Крев
Крев (лат. sanguis) то червена, нєпревидна, густа и слана чечносц, окремного паху. Вона чече през шерцо и кревово судзини и на таки способ преноши поживни материї и оксиґен. Количество креви у чловечим орґанизме од 5 до 6 литри (коло 8 проценти тїлесней маси). Крев ше сосотої зоз плазми, кревових заренкох (еритроцитох, леукоцитох и тромбоцитох) и представя найважнєйшу тїлесни чечносц у чловечим орґанизме.
Крев ендоґена (нукашня) тїлесна чечносц характеристична лєм за похребцинарох.[1] Лимфа, друга тїлесна чечносц, настава зоз креви, кружи през лимфову систему и враца ше до нєй. Крев спада до повязуюцих тканьох, односно ма вельке количество медзиклїтинковей повязуюцей субстанциї хтору творя сами клїтинки повязуюцей тканї. Крев часц системи за циркулацию.[2]
Состав креви и улога
[ушориц | ушор жридло]Крев чечуца ткань хтора ше находзи у шерцу и кревових жилох, а состої ше зоз двох часцох:
● Чечуца часц — кревова плазма
● Кревово клїтинки хтори плїваю у кревовей плазми (еритроцити, леукоцити и тромбоцити)
Волумен кревових заренкох кус менши од волумену плазми и виноши 42 до 45 проценти, а волумен плазми 55 до 58 проценти волумену креви. При хлопох волумен кревових заренкох векши як при женох. Одношенє медзи волуменами кревових заренкох и плазму при здравей особи константне.
Улога креви вельочислена. Крев помага и при диханю, односно преноши оксиґен и угльов диоксид, потим поживни материї, одпадни материї, гормони, ензими, витамини итд. Ма улогу и у реґулациї волумену тїлесних чечносцох, ацидо-базней ровноваги (pH вредносци), реґулациї тїлесней температури, а ма вальку улогу и у охрани од хоротох.
Крев чече през заварту систему цивочкох и кревових жилох, хтори зложени зоз артерийох, капиларох и венох:
● Артериї широки и нєпрепущуюци кревово жили през хтори венска крев чече од шерца ґу плюцом и артерийну крев ґу другим часцом цела. На таки способ ше преноша поживни материї през артериоли (менши артериї хтори наставаю зоз главних артерийох) и през капилари (наставаю зоз артериолох), же би ше на концу у покруткох крев пречисцела, а одпадни материї ше претворели до мочу.
● Вени тиж широки и нєпрепущуюци кревово жили, алє зоз ценшима мурами. През нїх чече венска крев зоз цела и артерийна крев зоз плюцох до шерца. Венска крев ма угльов диоксид и одпадни материї.
● Капилари узки кревово жили зоз ценкима мурами хтори наставаю зоз артериолох и формую зложену мрежу. Вони поштреднїки при черанки материйох медзи креву и клїтинками у орґанизме и при черанки респираторних ґазох у плюцох. У сущносци, капилари оможлївюю же би крев прешла зоз артериї до вени, а же би вода, цукри, аминоквашнїни и други материї прешли през їх мури до тканьох. Длужина, розпорядок и мрежа капиларох нє єднака при шицких тканьох. Крев нє чече источашнє през шицки капилари, алє ше вони по потреби можу отверац и заверац.
Состав креви
[ушориц | ушор жридло]Крев ше состої зоз чечней кревовей плазми (коло 55 проценти) и кревових заренкох (коло 45 проценти).[3]
Кревова плазма безфарбова, односно жовкава чечносц у хторей ше находза орґански и нєорґански материї. У єй составе вода (коло 90 проценти), натрий хлорид (соль, коло 1 процент), цукри (коло 0,1 процент), масни материї, гормони, оксиґен и угльов диоксид, а од билькох (коло 7 проценти) албумини (участвую у преношеню гормонох и других материйох), ґлобулини (маю функцию охрани) и фибриноґен (участвує у процесу стиданя креви).
Еритроцити то червени кревово заренка хтори участвую у преношеню оксиґену и угльового диоксиду у орґанизме.
Леукоцити то били кревово заренка хтори наставаю у шпику и лимфових ґужлїкох. Їх улога у орґанизме имунолоґийна, односно участвую у охрани од хоротох хтори спричинюю бактериї, паразити, вируси и печарочки.
Тромбоцити то кревово плохочки хтори участвую у процесу стиданя креви прето же отримованє креви у чечним стану у кревоцеку и застановйованє кирвавеня при очкодованих кревових судзинох важни механїзми за очуванє стабилних условийох за функционованє орґанизма.
Физични характеристики креви
[ушориц | ушор жридло]Физични характеристики креви то: количество, фарба, температура, густосц, вискозносц, пах, осмотски прицисок, седиментация кревових заренкох и стиданє (коаґулация).
Количество креви у орґанизме завиши од тїлесней поверхносци, односно од висини и маси. Штредня маса креви коло 7 проценти цалей маси чловека. Количество константне при здравих особох под час мированя, а звекшує ше под час роботи и з уношеньом векшого количестав води и поживи до орґанизму. Количество креви у орґанизме нє вшадзи єднаке: при звекшаней активносци звекшує ше и потреба за креву. Под час хороти приходзи до тирвацого зменшаня або звекшаня количества креви у орґанизме, а то резултат зменшаня (звекшаня) самей плазми або еритроцитох пре пременки и кревовових заренкох и плазми. Звекшанє ше вола плетора, а зменшанє олиґемия.
