Кратка история парохиї у Руским Керестуре

Руснаци грекокатолїки зоз Закарпат'я ше 1751. року официйно и орґанизовано почали насельовац до нєнаселєного валалу Керестур. Истого року за нїх у валалє основана грекокатолїцка парохия. Понеже у тей часци Панонского базену нє було грекокатолїкох и грекокатолїцкого владичества, керестурска парохия полни 26 роки була под юрисдикцию римокатолїцкого Калочского надвладичества. Насельованє Керестура ше нє збуло одразу. Року 1756. у валалє було 120 фамелиї. По податкох, людзе доходзели по 1765. рок.

Перши священїк и управитель керестурскей парохиї бул Михайло Кевежди. До Керестура пришол зоз Макова. Познєйше священїки до Керестура частейше приходзели зоз грекокатолїцкого Мукачевского владичества, ридше з Вельковарадинского. Спочатку и шицки потребни церковни кнїжки и други церковни ствари приношени з Мукачевскей епархиї.

За грекокатолїкох у Горватскей и за грекокатолїкох Руснацох у Бачкей 1777. року основане Крижевске владичество. Од теди Руснаци грекокатолїки у Бачки, познєйше и у Сриме и Славониї, припадаю тому владичеству. Крижевске владичество спочатку за Руснацох у Бачки обезпечовало священїкох по походзеню зоз Закарпат'я, а познєйше вишколовани и перши священїки Руснаци народзени у Бачки.

Перша церква у Керестуре збудована 1753. року. Була мала, будована з єдноставного материялу та лєдво прежила двацец и дацо роки. Вец ше почало будовац нову, вельку церкву. Будованє закончене 1784. року. Иконостас поставени и церква омальована аж на початку дзведзешатих рокох, а пошвецена є 1797. року. Познєйше церква була ище даскельораз оправяна, мальована и доправяна.

Керестурска парохия окрем красней велькей церкви, красного парохиялного будинку и нового будинку за капеланох ма у полю, на Медєшу, церквочку Водицу хтора там стої од 1859. року и на окремни способ збера коло себе и парохиянох и госцох.

Будинок керестурскей парохиї

У керестурскей парохиї службовали велї паноцове, Руснаци и нєруснаци, велї з нїх по походзеню з Керестура. Шицки вони допринєсли же би парохия нєпреривно росла и розвивала ше. Велї з нїх зоз своїм дїлом и справованьом остали запаметани у народзе, а таки паноцове були: Петро и Янко Копчаї, Андри Лабош старши, Михайло Мудри, др Йоаким Сеґеди, Михайло Макай.

Найобширнєйшу историю керестурскей парохиї написал др Гавриїл Костельник 1915. року. После нього даєдни паноцове ище дакус дополньовали хронїку парохиї. Цали тот рукопис обявени як окремна кнїжка под назву Хронїка грекокатолїцкей парохиї бачкерестурскей.

Парохия у своєй историї мала вельку улогу у школским живоце валала, алє тиж так и у економским, културним и вообще дружтвеним живоце валалскей заєднїци. Парохове або священїки хтори ту службовали часто були предняки хтори знали буц очи и розум парохиї и валалу.

Перши пейдзешат роки за Керестур були найчежши и, по шицким, найславнєйши. Указало ше же ше до Керестура насельовали найшмелши, тоти цо були порихтани свой живот пременїц на лєпше, а у новим штредку ше отримали найвитирвалши. Тот дух народу и парохиї нє треба занєдзбац. Керестур вироснул з пустари, його жителє за себе тримали же су цошка окремне. На концу Керестур, як увидзиме, на бачванско-сримскей ровнї зачал стваранє єдного окремного малого народу, постал му мац и глава. Народ тот, з правом чи нє, почал ше ровнац з велькима нациями хтори го окружовали, Нємцами, Сербами, Мадярами зоз хторима ровноправно запошеднул пустари и зоз своїма руками стварял єден нови швет.

