Конопа

Конопа
Наукова класификация
Царство	Plantae
Дивизия	Tracheophytes
Дивизия	Angiospermae
Дивизия	Eudicotidae
Дивизия	Rosids
Ряд	Rosales
Фамилия	Cannabaceae
Род	Cannabis L.
Файти
Cannabis sativa L. Cannabis indica Lam. Cannabis ruderalis Janisch

Конопа (лат. Cannabis) то род єднорочних дикотиледоних рошлїнох з фамилиї Cannabaceae, хтори уключує вецей файти. Число файтох у самим роду оспорйоване. Три файти можу буц препознати: Cannabis sativa, Cannabis indica и Cannabis ruderalis; C. ruderalis мож уключиц до C. sativa. Шицки три мож третировац як подфайти єдней файти C. sativa; або ше C. sativa може вжац як поєдинєчна нєроздзелююца файта. Вери ше же є по походзеню з централней Азиї, Китаю и сиверозаходу Гималайох и уж виками ше хаснує за индустрийни, медицински, духовни и уживацки потреби.

Кажда конопа, та и индустрийна, ма психоактивни состойок делта-9-тетрагидроканабинол (∆9-THC, THC), штреднє коло 3%. Векша часц THC-а ше находзи у квиткових верхох женскей рошлїни, док хлопска рошлїна углавним нє психоактивна. У квиткох женских рошлїнох цо пестовани за уживанє, тот уровень досцигує до 20-30%, док при рошлїнох цо пестовани за индустрийне хаснованє вон и до стораз нїзши (спод 0,3%).

Звичайно ше под назву индустрийна конопа подрозумює конопу хтору ше хаснує за доставанє платна, док ше за уживацки, духовни и медицински потреби хаснує окремни сорти, и то лєм женски рошлїни. Конопа позната и по назвох: канабис (латински), ґанджа (индийски), марихуана (шпанска назва з Мексика), трава (жарґонски) итд.

История конопи

История конопи у писаней форми тирва скоро 500 тисячи роки, а евидентне же хаснованє конопи людзе призначовали од початкох своєй писменосци. Конопа єдна з перших култивованих рошлїнох и трима ше же хаснованє конопи старе тельо як и польопривреда. Спочатку ше ю найвецей ховало пре влакна, а стари Китайци з нєй правели штранґи, шмати и папер. Найвчаснейши споминаня єй психоактивних прикметох мож найсц у ведским спису Атхарва-Веда, индийским святим спису хтори стари штири тисячи роки.

Хаснованє конопи на балканских просторох ище у 5. вику п.н.е. призначел Геродот.

Походзенє мена

Слова рижних славянских народох за конопу (серб. конопља, праслав. konopja, слц. konope, поль. konopie, рсй. конопля, чес. konopí) нательо подобни, же тото слово бизовно ма походзенє зоз заєднїцкого славянского праотечества. Познаванє словох нам указує и на познаванє рошлїни, та так етимолоґия може помогнуц же би ше одкрило як длуго Славянє познаю конопу, кед други, археолоґийни або писани жридла нєт.

Файти конопи

Конопа

Конопа рошнє як рошлїна самошейка, алє ше ю тиж уж даскельо тисячи роки хова ширцом планети, цо резултовало з вельку вариябилносцу файти. Єст три вариянти истей ботанїчней файти:

• Cannabis sativa, хтору ше ховало у Европи, а зазначена є 1753. року и дефинована як монотипска рошлїна;
• Cannabis indica, рошлїна принєшена з Индиї хтора 1783. року препозната як биолоґийно розлична од сативи;
• Cannabis ruderalis, рошлїна самошейка у юговосточниг часцох централней Азиї, хтору на початку XX вику дефиновал русийски ботанїчар В. Янишевски. Вон зохабел отворене питанє чи ше роби о окремней файти, чи о окремним типу.

У ботанїки єст монотипски и политипски приступ ґу класификациї конопи, хтори ше нєскладаю коло того чи ше роби о єдней файти з велїма варияциями, чи о вецей розличних файтох з розличнима прикметами.

Хаснованє конопи

Конопа ма вецей розлични способи хаснованя: индустрийне, медицинске, уживацке и духовне.

Индустрийне хаснованє конопи

Жатва конопи (Theodor von Hörmann 1840—1895)

Конопа хтора служи за индустрийне хаснованє ше найчастейше вола индустрийна конопа. Хаснує ше ю у индустриї за правенє штранґох, платна, паперу, шматох, горива, будовательного материялу итд. Ма барз нїзки уровень главного опивацого состойку, ТХЦ-а (звичайно спод 0,3%).

Хованє и преробок конопи була состойна часц модерних економийох аж по XIX вик. Вона була нєзаменлїви ресурс у продукциї платна, у поморстве, у продукциї поживи, у будовательстве, у продукциї паперу. Алє конопа при концу XIX вику страцела на своєй конкурентносци пред индустриями памуку и нафти. Концом 20. вику ширши дружтвени интерес за хованє индустрийней конопи найбаржей ше виражує у жемох Европскей униї и вона з часу на час уключена до державних стимулацийох у еколоґийно отримуюцей продукциї.

Медицинске хаснованє конопи

Конопу ше як лїк хаснує вецей як 5000 роки. Гербариюм китайского цара Шен Нунга конопу спомина як рошлїну хтора може буц дїлотворна у лїченю малариї и констипациї.

