AB-	AB+
AB+	X	X	X	X	X	X	X	X
AB-	X		X		X		X
A+	X	X			X	X
A-	X				X
B+	X	X	X	X
B-	X		X
O+	X	X
O-	X

Особи зоз кревову ґрупу А — землєдїлец; предумани, кооперативни, прецизни

История кревовей ґрупи А

Кревова ґрупа А ше перше зявела у Азиї або на Штреднїм Востоку медзи 25 000 и 15 000 роками пред н.е., як реакция чловека Нового каменого часу (неолиту) на нови условия животного штредку. Дотедишнї чловек — ловар и борец, почал ше занїмац з польопривреду и з припитомйованьом животиньох. Велька пременка у костираню и окруженю приведла до мутацийох у орґанох за претровйованє и у имуней системи, хтора оможлївела лєпше подношиц и абсорбовац житарки и други дотедишнї „польопривредни” продукти. Так настал аґрарни тип людзох з кревову ґрупу А.

Добри боки представнїкох тей кревовей ґрупи шлїдза з историйного факту же ше добре прилагодзую на пременєне костиранє и условия околїска, цо дава як резултат и одредзєни психолоґийни прикмети. Наших предкох зоз кревову ґрупу А почали характеризовац и по теди менєй присутни психолоґийни, емотивни и ментални прикмети хтори нєзаобиходно водзели ґу цалосному напредованю чловечества и цивилизациї людского роду, як цо вираженша чувствительносц, пороснуце интелиґенциї, кооперативносц, злєпшанє комуникациї, страственосц, одмераносц. Їх нєдостатки були чувствительна система за претровйованє, ранлїва имуна система и отвореносц ґу инфекцийом. Биолоґийно су предодредзени на хороти шерца и кревових судзинох, хтори водза ґу нєшкайшей експанзиї анґини пекторис, инфаркту миокарду, цереброваскуларного инзулту — „шлоґу”, повисшеному кревовому прициску або гипертeнзиї. Зявює ше прихильносц ґу цукровей хороти або диябетес мелитусу, канцеру – раку, хоротох печинки и жовчу, цо нє значи же им то нєзаобиходна судьба.

Костиранє

Кед слово о метаболизме, особи кревовей ґрупи А би требали елиминовац практично шицки файти меса (окреме червени) з костираня, окрем одредзених файтох риби, кед же жадаю витвориц найвекши хасен з поживи яку конзумую, цо источашнє и зменшує можлївосц виражованя факторох ризику хтори вязани за хороти шерца и канцеру ґу хторим су окреме прихильни.

Пре нїзки уровень жалудковей квашнїни, їх диґестивни тракт помали дїйствує на протеїни з меса, та поставаю спомалшени, з менєй енерґиї и на концу нє згорюю месо як гориво, алє го одкладаю як масц. Важне надпомнуц же на представнїкох тей кревовей ґрупи шицки месово преробки, уключуюци продукти зоз качки, гуски, баранчецину, дзивину и швиньске, дїйствую „як отров”. Було би добре кед би и месо з курчеца и пульчецину, хтори на нїх дїйствую нєутрално, заменєли зоз рибу, по можлївосци зоз потьку, коляком, бакаларом, скушу, лососом, сарделу. Тунєвина, єсетра и чука на нїх дїйствує нєутрално, а лиґнї и ослич би мали керовац.