Священїки хтори служели у парохийней церкви Св. Миколая у Руским Керестуре
Чис.	Мено и презвиско	Час служеня		Чис.	Мено и презвиско	Час служеня
1.	Иларион Прусицки, монах	1751-1756		41.	Михайло Костюк
2.	Михайло Кевежди	1755-1756		42.	Михайло Черняк	1927-1930
3.	Ґеорґий Росий	1756-1758		43.	др Томислав Фирис	1926
4.	Димитрий Попович	1759-1769		44.	др Станко Алянович
5.	Осиф Кирда	1763-1765		45.	Георгий Микловш	1930-1936
6.	Михайло Мучонски	1765-1775		46.	Гавриїл Дудаш	1946-1955
7.	Яков Силваши	1773-1782		47.	Янко Будински
8.	Янко Надь	1773-1817		48.	Онуфрий Тимко	1938-1942
9.	Лука Сташинский	1780-1781		49.	др Йоаким Сеґеди	1941-1966
10.	Петро Копчаї	1783-1818		50.	Ириней Тимко
11.	Теодор Ґоч	1817-1820		51.	др Гавриїл Букатко	1940
12.	Ґабриїл Смичиклас	1819-1825		52.	др Силвестер Киш	1936-1945
13.	Янко Копчаї	1819-1844		53.	Кирил Бесерминї	1945-1958
14.	Янко Ґвожджак	1825-1871		54.	Симеон Хромиш	1946-1955
15.	Никола Докторович	1844-1846		55.	Любомир Рамач	1958-1959
16.	Марко Ґайски	1846		56.	др Йоаким Гербут	1959-1961
17.	Янко Малич	1846-1850		57.	Кирил Планчак	1961-1968
18.	Василий Николич	1850-1852		58.	Славомир Микловш	1965-1968
19.	Илия Цветишич	1852-1855		59.	Михайло Макай	1966-2000
20.	Дионизий Шовш	1855-1861		60.	Михайло Иваняк	1968-1969
21.	Василий Лусканци	1861-1863		61	Яков Новак	1969
22.	Янко Санич	1861-1877		62.	Петро Овад	1970-1971
23.	Андрий Лабош	1863-1876, 1878-1912		63.	Йоаким Джуджар	1971-1972
24.	Михайло Уйфалуши	1876		64.	Йоаким Симунович	1971-1976
25.	Милош Латкович	1876-1878		65.	Юлиян Горняк Кухар	1972-1979
26.	Владислав Лабош	1879-1880		66.	Владимир Мудри	1972-1973
27.	Владимир Лабош	1881-1883		67.	Йоаким Дудаш	1975-1976
28.	Максим Релич	1883-1886		68.	Ярослав Вовк	1978-1980
29.	Дюра Шовш	1886-1888		69.	Владимир Мудри	1977-1979
30.	Йован Хранилович	1888-1889		70.	Петро Репчень	1980-1981
31.	Андрий Лабош	1889-1893
32.	Никола Бадовинац	1893-1902
33.	Дюра Биндас	1902-1912
34.	Владимир Мудри	1911
35.	Михайло Мудри	1912-1936
36.	Дюра Бесерминї	1912
37.	др Гавриїл Костельник	1915
38.	Юрий Павич	1917-1924
39.	Янко Раплєнович	1922
40.	Михайло Фирак	1936-1941

(ту надалєй потребни податки, нє уношиц тото затераз до таблїчки)

Любомир Семан 1986-

Юлиян Рац  2000-2008

Тони Ангелов 2007-

Михайло Малацко 2008-2021

Зиновий Вовк   -2008

Дарко Рац  2008-

Литература

• Янко Рамач, Кратка история керестурскей парохиї През 250 роки, Християнски часопис Дзвони, рок VIII, число 8 (92), авґуст 2001, б. 2.

• М. А, Меновани нови парохове, новини Руске слово, рок LХIII, число 35 (3280), Нови Сад, 29. авґуст 2008. року, б. 7.