Нєшка ше у медицини конопу найчастейше хаснує як лїк процив стресу, траценя апетиту, млосци хтора спричинєта з хемиотерапию, за ублажованє пошлїдкох чежких хоротох итд.

Уживацке хаснованє конопи

Мотанє джоинта

О уживацким або рекреативним хаснованю конопи ше бешедує теди кед ше ю хаснує пре єй опиваюци дїйства а нє, наприклад, за доставанє влакнох або за лїченє. Конопу ше найчастейше ужива так же ше ю кури, и то квитки женскей рошлїни. Ручно шулькани циґар з конопи ше вола джоинт. После длугшого и частого рекреативного хаснованя конопи може ше зявиц психична зависносц.

Ритуалне хаснованє конопи

О ритуалним хаснованю конопи ше бешедує теди кед ше тоту рошлїну хаснує у релиґиї за ритуални цилї. Конопа ма длугу историю ритуалного хаснованя у велїх култох и релиґийох цалого швета. У Индиї ше ю хаснує уж виками на чесц бога Шиви. Растафариянє ю тримаю за святу рошлїну, а єй уживанє за вирски обряд. У исламе ю хасновали дервиши. Даєдни историчаре тримаю же ше ю хасновало и у юдаїзме и вчасним християнстве.

Законски статус конопи

Закони европских земаља о конопљи

Ключне питанє у закону ше одноши на розликованє типох конопи у хторих єст психоактивни состойок ТХЦ од типох конопи у хторих нєт ТХЦ. Законодавство векшини жемох у швеце заступа монотипски приступ хтори трима же наглашена вариябилносц заш лєм нє допущує дефиновац розлични файти тей рошлїни. Тих цо шею конопу директно потрафя дїйствованє службох дружтвеней контроли, хторе засноване на идентификованю индийскей и индустрийней конопи. Гоч тоти цо пестую конопу можу розликовац психоактивни прикладнїки конопи од индустрийних, бо стратеґиї пестованя варирую уж при вибераню нашеня, прейґ способу садзеня, аж по часови период дозреваня рошлїни, державни служби нє пошвецую вельку увагу розликованю. Рошлїна чийо ше можлївосци и пестованє нєшка вше баржей випитує, у контексту отримуюцого розвою, нє ридко предмет систематского знїщованя. Наприклад, вецей як 90% конопи хтору 1990-их рокох америцки державни аґенциї (найвцей DEA - Drug Enforsement Agency) заплєнєли и знїщели, одпада на нєкултивовану (дзиву) конопу хтора углавним нє ма психоактивни состойки. Так у „войни процив дроґох”, коло прикладнїкох файти хтори цильовани пре психоактивни состойки, як колатерална жертва пада и индустрийна конопа.

Литература

• Deitch, Robert (2003). Hemp: American History Revisited: The Plant with a Divided History. Algora Pub. ISBN 978-0-87586-206-4.
• Earleywine, Mitchell (2005). Understanding Marijuana: A New Look at the Scientific Evidence. Oxford University Press. ISBN 978-0-19-513893-1.
• Emmett, David; Graeme Nice (2009). What you need to know about cannabis: understanding the facts. Jessica Kingsley Publishers. ISBN 978-1-84310-697-5.
• Hulsewé, A. F. P. (1979). China in Central Asia: The Early Stage 125 BC — AD 23: an annotated translation of chapters 61 and 96 of the History of the Former Han Dynasty. E. J. Brill, Leiden. ISBN 90-04-05884-2.
• Geoffrey William, Guy; Brian Anthony Whittle; Philip Robson (2004). The medicinal uses of cannabis and cannabinoids. Pharmaceutical Press. ISBN 978-0-85369-517-2.
• Holland, Julie M.D. (2010). The Pot Book: A Complete Guide to Cannabis: Its Role in Medicine, Politics, science, and culture. Park Street Press. ISBN 978-1-59477-368-6.
• Iversen, Leslie L (2008). The science of marijuana (2nd изд.). Oxford University Press. ISBN 978-0-19-532824-0.
• Jenkins, Richard (2006). Cannabis and Young People: Reviewing the Evidence. Jessica Kingsley. ISBN 978-1-84310-398-1.
• Lambert, Didier M (2008). Cannabinoids in Nature and Medicine. Wiley-VCH. ISBN 978-3-906390-56-7.
• Mallory, J. P. and Victor H. Mair (2000). The Tarim Mummies: Ancient China and the Mystery of the Earliest Peoples from the West. Thames & Hudson, London. ISBN 0-500-05101-1.
• Roffman, Roger A; Robert S. Stephens (2006). Cannabis Dependence: Its Nature, Consequences, and Treatment. Cambridge University Press. ISBN 978-0-521-81447-8.
• Russo, Ethan; Melanie Creagan Dreher; Mary Lynn Mathre (2004). Women and Cannabis: Medicine, Science, and Sociology. Haworth Press. ISBN 978-0-7890-2101-4.
• Solowij, Nadia (1998). Cannabis and Cognitive Functioning. Cambridge University Press. ISBN 978-0-521-59114-0.
• Словнїк руского народного язика I, А – Н, Нови Сад 2017, б. 619.

Вонкашнї вязи

• Енциклопедија конопље
• N. Dubreta: Konoplja — sociološki aspekti uzgoja i upotrebe (pdf)
• Урота века: Како је уништена конопља као индустријска биљка („Вечерње новости”, фељтон, фебруар 2015)
• International Plant Names Index (IPNI)