Два олєї хасновити за тоту кревову ґрупу, а то лєново и маслиново. Треба керовац олєй зоз кукурици и сусаму. Цо ше дотика млєка и млєчних продуктох, состойки з креви А ґрупи правя такволани антицела на примарни цукер з посного млєка и треба их брац у огранїчених количествох. Сирове коже млєко, сойово млєко, йоґурт, кефир, сойов сир треба же би були замена за млєчни продукти, понеже су богати зоз маснима квашнїнами. Прейґмирни количества конзумованя млєчних продуктох нєзаобиходно водза ґу алерґийом, инфекцийом, охореньом синусох и респираторним проблемом. Костиранє кревовей ґрупи А треба же би було худобне з масцами, а богате зоз угльовима гидратами и рошлїновима протеїнами. Препоручує ше 3 – 4 вайца на дзень. За хлєб, печива и цеста можу хасновац сойову, ризкашову, овшану и ражову муку, овес и сою у зарну, та просо. На нїх нєутрално дїйствує кукурична и ярчана мука. Бундавово маґочки тиж хасновити, як цо и кикирики хтори маю у себе состойок вигодни у борби процив канцеру. Тим особом одвитує мархва, желєна капуста, кель, бундава, шпинат, броколи, керелаба, лїсце з цвикли, петрушка, пастернак и цибуля. Треба керовац парадичи у векших количествох, бо єй лектини маю виражене дїйство на диґестивни тракт тих особох. Особи зоз кревову ґрупу А би требала єсц цеску найвецей од шицких кревових ґрупох.

Од овоцох — кайси, чернїци, черешнї, смокви, ґрейпфрут, лимун и ананас помагаю же би ше витворела ровновага зоз заренками хтори правя квашнїну у мускуловей тканї. Мускули при тих особох благо алкални, базово. У умерених количествох можу єсц яблука, грозна, брескинї, грушки, ягоди, рибизли, малини, а треба керовац банани, манґо, помаранчата, мандарини, динї и кокосов орех.

Генерално, особи кревовоей ґрупи А маю потребу за стимулованє злєпшаня функционованя имуней системи. Рошлїни зоз лїковитима прикметами, як цо то алоя, луцерка, ехинацеа, репик и били глог у тим барз вельо помагаю. Били глог знїжує повисшени кревов прицисок, змоцнює роботу шерца дїйствуюци на миокард (шерцову мускулу) и виражує благи ефект на розкладанє масних нашедкох на кревових судзинох — артерийох и так спомалшує артериосклерозу, процес овапньованя хтори нєзаобиходни у живоце каждого поєдинца.

Особи зоз кревову ґрупу А найподлєжнєйши праве кардиоваскуларим хоротом, од хторих 60 проценти у нашей жеми хорує и умера. Желєна тея ма антиоксидативни прикмети зоз хторима, медзи иншим, зменшує можлївосц зявеня канцеру, злєпшує детиксикацийну улогу печинки и барз ефикасно дїйствує як „чисцач” наших кревових судзинох, а благотворна є у злєпшовану имуней системи, окреме процив вирусних хоротох. Рошлїново релаксанти, як цо то руменєц и корень валерияни, помагаю же би нє пришло до стресу. Од додаткох костираню, хтори треба же би надополнєли поживово состойки зоз хторима костиранє тей кревовей ґрупи жридлово худобне, треба спомнуц желєзо. Нєзобиходни витамин Ц, Е и Б12.

Особи А кревовей ґрупи реаґую на перши стадиюм стресу з розумом. Нерви надражнєти з адреналином посилаю импулси мозґу спричинююци знємиреносц, роздражлївосц и гиперактивносц хтора ше преноши на цали орґанизем. Сиґнали стресу „нападаю” имуну систему, цо приводзи до ище векшей чувствительносци нервовей системи и поступнє знїщує антицела. Кед особа останє длуго у таким стану, настава хронїчни стрес, а вон може спричинїц хороти шерца, директно зменшац моц имунолоґийней системи, та ше звекшує можлївосц за наставанє канцеру и велїх других хоротох. Вежби хтори обезпечую змиреносц и концентрацию то спомалшени рухи, медитация, йоґа, тайчи, воженє бициґли, порядне шейтанє и плїванє. Ключ посцигованя гармониї орґанизма то правилна повязаносц менталних и физичних активносцох.

Литература

• Християнски календар Руски календар, 2005, бок 279—282, „Жиц у складзе з вашу кревову ґрупу”, автор асист. мр. сц. др Владимир Сакач, специялиста интерней медицини.

Вонкашня вяза

• Šta A krvna grupa govori o vama: Razlike i sličnosti između A⁻ i A⁺. eklinika.telegraf.rs

• Hrana prema krvnoj grupi A. web.coolinarka.com