Фарба креви червена пре кревов пиґмент гемоґлобин хтори ше находзи у еритроцитох. Спрам ступня оксидациї гемоґлобину, фарба блядша або цмейша. По тим ше розликує венска и артерийна крев. Фарба креви ше меня и при патолоґийних станох: при трованю з угльовим моноксидом крев бляда червена, а кед придзе до застановеня оксиґенизациї у плюцох - крев чарнява.
Температура креви од 36 до 40 ступнї. Вона нє завиши од вонкашнєй температури, константна є. Найнїзша температура креви у венох скори, а найвисша у венох хтори одводза крев зоз печинки.
Специфична маса креви штреднє виноши 1.060 (чежша є од води) и условена є зоз числом еритроцитох и количеством гемоґлобину у нїх.[4] При хлопох маса креви кус векша як при женох. Маса ше знїжує после єдзеня, а звекшує после физичней усиловносци.
Вискозносц креви то швидкосц прецеканя креви през капиларни цивочки одредзеного пречнїку при одредзеней температури и прициску. Вискозносц креви завиши од числа еритроцитох и од числа леукоцитох кед є звекшане. Пах креви подобни паху зною и походзи од випарююцих масних квашнїнох у нєй.
Осмотски прицисок креви завиши од концентрациї материйох у нєй (електролитох и нєелектролитох), виноши 7 атмосфери и мера ше зоз криоскопом.
Седиментация креви то ушедованє кревових заренкох на дно судзинки у хторей ше крев находзи и хторей додата даяка антикоаґулациона материя. Швидкосц видвойованя кревових заренкох зоз плазми то швидкосц седиментациї и вона завиши од часу кельо крев стої, од числа и прикметох еритроцитох и од одношеня поєдиних материйох у кревовей плазми. Од состойкох плазми на швидкосц седиментациї найбаржей дїйствую количество фибриноґену, голестеролу и даєдни фракциї бильчкох. На пошвидшанє седиментациї дїйствує звекшани фибриноґен або голестерол, а на спомалшенє дїйствує звекшани албумин (главни протеїн у плазми).
pH вредносц креви константна вредносц. Крев чечносц у хторей стаємна концентрация водонїкових йонох од хторей завиши квашносц, алкалносц и нєутралносц реакциї креви. pH вредносц ше руша од 7,3 до 7,5, венска крев кус квашнєйша од артерийней.[5]
Хемийни характеристики креви
[ушориц | ушор жридло]Крев як цалосц ма вельо орґански и нєорґански материї, даєдни ше находза у кревовей плазми, а даєдни у кревових клїтинкох.
▶ Нєорґански материї креви то вода и соль.
[ушориц | ушор жридло]Води єст найвецей єст у кревовей плазми (коло 3,5 литри), а у кревових клїтинкох менєй. Часц води у креви шлєбодна вода и ма розпущуюцу улогу за нєорґански и орґански материї орґанизма. Тота вода по потреби преходзи зоз креви до медзиклїтинковей чечносци и враца ше. Друга часц води у составе гидрофилних бильчкох кревовей плазми и вязана є за албумини (вязана вода).
Нєорґански солї у форми катйонох и анйонох творя 1 процент креви. Медзи анйонами єст найвецей хлориду, фосфату, бикарбонату и сулфату, а медзи катйонами єст натрию, калию, калцию и маґнезию.
▶ Орґански натериї креви
[ушориц | ушор жридло]Бильчки по количестве найглавнєйши у креви. У плазми ше находзи серум-албумини, фракциї ґлобулину и фибриноґену и дакус ґликопротеїну и липопротеїну. У кревових клїтинкох ше находза зложени бильчки: у леукоцитох нуклеопротеїни, а у еритроцитох хромопротеїни.
Липиди ше часточнє находза у плазми, а часточнє су у збудови кревових заренкох. Найважнєйши то: триґлицериди, фосфати, ґликолипиди и стероїди.
Угльово гидрати найзаступенши у форми моносахаридох, ґлукози (цукер у креви) хтора представя главне и основне жридло енерґиї за клїтинки у орґанизме, окреме за мозоґ и нервову систему.
Витамини, окрем того же ше преноша зоз креву по орґанизме, затримую ше у креви.
Ензими до кревовей плазми доходза зоз шлїжинки (панкреасу), зоз клїтинкох других орґанох (печинки, шерца и мускулох) и зоз кревових клїтинкох у хторих ше творя (леукоцитох, тромбоцитох, еритроцитох). Вони заслужни за метаболизем.
Гормони ше находза у креви прето же ше лєм зоз ню преноша през орґанизем. Количество барз мале и виражує ше у микроґрамох. Медзи найважнєйшима то: инсулин, гормони щитного шлїжнїку (Т3 и Т4) и полни гормони (естроґен и тестостерон).
Референци
[ушориц | ушор жридло]- ↑ Romer, Alfred Sherwood; Parsons, Thomas S. (1977). The Vertebrate Body. Philadelphia, PA: Holt-Saunders International. стр. 404-06. ISBN 978-0-03-910284-5.
- ↑ Harvey, William (1628). „Exercitatio Anatomica de Motu Cordis et Sanguinis in Animalibus” (на язику: Латинским). Архивирано из оригинала 27. 11. 2010. г. Приступљено 14. 08. 2017.]
- ↑ The Franklin Institute Inc.„Blood – The Human Heart”. Архивирано из оригинала 5. 3. 2009. г. Приступљено 19. 3. 2009.]
- ↑ Shmukler, Michael (2004). „Density of Blood”. The Physics Factbook. Приступљено 4. 10. 2006.
- ↑ Waugh, Anne; Grant, Allison (2007). „2”. Anatomy and Physiology in Health and Illness (Tenth изд.). Churchill Livingstone Elsevier. стр. 22. ISBN 978-0-443-10102-1.